Pərviz Heydərov: “Son zamanlar istehsal sahələrinin yaradılması, infrastruktur layihələrinin icra olunması nəticəsində, eyni zamanda aqrar sektorda dövlətin həyata keçirdiyi bir sıra tədbirlərlə bağlı olaraq məşğul əhalinin sayı artıb”
Ötən ilin analoji dövrü ilə müqayisədə Azərbaycanda bu il rəsmi işsiz statusuna malik olanların sayında azalma müşahidə olunur. Bunu Azərbaycan Respublikasının Sahibkarlar Təşkilatları Milli Konfederasiyasının prezidenti Məmməd Musayev "Gənclərin məşğulluğunun təşviqi üzrə aktiv əmək bazarı siyasətləri" mövzusunda keçirilən tədbirdə deyib.
O, çıxışı zamanı qeyd edib ki, bu il iyunun 1-nə olan məlumata əsasən, iqtisadi fəal əhalinin sayı 5,1 milyon nəfər olub ki, onlardan 4,9 milyon nəfərini iqtisadi əmək fəaliyyəti ilə məşğul olan əhali təşkil edib: “İyunun 1-nə olan məlumata əsasən, məşğulluq xidməti orqanları tərəfindən ölkə üzrə rəsmi işsiz statusu verilən şəxslərin sayı 36,7 min nəfər olub. Onların 36,7 faizini qadınlar təşkil edib”.
Məlumat üçün bildirək ki, işsizlik müavinətinin və işsizlikdən sığorta ödənişinin məbləği 347,4 manatdır.
Ekspertlər işsizlərin sayının azalmasının son zamanlar açılan iş yerlərinin sayının artması ilə bağlı olduğunu bildirirlər.
İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, işsizliklə bağlı dəqiq hesabat aparılmalıdır. Hesabatın aparılması üçün müvafiq mexanizm olmalıdır: “Əmək qabiliyyətli əhalinin sayının nə qədər olması araşdırılmalıdır. Eyni zamanda, onlardan nə qədərinin özəl və dövlət sektorunda çalışdığı müəyyən olunmalıdır”.
Həmsöhbətimizin sözlərinə görə, büdcə sektorunda əmək müqaviləsi olmadan çalışmaq mümkün deyil. Ancaq özəl sektorda isə vəziyyət fərqlidir: “Bu səbəbdən də ölkə üzrə əmək qabiliyyətli əhalinin hansı hissəsinin məşğul olduğunu və işsizlərin sayını müəyyən etmək olduqca çətin məsələdir”.
P.Heydərov onu da vurğuladı ki, son zamanlar istehsal sahələrinin yaradılması, infrastruktur layihələrinin icra olunması nəticəsində, eyni zamanda aqrar sektorda dövlətin həyata keçirdiyi bir sıra tədbirlərlə bağlı olaraq məşğul əhalinin sayı artıb.
İqtisadçının dediyinə görə, beynəlxalq təcrübədə işsizliyin ən aşağı həddi 5 faiz hesab olunur: “Məsələn, Amerikada işsizliyin səviyyəsi 5 faizdən aşağı düşəndə bu, müsbət göstərici hesab olunur. Ancaq Azərbaycanda da işsizlərin sayı təxminən eyni həddədir”.
Günel CƏLİLOVA
