Rüfət Quliyev: “Əmək yarmarkaları işsizliyin aradan qaldırılması baxımından atılan uğurlu addımlardan biridir”
İşaxtaran şəxslərin layiqli iş yerləri ilə təmin olunması və işsizliyin aradan qaldırılması üçün dövlət tərəfindən atılan addımlardan biri də əmək yarmarkalarının təşkilidir. Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti mütəmadi olaraq respublikanın bütün bölgələrində əmək yarmarkası keçirir. Növbəti belə yarmarka bu ay ərzində baş tutub.
Qeyd edək ki, bu ay 6 rayon və şəhərdə əmək yarmarkası keçirilib. Nazirliyin ictimaiyyətlə əlaqələr şöbəsinin yaydığı məlumatda qeyd olunur ki, bu ay Göyçay, Tərtər, Yevlax, Kürdəmir, Samux rayonlarında və Mingəçevir şəhərində əmək yarmarkaları keçirilib. Ümumiyyətlə, yarmarkalarda 173 müəssisə üzrə 1000-ə yaxın vakant iş yeri təqdim edilib, 312 nəfər işaxtaran və işsiz vətəndaşa peşə bacarıqlarına, əmək vərdişlərinə uyğun vakant iş yerlərinə göndəriş verilib. Peşə bacarığına uyğun iş tapmadığı üçün peşəsini dəyişmək istəyən 103 nəfər peşə hazırlığı və əlavə təhsil kurslarına cəlb edilmək üçün qeydiyyata alınıb, 37 nəfər isə öz arzusuna uyğun olaraq ödənişli ictimai işlərə göndərilib.
Bu ay ərzində 6 rayon və şəhərdə əmək yarmarkasının keçirilməsi və orada müxtəlif sahələr üzrə 1000-ə yaxın iş yerinin təklif olunması işsizlərin işlə təmin olunması baxımından əhəmiyyətlidir.
Millət vəkili Rüfət Quliyev bildirdi ki, əmək yarmarkaları işsizliyin aradan qaldırılması baxımdan atılan uğurlu addımlardan biridir: “Bu, regionda yaşayan və işaxtaran vətəndaşların daha yaxşı işlə təmin olunmasına imkan verir. O baxımdan yarmarkalar iş təklif edənlərlə işaxtaranlar arasında münasibətlərin qurulmasına xidmət edir. Bu, regionlarda işlə təmin olunanların sayının artmasına gətirib çıxarır. Regionlarda belə yarmarkaların keçirilməsi məşğulluğun təmin edilməsi baxımından olduqca əhəmiyyətlidir və işaxtaranların məşğulluğunda hissedilən dəyişiklik olacaq. İşəgötürənin çox olması isə əhaliyə geniş iş imkanlarının təklif edilməsi deməkdir”. Həmsöhbətimiz onu da vurğuladı ki, əmək yarmarkalarında orta təhsilli vətəndaşların işlə təmininin genişləndirilməsi üçün xidmət sektorlarının inkişaf etdirilməsinə ehtiyac var: “Yarmarkalarda təklif edilən iş yerləri yalnız ali təhsilli şəxslər üçün olmur. Eyni zamanda, orta təhsilli vətəndaşlar üçün də iş yerləri təklif olunur. Xidmət sektorunda təklif edilən iş yerləri daha çox orta təhsilli vətəndaşlar üçün nəzərdə tutulacaq. Xidmət sektoru regionlarda genişləndirilsə, regionlarda ali təhsili olmayan vətəndaşlar üçün iş imkanları çoxalacaq. Əgər banklarda və digər maliyyə qurumlarında daha çox ali təhsillilərin işlə təmin olunmasına imkan varsa, xidmət sektorunda orta təhsilli vətəndaşların işlə təmini həyata keçiriləcək. Son bir ay ərzində 6 bölgədə əmək yarmarkasının keçirilməsi çoxlu sayda vətəndaşın işlə təmin olunması deməkdir”.
Günel CƏLİLOVA
