Aydın Hüseynov: “Ermənistan stabil ölkə olmadığı üçün ora xarici investisiya qoyulmur və bu kimi faktlar nəticəsində Ermənistan iqtisadiyyatı yaxın müddət ərzində daha da bərbad hala düşəcək”
Beynəlxalq Valyuta Fondu Azərbaycanı Cənubi Qafqazın ən varlı ölkəsi, Ermənistanı isə kasıb ölkəsi elan edib. Bu barədə Beynəlxalq Valyuta Fondunun (BVF) müxtəlif dövlətlərin iqtisadiyyatının təhlilinə həsr edilən hesabatında bildirilir.
Hesabatda ölkələr adambaşına düşən ÜDM-lərə görə sıralanıb. Belə ki, Azərbaycanda bu göstərici 18,04 min dollar təşkil edir və ölkəmiz reytinq cədvəlində 192 ölkə arasında 81-ci yerdədir. Ermənistanda isə adambaşına düşən ÜDM 10 min dollar təşkil edir. İşğalçı ölkə reytinq cədvəlində 113-cü yerdə qərarlaşıb.
BVF-nin açıqladığı hesabatda Azərbaycanı regionun ən varlı, Ermənistanı isə kasıb ölkəsi élan etməsi ölkə iqtisadiyyatının inkişafının dünyaya bəyan olunmasından irəli gəlir.
Millət vəkili Aydın Hüseynov “Bakı-Xəbər”ə açıqlamasında qeyd etdi ki, Beynəlxalq Valyuta Fondunun araşdırması tam həqiqəti əks etdirir: “Ümumiyyətlə, Azərbaycan qlobal iqtisadi böhrandan çox ciddi zərər görmədi. Etiraf edək ki, artıq dünyanın özündə belə iqtisadi böhran zəifləyib. Məlumat üçün bildirim ki, 2016-cı ildə Prezident İlham Əliyevin rəhbərliyi ilə iqtisadiyyatın növbəti hədəflərinin müəyyən olunması üçün “Strateji Yol Xəritəsi” tərtib olundu. 2017-ci ildə əldə olunan nailiyyətlər bir daha onu göstərdi ki, Azərbaycan qeyri-neft sektorunu inkişaf etdirməklə çox böyük islahatlar, layihələr həyata keçirdi. Ən əsası isə ixracyönlü, rəqabətqabiliyyətli məhsulların dünya bazarına çıxarılması istiqamətində böyük addımlar atılmağa başladı. Kənd təsərrüfatı, turizm, texnologiya və kommunikasiya və digər sahələrdə böyük nailiyyətlər əldə olundu. Neftin satış qiymətinin stabilləşməsi, eyni zamanda, qeyri-neft sektorunun inkişaf etməsi artıq Azərbaycan iqtisadiyyatının tamamilə dayanıqlı, yeni bir mərhələyə qədəm qoymasına səbəb olub. Bakı-Tiflis-Qars dəmir yolu, TANAP - TAP layihəsi artıq reallaşmaq üzrədir. Beləliklə, Azərbaycan iqtisadiyyatı inkişaf etmək üzrədir”.
Ermənistan iqtisadiyyatının çöküş dövrü yaşamasına gəlincə, millət vəkili bildirdi ki, düşmən ölkənin iqtisadiyyatı tamamilə iflasa uğrayacaq: “Ermənistan yaxın müddət ərzində çox ciddi böhranla qarşılaşacaq. İlk olaraq bildirim ki, Ermənistanın bütün gəlirli sahələri Serj Sarkisyanın əlində cəmlənmişdi. Artıq Sarkisyan hakimiyyətdən getdiyi üçün öz kapitallarını ölkədən çıxarıb. Həmçinin, Ermənistan stabil ölkə olmadığı üçün ora xarici investisiya qoyulmayacaq. Xüsusi olaraq qeyd edim ki, Ermənistan bütün regional layihələrdən təcrid olunub. Ölkənin gələcək inkişafı isə region layihələri ilə bağlıdır. Bütün bunlar Ermənistan iqtisadiyyatının yaxın müddət ərzində daha da bərbad hala düşəcəyindən xəbər verir”.
Günel CƏLİLOVA
