Fikrət Yusifov: “Qeyri-neft sektorunun inkişafı istiqamətində hökumətin bilavasitə dəstəyi ilə...”
Məlum olduğu kimi, Bakıda Yüksəkgərginlikli Avadanlıqlar Zavodu fəaliyyətə başlayıb. Zavodun açılışında Prezident İlham Əliyev iştirak edib.
Qeyd edək ki, dövlətin güzəştli kreditlərindən istifadə etməklə Qaraçuxur qəsəbəsində inşa olunan İriqabaritli Transformatorlar Zavodu 2016-cı ildə Prezident İlham Əliyevin iştirakı ilə istifadəyə verilib. Həmin ərazidə Yüksəkgərginlikli Avadanlıqlar Zavodunun təməli qoyulub. Ümumi investisiya dəyəri 29,7 milyon manat olan zavodun yaradılmasına İqtisadiyyat Nazirliyinin Sahibkarlığa Kömək Milli Fondu tərəfindən 10 milyon manat güzəştli kredit ayrılıb. Bundan başqa, müəssisəyə nazirlik tərəfindən investisiya təşviqi sənədi verilib ki, nəticədə 4,2 milyon manat vəsaitə qənaət olunaraq investisiya kimi layihənin icrasına yönəldilib. Müasir texnologiyalar əsasında yaradılan bu zavod inkişaf etmiş ölkələrin istehsalı olan avadanlıqlarla təchiz edilib.
Ümumi sahəsi 18 min kvadratmetr olan zavod 7 istehsal sahəsindən - bərk izolyasiya, kabel və mis anod istehsalı, əritmə və ekstruziya, mexaniki emal, yığma və sınaq sahələrindən ibarətdir. Zavodda illik 5 min 300 ədəd müxtəlif növ elektrotexniki avadanlıqların, o cümlədən güc transformatorları üçün izolyasiya detalları, yüksəkgərginlikli vakuum və eleqaz tipli açarlar, ayırıcılar, torpaqlayıcılar, ölçü transformatorları, kabeller və transformator buraxılışında istifadə olunan digər hissələrin istehsalı mümkündür. Zavodda 310 yeni iş yeri açılıb.
Bütün bunların fonunda, sözügedən zavod Azərbaycan iqtisadiyyatının inkişafında necə rol oynayacaq?
Məsələyə münasibət bildirən iqtisad elmləri doktoru, professor Fikrət Yusifovun sözlərinə görə, yeni zavodun böyük əhəmiyyəti var: “Qeyri-neft sektorunun inkişafı istiqamətində hökumətin bilavasitə dəstəyi ilə yaradılan bu zavodda istehsal olunan məhsullar daxili bazarın tələbatını ödəməklə yanaşı, həm də ixrac olunacaq. Ümumi investisiya dəyəri 29,7 milyon manat olan zavodun yaradılmasına Sahibkarlığa Kömək Milli Fondu tərəfindən 10 milyon manat güzəştli kredit ayrılıb, müəssisənin tikintisi üçün investisiya təşviqi sənədi verilib ki, bu da 4,2 milyon manat vəsaitə qənaət olunması deməkdir. Bu müəssisə “ATEF Şirkətlər Qrupu”nun innovativ və yüksək texnologiyalar əsasında rəqabətqabiliyyətli sənaye məhsulları istehsal edən müəssisələrindən biridir. Ümumi sahəsi 18 min kvadratmetr olan zavod 7 istehsal sahəsindən ibarətdir. Zavodda müxtəlif növ elektrotexniki avadanlıqlar istehsal olunacaq ki, bununla həm daxili tələbat ödəniləcək, həm də sözügedən məhsullar ixrac olunacaq. Sözügedən məhsulların istehsalı üçün tələb olunan xammal və köməkçi detalların istehsalının təşkili isə buraxılan məhsulların maya dəyərinin aşağı düşməsinə, idxaldan asılılığın azalmasına və ölkədən valyuta axınının qarşısının alınmasına səbəb olacaq. Adıçəkilən zavod ölkə iqtisadiyyatına öz töhfəsini verməklə yanaşı, ixrac olunacaq məhsullar hesabına valyuta gəlirləri də artacaq. Bu da əlbəttə ki, Azərbaycan iqtisadiyyatının xeyrinədir. Çox yaxşı haldır ki, Azərbaycanda bu kimi zavodların sayı ilbəil artır”.
Vidadi ORDAHALLI
