Əli Əlirzayev: “Gələcəkdə Azərbaycan vasitəsilə nəinki İrana, Pakistana, eləcə də digər Asiya ölkələrinə elektrik enerjisi ixrac oluna bilər”
İran 2019-cu ildən başlayaraq Azərbaycan vasitəsilə Rusiyadan elektrik enerjisi idxal edəcək. Bu sözləri İranın energetika nazirinin müavini Homayun Hayeri yerli mətbuata açıqlamasında deyib. O bildirib ki, bu haqda razılaşma Azərbaycan və Rusiyanın müvafiq qurumlarının rəhbərləri ilə Moskvada keçirilən görüşdə əldə olunub.
Qarşılıqlı razılaşmaya əsasən, Rusiya elektrik enerjisini Azərbaycana ötürəcək. Azərbaycan isə mövcud xətlərlə enerjini İrana verəcək.
H.Hayeri onu da nəzərə çatdırıb ki, Azərbaycanın elektrik enerjisini Rusiyadan İrana ötürmək üçün müasir standartlara cavab verən infrastrukturu var.
Onu da qeyd edək ki, bir müddət əvvəl İranın energetika naziri Reza Ardakanian Azərbaycanın bu məsələdə oynadığı rola toxunmuşdu. Onun sözlərinə görə, İran Avropanın elektrik enerjisi şəbəkəsinə qoşulmasını vacib məsələ hesab edir: “Bu ideyanın reallaşdırılması üçün bir neçə variantımız var. Onlardan biri də bunu Azərbaycan üzərindən həyata keçirməkdir”.
Diqqətçəkən məqamlardan biri odur ki, İran rəsmiləri elektrik enerjisinin ötürülməsi ilə bağlı Azərbaycanın müasir standartlara cavab verən infrastrukturunun olmasını xüsusi qeyd edirlər. Görünən odur ki, nəinki nəqliyyat daşımalarda, o cümlədən elektrik enerjisinin ötürülməsində də Azərbaycanın tranzit ölkə olaraq rolu artır. Çünki qeyd olunduğu kimi, bununla bağlı müasir infrastruktura malikdir. Bu imkan verir ki, Azərbaycan nəinki İrana, o cümlədən digər ölkələrə də elektrik enerjisinin ötürülməsində tranzit ölkə rolunda çıxış etsin. Nəzərə almaq lazımdır ki, Azərbaycanın özü də digər ölkələrə elektrik enerjisi ixrac edir.
Bu baxımdan ekspertlər Azərbaycanın tranzit əhəmiyyətini necə dəyərləndirirlər?
Məsələyə münasibət bildirən iqtisadçı-alim Əli Əlirzayevin sözlərinə görə, Azərbaycanın bu məsələdə tranzit ölkə olaraq rolunun artması müsbət haldır: “Bunun həm iqtisadi, həm də digər əhəmiyyəti var. Bunun nəticəsində Azərbaycan tranzit ölkə olaraq müəyyən gəlirlər əldə edə bilər. İqtisadi baxımdan bunun müəyyən dividendləri var. Ən başlıcası, bu, Azərbaycanın bölgənin iqtisadi həyatında oynadığı rolu artırır. Nəzərə almaq lazımdır ki, Azərbaycan Cənubi Qafqazda həm Rusiya, həm də İranla sərhədə malik yeganə ölkədir. O cümlədən, Azərbaycanın özü də elektrik enerjisi ixrac edir. Gələcəkdə Azərbaycan vasitəsilə nəinki İrana, Pakistana və eləcə də digər Asiya ölkələrinə elektrik enerjisi ixrac oluna bilər. Azərbaycan, bu minvalla, həm ölkədə istehsal olunan elektrik enerjisini, həm də qonşu ölkələrin elektrik enerjisini ötürə bilər. Hesab edirəm ki, bu, Azərbaycanın rolunu artırmaqla yanaşı, ölkənin nüfuzunun artmasına da öz müsbət təsirini göstərəcək. O baxımdan bu yöndə Azərbaycanın fəaliyyətinə müsbət prizmadan yanaşıram”.
Vidadi ORDAHALLI
