Müslüm İbrahimov: “Xarici sahibkarlar ölkəmizdə istehsal olunan meyvə-tərəvəzi öz bazarlarına çıxarırlar”
Xəbər verildiyi kimi, Azərbaycan meyvə-tərəvəz məhsullarının ixracını artırıb. Statistik rəqəmlərə əsasən, 2018-ci ilin yanvar-may aylarında Azərbaycanda meyvə-tərəvəz istehsalı ötən ilin eyni dövrü ilə müqayisədə 19 faiz artıb. Bunu Azərbaycan Meyvə-Tərəvəz İstehsalçıları və İxracatçıları Assosiasiyasının sədri Bəşir Quliyev assosiasiya üzvlərinin görüşü zamanı deyib.
O qeyd edib ki, hesabat dövründə meyvə-tərəvəz məhsullarının ixracı 2017-ci ilin yanvar-may ayları ilə müqayisədə 23 faiz artıb: “Hazırda biz ixrac coğrafiyasının genişləndirilməsi üzrə işlər aparırıq, amma eyni zamanda Azərbaycan üçün ənənəvi olan bazarları da unutmaq lazım deyil. Bu bazarlardan biri Rusiyadır. Mən assosiasiya üzvlərini Rusiya ərazisində keçirilən sərgilərdə fəal iştirak etməyə çağırıram”.
Meyvə-tərəvəz məhsullarının ixracının artması barədə fikir bildirən iqtisad elmlər doktoru Müslüm İbrahimov "Bakı-Xəbər"ə açıqlamasında qeyd etdi ki, son zamanlar kənd təsərrüfatı məhsullarının istehsalına göstərilən diqqət və qayğı nəticəsində bu sektorda inkişaf qeydə alınır. İnkişaf nəticəsində ixrac ölkələrin sayı da artır: “Bəllidir ki, Azərbaycan tərəfi ənənəvi olaraq öz meyvə-tərəvəz məhsullarını Rusiyaya yollayır”.
Həmsöhbətimizin sözlərinə görə, aqrar məhsulların istehsalında artım qeydə alındığı üçün, virtual formada potensial alıcılar Azərbaycan məhsullarını onlayn sifariş etməklə əldə edə bilirlər: “Rusiya, Belarus, Ukrayna və digər ölkələr hər zaman Azərbaycan məhsullarını alırlar. Ancaq onu da deyim ki, artıq Azərbaycan Avropaya inteqrasiya olunub. Azərbaycan haqqında Avropa ölkələrində müsbət məlumatlar mövcuddur. Bunu ölkəmizə gələn avropalı turistlər də təsdiqləyirlər. Ölkəmizə gələn turistlər Azərbaycan nemətləri ilə tanış olandan sonra həmin məhsulları öz bazarlarında da görmək istəyirlər. Beləliklə, Azərbaycan məhsullarının tanınma prosesi başlanıb”.
M.İbrahimov onu da vurğuladı ki, kənd təsərrüfatı məhsulları bazarının miqyasının genişlənməsi halı yaşanır.
Son zamanlar tək yerli mediada deyil, eyni zamanda, xarici mətbuatda da Azərbaycanın aqrar məhsulları haqqında məlumatlar yayılır: “Bu tip məlumatlar Azərbaycana və ölkəmizdə istehsal olunan kənd təsərrüfatı məhsullarına böyük marağın yaranmasına səbəb oldu. Beləliklə, xarici sahibkarlar Azərbaycanda istehsal olunan məhsulları ölkəmizdən alıb öz bazarlarına çıxarırlar. Nəticə isə onları qane edir”.
Günel CƏLİLOVA
