Bahadur Bilalov: “Dağ xizək, dağçılıq, qolf, atçılıq və digər oyunlar ilk baxışdan idman kimi görünsə də, əsas məqsəd həmin oyunlardan mənəvi zövq almaqdır”
Son illər Azərbaycanda turizmin müxtəlif növləri inkişaf etdirilir, bununla bağlı layihələr həyata keçirilir. Azərbaycan turizminin rəqabət imkanlarının artırılması istiqamətində bir çox addımlar atılır. Müxtəlif turizm növləri Azərbaycan turizm bazarının regional və beynəlxalq səviyyədə rəqabət apara bilməsi üçün geniş imkanlar yaradır.
Məlumdur ki, Azərbaycanda idman turizmi inkişaf etdirilir və onun rəqabət imkanlarının artırılması istiqamətində əhəmiyyətli işlər görülür. Ölkəmizdə inkişaf potensialı olan turizm növlərindən biri də idman turizmidir. İdman turizminin inkişafının dəstəklənməsi Azərbaycan Respublikası Prezidentinin 2016-cı il 6 dekabr tarixli Fərmanı ilə “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi”ndə də əksini tapıb.
Ekspertlərin bildirdiyinə görə, Azərbaycanda da idman turizminin inkişaf etdirilməsinə ehtiyac var. Azərbaycandan xaricə idman turizmi məqsədilə gedənlərin sayı çoxdur. Bu özünü daha çox qış idman növlərində büruzə verir. Son zamanlar “Şahdağ” qış-yay turizm kompleksinin inkişafı bu problemin həllində əhəmiyyətli rol oynayıb.
Bu günlərdə Lənkəranda səfərdə olan Prezident İlham Əliyev adıçəkilən bölgədə İstisu Sağlamlıq Mərkəzində görülən işlərlə tanış olub. Prezident Azərbaycan turizminin inkişafı haqqında fikir bildirib. Eyni zamanda, idman turizminin inkişaf etdirildiyini də qeyd edib.
İdman turizminin inkişafı haqqında söhbət etdiyimiz turizm sahəsi üzrə ekspert Bahadur Bilalov “Bakı-Xəbər”ə açıqlamasında bildirdi ki, idman turizmi 2 şaxəlidir. Keçirilən idman yarışları idman turizminin bir növü hesab olunur. Yarış zamanı ölkəmizə gələn idmançılar və onların azarkeşlərinin turizmin inkişafında xüsusi rolu var. Digər növü isə turistlərin öz iştirakı ilə həyata keçir. Dağ xizək, dağçılıq, qolf, atçılıq və digər oyunlar ilk baxışdan idman kimi görünsə də, əsas məqsəd həmin oyunlardan mənəvi zövq almaqdır. Azərbaycanda da idman turizminin inkişafı istiqamətində müəyyən işlər görülür. Prezident İlham Əliyev öz çıxışında qeyd edib ki, Azərbaycan idman turizminin inkişafı üçün böyük potensiala malikdir”.
Ekspert qeyd etdi ki, ekstremal turizmin dağ növlərinə alpinizm, speleoturizm, buzadırmanma və qayayadırmanma, dağ velosipedində hərəkət, dağ xizəkçiliyi və snoubordinq aiddir. Dağ xizəkçiliyi daha çox təbii şəraitdən asılıdır. Bu turizm istiqamətinin inkişafı üçün ilin 4-5 ayında qalın qar örtüyünün olması vacib şərtdir. Ərazinin hündürlüyü və relyef xüsusiyyətləri, dağ xizəkçilik dövrünün hava şəraiti, landşaftın müxtəlifliyi, uçqun və sel təhlükəsinin olmaması və s. dağ-xizəkçilik istirahətinə cazibədarlıq verən amillərdir
Həmsöhbətimiz qeyd etdi ki, son zamanlar paytaxt Bakı şəhərində çoxlu sayda beynəlxalq yarış keçirilir. Bu yarışları izləmək üçün ölkəyə çoxlu sayda turist gəlir. Turistlər idman yarışlarını izləməklə yanaşı, həm idmandan zövq alırlar, həm də turist kimi ölkəmizi kəşf etməkdən.
B.Bilalov onu da qeyd etdi ki, regionlar idman turizminin inkişaf etdirilməsi baxımından böyük potensiala malikdir: “Məlumdur ki, bölgələrdə olimpiya kompleksləri inşa olunub, müxtəlif yarışlar keçirilir. Nəzərə almaq lazımdır ki, tək paytaxt Bakı deyil, bölgələr də idman turizminin inkişafı üçün böyük potensiala malikdir”.
Günel CƏLİLOVA
