Qadir Bayramlı: “Bölgələrdə fermerlərin maarifləndirilməsində əhəmiyyətli rol oynaya bilər”
Son illər qeyri-neft sektoruna göstərilən yüksək diqqət nəticəsində iqtisadiyyatın prioritet istiqamətlərindən olan aqrar sahə yeni inkişaf mərhələsinə qədəm qoyub. Ölkədə ərzaq təhlükəsizliyinin təmin edilməsi və regionların inkişafı istiqamətində bir sıra uğurlar qazanılıb.
Aqrar sahədə aparılan uğurlu islahatlar nəticəsində bir sıra strateji məhsullara olan tələbatın yerli istehsal hesabına tam ödənilməsinə, ölkənin ərzaq təhlükəsizliyində xarici bazardan asılılığın azalmasına, ixracyönümlü məhsulların istehsal həcmini artırmaqla regionların inkişafına nail olunub. Bu istiqamətdə görülən işlərin davamı olaraq Prezident İlham Əliyev “Azərbaycan Respublikası Kənd Təsərrüfatı Nazirliyinin tabeliyində Aqrar Tədqiqatlar Mərkəzinin yaradılması haqqında” Fərman imzalayıb. Fərmana əsasən, aqrar sahədə elmi-tədqiqat institutlarının fəaliyyətinin gücləndirilməsi, təhlil, qiymətləndirmə və proqnozlaşdırmanın aparılması, aqrar sənaye kompleksi üzrə müxtəlif xidmətlərin, o cümlədən dövlət sifarişlərinin yerinə yetirilməsi, kənd təsərrüfatının inkişafı ilə bağlı məlumat bazasının yaradılması, proqram və layihələrin hazırlanması, sahənin strateji planlaşdırılmasının və innovativ inkişafının təmin edilməsi məqsədilə Kənd Təsərrüfatı Nazirliyinin tabeliyindəki Kənd Təsərrüfatının İqtisadiyyatı Elmi-Tədqiqat İnstitutu publik hüquqi şəxs statusu olan Aqrar Tədqiqatlar Mərkəzinə çevrilmə yolu ilə yenidən təşkil ediləcək.
Ümumilikdə, belə mərkəzin yaradılması Azərbaycanda aqrar sahənin inkişafına nə kimi müsbət təsir göstərəcək?
Məsələyə münasibət bildirən Azərbaycan Dövlət İqtisad Universitetinin dosenti Qadir Bayramlının sözlərinə görə, Aqrar Tədqiqatlar Mərkəzinin yaradılması vacib məsələlərdən biridir: “Çünki bu, ölkədə kənd təsərrüfatının inkişafı üçün təməl şərtlərdən biridir. Birincisi, kənd təsərrüfatı istehsalında intensiv metodlara keçmək üçün aqrar tədqiqatlar önəmlidir. İkincisi, torpaqların qiymətləndirilməsi, invertarizasiyası baxımından bu çox vacibdir. Çünki hazırda Azərbaycanda olan torpaqların müasir metodlarla invertarizasiyası ancaq elmi araşdırmaların inkişafı hesabına mümkündür. Bu baxımdan hesab edirəm ki, yeni yaradılan Aqrar Tədqiqatlar Mərkəzi torpaqlarımızın qiymətləndirilməsi baxımından müsbət fayda verəcək. Üçüncüsü, ölkənin kənd təsərrüfatı üçün həyati əhəmiyyətə malik olan su qaynaqlarının qiymətləndirilməsi, onlardan səmərəli istifadə edilməsi üçün aqrar tədqiqatlara ehtiyac var. Digər tərəfdən, aqrar sahədə aparılan tədqiqatlar ölkədə ekoloji cəhətdən təmiz məhsulların yetişdirilməsinə müsbət təsir göstərir. Nəzərə almaq lazımdır ki, kənd təsərrüfatı məhsullarının ixracında böyük rəqabət var. İdxalçı ölkələr əsasən ekoloji cəhətdən təmiz olan məhsullara üstünlük verirlər. Belə məhsullar yetişdirmək üçün də elmi metodlara önəm verilməlidir. Yəni məhsulun becərilməsi zamanı gübrədən norma daxilində istifadə etmək lazımdır. O baxımdan düşünürəm ki, sözügedən məsələlərdə Aqrar Tədqiqatlar Mərkəzinin rolu önəmli olacaq. Hesab edirəm ki, sözügedən mərkəz ölkədə kənd təsərrüfatı sahəsində ayrı-ayrı elmi-tədqiqat mərkəzlərinin koordinasiyası funksiyasını yerinə yetirə bilər. Bu çox əhəmiyyətli məsələdir. Digər tərəfdən, kənd təsərrüfatı sahəsindəki elmi tədqiqatların nəticələrinin tətbiqini asanlaşdırar. Həmçinin, aqrar sahədə olan kadrlardan daha səmərəli istifadə olunmasına kömək edəcək. Ən nəhayət, bölgələrdə fermerlərin maarifləndirilməsində əhəmiyyətli rol oynaya bilər. Bu baxımdan hesab edirəm ki, sözügedən qərar kənd təsərrüfatının inkişafına öz töhfəsini verəcək”.
Vidadi ORDAHALLI
