Aydın Hüseynov: “Ümumilikdə, regionların inkişafı strategiyasının başlanmasından indiyədək 1 milyon 300 mindən artıq iş yeri açılıb ki, onlardan təxminən 1 milyonu daimi iş yeridir”
15 ildir Prezident İlham Əliyev ölkəyə rəhbərlik edir. Prezident İlham Əliyevin hakimiyyəti illərində ölkədə çoxsaylı işlər görülüb. Bütün sferalarda inkişaf özünü göstərib. O cümlədən iqtisadi sahədə böyük nailiyyətlər əldə olunub.
Onun rəhbərliyi ilə son 15 ildə həyata keçirilən ardıcıl və məqsədyönlü iqtisadi siyasət nəticəsində ölkədə planlı sosialist iqtisadiyyatından bazar iqtisadiyyatına keçid prosesinin başa çatması təmin edilib. 2004-2018-ci illər ərzində iqtisadiyyatın şaxələndirilməsi, qeyri-neft sektorunun və bölgələrin davamlı yüksəlişi məqsədilə regionların sosial-iqtisadi inkişafına dair üç Dövlət Proqramı icra olunub. Hazırda dördüncü proqramın qəbul edilməsinə hazırlıq görülür.
Regionların inkişafı ölkədə uğurlu həyata keçirilən davamlı sosial-iqtisadi inkişaf strategiyasının mühüm tərkib hissəsidir. Regionların davamlı və tarazlı inkişafına nail olunması ölkənin sosial-iqtisadi tərəqqisini təmin edən başlıca amillərdən biridir. Regionların sosial-iqtisadi inkişafı dövlət siyasətinin prioritet istiqamətlərindən biri kimi daim xüsusi diqqət mərkəzində saxlanır və Prezident İlham Əliyev bu məqsədlə ölkənin bütün şəhər və rayonlarına müntəzəm səfərlər edir, görülən işlərlə şəxsən maraqlanır, tapşırıq və tövsiyələrini verir. Cari ilin 9 ayında dövlət başçısı respublikanın 13 şəhər və rayonlarına səfər edib. Verdiyi tapşırıqların və göstərişlərin icrası ilə yerində maraqlanıb və müvafiq tapşırıqlar verib. Ötən 15 ildə regionların sosial-iqtisadi siması əhəmiyyətli dərəcədə dəyişib. Məsələn, 2004-cü ildə ölkədə qazlaşdırmanın səviyyəsi cəmi 51 faiz təşkil edirdisə, hazırda bu göstərici 95 faizə yaxınlaşıb. Regionların infrastrukturu əsaslı şəkildə yenilənib.
Ümumiyyətlə, sözügedən proqramların Cənubi Qafqazda tayı-bərabəri yoxdur. Nə Gürcüstanda, nə Ermənistanda bu və buna bənzər mükəmməl proqram yoxdur. Hətta Orta Asiyada belə bunun analoqu yoxdur.
Bütün bunların fonunda, bəs ekspertlər ötən 15 il ərzində bu sahədə görülən işləri necə dəyərləndirirlər?
Məsələyə münasibət bildirən millət vəkili Aydın Hüseynovun sözlərinə görə, ötən 15 il ərzində regionlarda çox böyük işlər həyata keçirilib: “Cənab Prezidentin birbaşa göstərişi və müəllifliyi ilə regionların sosial-iqtisadi inkişafı üzrə dövlət proqramları qəbul olundu. Dövlət proqramlarının icrası nəticəsində ölkədə 3200-dən çox məktəb tikildi, 650-dən çox xəstəxana tikildi və bərpa olundu, 12 min kilometr yol çəkildi. Ölkə artıq 95 faizə qədər qazlaşdırılıb. Regionların sosial-iqtisadi inkişafı ilə bağlı yürüdülən siyasət cari ilin ötən 9 ayı ərzində ölkə iqtisadiyyatının şaxələnməsinə, qeyri-neft sektorunun inkişafına möhkəm zəmin yaradıb. Təkcə bu ilin 9 ayında 100 mindən çox yeni iş yeri açılıb ki, onlardan 86 mini daimi iş yeridir. Ümumilikdə, regionların inkişafı strategiyasının başlanmasından indiyədək 1 milyon 300 mindən artıq iş yeri açılıb, onlardan təxminən 1 milyonu daimi iş yeridir. Regionların inkişafı ilə bağlı strategiyanın davam etdirilməsi bölgələrdə işsizliyin səviyyəsinin azalmasına mühüm təsir göstərib. Yeni müəssisələrdə yaradılmış iş yerlərinin sayının artması işsizlik səviyyəsinin 1 faizə yaxın aşağı düşməsinə səbəb olub. Hazırda ölkəmizdə işsizlik səviyyəsi 5 faiz təşkil edir ki, bu da dünya göstəricisindən xeyli aşağıdır. Bundan başqa, Azərbaycanda biznes mühitinin yaxşılaşdırılması, sahibkarlığa dövlət dəstəyi tədbirlərinin artırılması yürüdülən siyasətin əsas prioritetlərindəndir. Prezident İlham Əliyevin iqtisadi islahatlar paketi çərçivəsində sahibkarlığın inkişafı ilə bağlı qəbul etdiyi qərarlar iqtisadiyyatın davamlı inkişafının təmin olunması baxımından strateji xarakter daşıyır. Bu həm də bölgələrdə sahibkarlığın inkişafı üçün yeni dövrün başlanmasına səbəb olub. Bu siyasətin nəticəsi olaraq sahibkarlıq sahəsində aparılan yoxlamalar dayandırılıb, lisenziyalar və icazələrin sayı azaldılıb. Bütün bunlar iqtisadiyyatın artıq qeyri-neft əsasları üzərində inkişaf etdiyini göstərir”.
Vidadi ORDAHALLI
