Müslüm İbrahimov: “Pakistanda Azərbaycan ticarət evinin açılması tək qeyd olunan ölkə üçün deyil, eyni zamanda, Asiya ölkələri üçün nəzərdə tutulur”
Prezident İlham Əliyevin tapşırığı ilə xarici ölkələrdə Azərbaycan ticarət evləri yaradılır. Bu istiqamətdə aparılan işlər davam edir. Xarici ölkələrdə Azərbaycan ticarət evlərinin yaradılması həm təbliğat üçün önəmlidir, həm də ixrac imkanlarımızı daha da genişləndirir.
Məlumat üçün bildirək ki, hazırda Azərbaycan ticarət evləri Ukrayna və Belarusda fəaliyyət göstərir. Bu ayın sonuna kimi Latviyada ticarət evinin açılması planlaşdırılır. Bundan başqa, Azərbaycan BƏƏ-də və Rusiyada ticarət evləri açmaq niyyətindədir. Həmçinin, Azərbaycan Pakistanda ticarət evi aça bilər. Bunu Azərbaycan iqtisadiyyat nazirinin müavini Rüfət Məmmədov deyib. R.Məmmədov media nümayəndələrinə açıqlamasında bildirib ki, Pakistan Azərbaycan üçün vacib tərəfdaşdır: “Biz Pakistanda ticarət evinin açılmasını istisna etmirik. Amma bizə hələlik bu barədə təklif daxil olmayıb. Eyni zamanda, Pakistan Azərbaycan üçün vacib tərəfdaşdır. Ona görə də bu bazar bizim üçün maraq kəsb edir. Əgər bizə Pakistan tərəfindən ticarət evinin açılması barədə təklif gələrsə, biz məmnuniyyətlə bunu nəzərdən keçirərik".
Qeyd edək ki, Azərbaycan ticarət evlərinin yaradılmasında əsas məqsəd həm Azərbaycanı tanıtmaq, həm də yerli istehsal olan məhsullarımızın reklam olunmasıdır.
İqtisad elmlər doktoru Müslüm İbrahimov “Bakı-Xəbər”ə açıqlamasında qeyd etdi ki, Azərbaycan tərəfi hansı ölkədə öz ticarət strategiyasını qurubsa, orada ticarət evləri açılır: “Ticarət evlərinin açılması olduqca vacibdir. Ticarət evləri yerli məhsulları tanıtmaq və onların alıcılarını müəyyən etmək baxımından əhəmiyyətlidir. Bəllidir ki, son zamanlar qeyri-neft sektorunda artım müşahidə olunur”.
Həmsöhbətimizin sözlərinə görə, xarici ölkələrdə açılan ticarət evləri, bir növ, platformadır. Xarici idxalçıların və ixracatçıların görüşünü təşkil edən platforma sayılır.
M.İbrahimov onu da qeyd etdi ki, istehsal olunan məhsulun ixrac olunmasında bəzən müəyyən risqlər mövcud olur. Həmin risqləri aradan qaldırmaq üçün ticarət evlərinin mövcud olması olduqca vacibdir: “Ticarət evləri vasitəsilə Azərbaycanda istehsal olunan məhsulların xarici bazarda reallaşması mümkündür. Ticarət evlərinin olmasının müsbət tərəflərindən biri də odur ki, Azərbaycanın iqtisadi potensialı nümayiş olunur. Beləliklə, xarici investorlar Azərbaycana maraq göstərirlər. Bununla da ölkələr arasında investisiya ixrac layihələri həyata keçirilməyə başlayır”.
Müsahibimizin sözlərinə görə, Pakistanın dünya iqtisadiyyatında xüsusi rolu var: “Pakistanda ticarət evinin açılması ölkə iqtisadiyyatına müsbət təsir göstərər. Qeyd olunan ölkədə ticarət evinin açılması tək Pakistan bazarı üçün deyil, eyni zamanda, Asiya ölkələri üçün nəzərdə tutulur. Eyni zamanda, islam qaydalarına riayət olunmuş formada istehsal olunan məhsullar rahat şəkildə Pakistan bazarına çıxarıla bilər”.
Günel CƏLİLOVA
