Qadir Bayramlı: “Bu sahədə dövlət və özəl sektorun bərabər əməkdaşlığına ehtiyac var”
Beynəlxalq Maliyyə Korporasiyası Azərbaycana aqrobiznesin rəqabət qabiliyyətini artırmağa kömək etməyə hazır olduğunu bəyan edir. Bu barədə media nümayəndələrinə BMK-nın Cənubi Qafqaz üzrə regional meneceri Yan van Bilsen bildirib.
O qeyd edib ki, rayonlarda əhalinin təxminən 40 faizinin iş yeri və gəlirlərini təmin edən kənd təsərrüfatı sektoru maliyyələşdirilməyə çıxışın genişləndirilməsi vasitəsilə daha məhsuldar və mənfəətli ola bilər: “Buna kömək etməyin yollarından biri kənd təsərrüfatı ilə bağlı hava və qiymət dəyişikliyi kimi risqləri yüngülləşdirən aqrosığortadır. Avropa və Mərkəzi Asiyada aqromaliyyələşdirmə üzrə məsləhətçi layihə fermerlərlə müxtəlif çöl tədqiqatlarının aparılması, kənd təsərrüfatı sığortası haqqında qanunun işlənməsi, kənd təsərrüfatı sığortası sisteminin konsepsiyasının işlənib hazırlanması üçün Azərbaycan hökuməti ilə işləyib".
Azərbaycanda aqrar sahənin tək dövlət tərəfindən deyil, sığorta şirkətləri tərəfindən sığorta olunmasına münasibət bildirən Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, aqrar sığorta kənd təsərrüfatrının ən zəif nöqtələrindən biri sayılır: “Aqrar sığorta tətbiq edilmədiyi zaman fermerlərdə stimul yaranmır və onların işlərinə inamı da olmur. Bu səbəbdən də aqrar sığortanın tətbiqi olduqca əhəmiyyətli məsələdir. İnkişaf etmiş ölkələrin əksəriyyətində aqrar sığorta həm dövlət, həm də özəl şirkətlər tərəfindən həyata keçirilir. İnkişaf etmiş ölkələrdə olduğu kimi, bizim ölkədə də aqrar sığorta dövlətlə bərabər özəl şirkətlər tərəfindən həyata keçirilərsə, sığorta sahəsində böyük inkişaf baş verə bilər. Ancaq bunun üçün əsaslar hazırlanmalıdır. İlk öncə xarici təcrübə araşdırılıb öyrənilməlidir. Nəzərə almaq lazımdır ki, Azərbaycanın aqrar sığorta sahəsində təcrübəsi zəifdir. Bunun üçün inkişaf etmiş ölkələrin təcrübəsini öyrənib tətbiq etmək lazımdır. Eyni zamanda, bu sahədə kadrların hazırlanmasına ehtiyac var”.
Həmsöhbətimiz hesab edir ki, aqrar sığortanın inkişafı istiqamətində əsas yük dövlətin üzərinə düşməlidir: “Onu da nəzərə almaq lazımdır ki, ölkənin sığorta şirkətləri hələ lazım olan səviyyədə deyillər. Özəl şirkətlərin bu işə cəlb edilməsinin yolları tapılmalıdır. Bu sahədə dövlət və özəl sektorun bərabər əməkdaşlığına ehtiyac var”.
Günel CƏLİLOVA
