Əli Əlirzayev: “Tekstil sənayesinin inkişafı üçün bu sahə rüsumdan azad olunmalıdır”
Moda gəlirli sahələrdən biri sayılır. Mütəxəssislərin fikrincə, məşhur geyim brendinə tək istehsal olunduğu ölkədə deyil, əcnəbi ölkələrdə də böyük tələbat olur.
Azərbaycanın da bir sıra məşhur geyim brendləri var. Ancaq o geyimlər bütün dünya ölkələrində tanınmır. Bu sektoru inkişaf etdirmək üçün Azərbaycan Tekstil İstehsalçıları və İxracatçıları Assosiasiyası ölkədə geyim istehsalını təşkil etmək üçün məşhur xarici şirkətləri cəlb etmək niyyətindədir.
Bu barədə assosiasiyanın sədri Mehriban Axundova jurnalistərə açıqlamasında qeyd edib ki, bu, istehsal olunan məhsulun maya dəyərinin azaldılması məsələsinin həll olunmasından sonra həyata keçirilə bilər: "Bu gün Azərbaycanda tekstil istehsalının maya dəyərinin azaldılması, hazır məhsulun ortalama dünya səviyyəsinə çatdırılması məsələsi aktualdır. Söhbət istənilən növ geyimdən, xüsusilə trikotaj və uşaq geyimlərindən gedir. Bunu düymə, yapışqan kimi materialların idxalına gömrük rüsumlarının azaldılması hesabına etmək olar. Rüsumların azaldılması tikiş istehsalının inkişafına gətirib çıxaracaq. Eyni zamanda bazara sərfəli qiymətlərlə Pakistan, Türkiyə və Çindən geyim gətirilir ki, bunlar da sintetik materiallardan hazırlanır”. M.Axundova onu da bildirib ki, bu məsələnin həll olunması məqsədilə Assosiasiya Azərbaycan hökumətinə müraciət edəcək.
Məşhur geyim brendlərinin istehsalının təşkil olunmasına münasibət bildirən iqtisadçı-ekspert Əli Əlirzayev qəzetimizə açıqlamasında bildirdi ki, istehsal olunacaq geyimlər xarici bazara çıxarılması üçün bazara uyğun şəkildə hazırlanmalıdır: “Hər bir ölkənin özünəməxsus geyim tərzi, geyim zövqu var. Hər bir ölkənin geyim tərzi araşdırılmalıdır. Həmçinin, geyimlərin qiyməti də münasib olmalıdır ki, bazarda öz yerini tapa bilsin. Eyni zamanda, istehsal olunacaq geyimlər yüksək keyfiyyətə malik olarsa, alıcılar həmin brendə üstünlük verər”.
Həmsöhbətimiz hesab edir ki, geyim istehsalçıları xarici ölkələrin şirkətləri ilə əməkdaşlıq edərlərsə, Azərbaycan geyiminin istehsal texnologiyası dəyişər: “İnnovasiya xarakterli maşınları almaq yolu ilə istehsal olunan məhsul yüksək keyfiyyətə malik olar. Həm parça, həm geyim üçün lazım olan aksesuarlar və hazırlanacaq dəst müasir standartlara cavab verər. Belə olarsa, Azərbaycan geyimi dünya səviyyəsinə çıxarılar. Yerli və xarici geyim brendləri bir yerdə əməkdaşlıq edərlərsə, Azərbaycan geyimləri rahat şəkildə xarici bazara çıxar”.
Ə.Əlirzayev onu da vurğuladı ki, tekstil sənayesinin inkişafı üçün bu sahə rüsumdan azad olunmalıdır. Bu sahənin rüsumdan azad olunması geyimlərin qiymətinə də təsir edəcək.
Günel CƏLİLOVA
