Aydın Hüseynov: “Onlar çox gözəl fərqindədirlər ki, Azərbaycan regionun dinamik inkişaf edən ölkəsidir”
Qazaxıstan-Çin Sərhədyan Əməkdaşlıq Xorgos Beynəlxalq Mərkəzi (ICBC) Azərbaycan biznesi ilə əməkdaşlıq istiqamətlərini açıqlayıb.
Bu barədə mətbuata açıqlama verən “Xorgos” ICBC-nin prezidenti Kaxarman Jazinin sözlərinə görə, iqtisadi əlaqələrin qurulması üçün Mərkəzin nümayəndə heyəti 2018-ci ilin sonuna qədər Azərbaycana səfər edə bilər: “Azərbaycana səfər etmək üçün dəvət gəlib və biz bu il belə bir görüşün baş tutacağına ümid edirik. Qazaxıstan belə bir əməkdaşlıqda maraqlıdır”.
O, iqtisadi və ticari əlaqələrin qurulmasının real imkanlarına inandığını vurğulayıb və azərbaycanlı iş adamlarını “Xorgos” ICBC-yə səfərə dəvət edib: “Azərbaycan MDB ölkələrini bir sıra qida məhsulları ilə təmin etməkdə aparıcı mövqe tutur. Mərkəzlə Azərbaycan arasında ticarət, turizm sahəsində qarşılıqlı faydalı əməkdaşlıq qurmaq olar”.
Məlumat üçün qeyd edək ki, “Xorgos” ICBC iki dövlətin - Qazaxıstan və Çinin nadir layihəsidir. Ticarət, iqtisadi, turizm və investisiya əməkdaşlıq mərkəzidir. Bu, iki dövlətin sərhəddəki ərazilərində yerləşən və dövlət sərhədindən keçən xüsusi bir keçidlə əlaqəli Qazaxıstan və Çin birləşmələrindən ibarətdir.
Jazininin sözlərinə görə, hazırda 15 investisiya şirkəti mərkəzin əsas ərazisində 438,9 milyard tenge investisiya qoyaraq, 35 obyektin tikintisi ilə məşğul olur. Bununla yanaşı, bir sıra tikiləcək obyektlərin layihəsi hazırlanıb. Bu obyektlərin tikintisi bu ilin yayında başlayacaq. İnvestisiyaların həcmi 12,3 milyard tenge təşkil edir.
Ümumilikdə, sözügedən mərkəzlə Azərbaycanın iqtisadi əlaqələr qurması perspektivini ekspertlər necə dəyərləndirirlər?
Məsələyə münasibət bildirən millət vəkili Aydın Hüseynovun sözlərinə görə, prinsipcə, bununla bağlı bir sıra imkanlar var: “Nəzərə almaq lazımdır ki, bununla bağlı Azərbaycanın böyük potensialı var. Xüsusən də Qaradağ rayonunun Ələt qəsəbəsində fəaliyyətə başlayan Yeni Bakı Beynəlxalq Dəniz Ticarət Limanı çox böyük imkanlar açır. Çünki 5 Xəzəryanı dövlətlərdən biri də Qazaxıstandır. Dəniz yolu ilə bu istiqamətdə ticarət əlaqələrini genişləndirmək mümkündür. Yeni dəniz limanı da ən müasir səviyyədə qurulub və ticarət üçün tələb olunan bütün imkanlara cavab verir. Bununla yanaşı, onu da nəzərə almaq lazımdır ki, Bakı-Tiflis-Qars dəmir yolu artıq fəaliyyətdədir. O baxımdan hesab edirəm ki, sözügedən istiqamətdə əlaqələrin genişləndirilməsi Qazaxıstan və Çinlə iqtisadi əməkdaşlığın inkişafına töhfə verəcək. Düzdür, Azərbaycan Qazaxıstanla çox yaxşı münasibətlərə və əlaqələrə malikdir. Ancaq Azərbaycanın Qazaxıstanın və Çinin birgə layihəsində iştirakı əlavə yeni imkanlar aça bilər. “Xorgos” ICBC Azərbaycanın iqtisadi perspektivini yüksək dəyərləndirdiyi üçün ölkəmizi də bu layihəyə cəlb etmək istəyir. Onlar çox gözəl fərqindədirlər ki, Azərbaycan regionun dinamik inkişaf edən ölkəsidir. Azərbaycan regionda sürətlə enerji və nəqliyyat mərkəzinə çevrilir. Bu, ölkənin iqtisadi inkişafı baxımından böyük perspektivlər vəd edir. Bütün bunların sayəsində bizim iqtisadi əlaqələrimiz daha da genişlənəcək. Nəzərə almaq lazımdır ki, ümumilikdə, bizim Çinlə iqtisadi əlaqələrimiz daha da genişlənir. Bu kimi layihələrin timsalında iqtisadi əlaqələrin intensivləşməsi bizim də maraqlarımıza uyğundur. Ona görə də hesab edirəm ki, bu istiqamətdə iqtisadi əlaqələrin genişləndirilməsinin perspektivi var”.
Vidadi ORDAHALLI
