Rəsul Cahangirli: “Bunun həm də çox böyük geosiyasi əhəmiyyəti var”
Azərbaycanda Səudiyyə Ərəbistanının “Saudi Aramco” neft şirkətinin regional ofisi şirkətin Mərkəzi Asiyada fəaliyyətinin idarəetmə platforması kimi xidmət edəcək. Şirkətdən verilən məlumata görə, dünyada ən iri neft istehsalçısı olan “Saudi Aramco” şirkəti Bakıda “Aramco Overseas Company Azerbaijan LLC” (Aramco AOC Azerbaijan) regional nümayəndəliyini qeydiyyata alıb.
Şirkətdən qeyd ediblər ki, “Aramco AOC Azerbaijan”ın fəaliyyəti əsasən neft-qaz, emal və onlarla bağlı xidmətlərin göstərilməsi üzərində cəmləşəcək, Mərkəzi Asiyada inteqrasiya olunmuş energetika və kimya sənayesi sektorunda əməkdaşlıq üçün imkanları üzə çıxarmaq üçün yeni biznesin inkişafı üzrə perspektivləri qiymətləndirəcək: “Saudi Aramco” neft-qaz sahəsində, həm quruda, həm də dəniz şelfində kəşfiyyat və hasilat daxil olmaqla çoxillik təcrübəyə malikdir. İndi bu zəngin təcrübədən qazanc əldə etmək və bunu Azərbaycanda və Mərkəzi Asiyada strateji tərəfdaşlıq səviyyəsinə çatdırmaq zamanı gəlib. Prezident İlham Əliyevin rəhbərliyi altında ölkədəki sabitliyi, hakimiyyətin neft sənayesinə, energetikanın inkişafına və sürətli iqtisadi artıma hərtərəfli yardım göstərməsini nəzərə alaraq biz Bakıda ofis açmağı qərara aldıq”.
Məlumat üçün qeyd edək ki, mərkəzi ofisi Səudiyyə Ərəbistanının Zəhra şəhərində yerləşən şirkət ilk neft quyusunu 1935-ci ildə qazıb. Şirkətin 261 milyard barrel nefti var və bu rəqəm ABŞ-ın ən böyük neft şirkəti “ExxonMobile”in həcmlərindən 10 dəfə çoxdur. Dünyada hasil edilən hər 8 barrel neftdən birini “Saudi Aramco” çıxarır. Şirkətdə 51 min Səudiyyə Ərəbistanı vətəndaşı, 10 min 254 nəfər isə əcnəbi çalışır.
Belə bir şirkətin regional ofisinin Bakıda yerləşməsi və o cümlədən Mərkəzi Asiyada şirkətin bütün növ fəaliyyətinin həyata keçirilməsini ekspertlər necə dəyərləndirirlər?
Məsələyə münasibət bildirən ekspert Rəsul Cahangirlinin sözlərinə görə, bu cür böyük neft şirkətinin regional nümayəndəliyinin Bakıda yerləşməsi Azərbaycana verilən önəmin göstəricisidir: “Mərkəzi Asiya ilə bağlı layihələrin Bakıdan koordinasiya edilməsi sıradan bir hadisə deyil. “Saudi Aramco” şirkəti Azərbaycanın bu sahədə əldə etdiyi nailiyyətlərin fərqindədir. Ona görə də sözügedən şirkət həm Azərbaycanla, həm də ölkəmiz vasitəsilə Mərkəzi Asiya ölkələri ilə işləməkdə maraqlıdır. Azərbaycanın bu sahədə əldə etdiyi nailiyyətləri öyrənmək istəyirlər. Bu həm neft-qaz sahəsinə, həm də digər sahələrə ərəb sərmayəsinin cəlb olunmasında mühüm rol oynayacaq. Çünki Körfəz ölkələrinin sərmayə qoyuluşu imkanları çox genişdir və onlar üçün də yeni bazarların müəyyənləşdirilməsi, yeni bazarlara sərmayələrin yönəldilməsinə ehtiyac var. Azərbaycan Körfəz ölkələri üçün məhz bu kontekstdən yeni bazar kimi qiymətləndirilə bilər. Nəticə etibarilə bu, Azərbaycan iqtisadiyyatına ərəb investisiyalarının cəlb edilməsi üçün əlverişli imkan yaradır. Hesab edirm ki, bunun Azərbaycana təkcə iqtisadi faydası dəyməyəcək. Bunun həm də çox böyük geosiyasi əhəmiyyəti var. Çünki Azərbaycanın regionda böyük tranzit imkanları var. Bu da iqtisadi və ticarət əlaqələri üçün böyük imkanlar açır”.
Vidadi ORDAHALLI
