Pərviz Heydərov: “… son zamanlar manat-dollar məzənnəsindəki stabilliklə bağlıdır”
Açıqlanan statistik rəqəmlərə əsasən, Mərkəzi Bankın valyuta ehtiyatları təqribən 20 faiz artıb. Bu ilin aprelində Azərbaycan Mərkəzi Bankının sərəncamında olan valyuta ehtiyatları ötən ilin eyni dövrü ilə müqayisədə 846,5 milyon dollar (18,3 faiz) artaraq 5465,8 milyon dollara çatıb.
Bu barədə Mərkəzi Bankın hesabatında məlumat verilir. Bildirilir ki, bir ay ərzində bankın valyuta ehtiyatları 42,2 milyon dollar azalıb. Ötən il ərzində Mərkəzi Bankın valyuta ehtiyatları 1,36 milyard dollaradək və ya 34,2 faiz artıb.
Mərkəzi Bankın valyuta ehtiyatlarının artması səbəbləri barədə danışan İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, Mərkəzi Bankın rəsmi valyuta ehtiyatları 2014-cü ilə qədər 15 milyard ABŞ dollarından çox təşkil edirdi: “Neftin qiyməti aşağı düşməyə başlayandan sonra valyuta bazarından gərginlik yarandı. Həmin ilin dekabr ayında Mərkəzi Bank ilk dəfə olaraq valyuta bazarına dollarla müdaxilə etmək məcburiyyətində qaldı. Bunu etməkdə məqsəd isə manatın məzənnəsinin dollara münasibətdə sabitliyini qoruyub saxlamaq idi. Məlumdur ki, həmin ərəfədə manat 1 dollara görə 78 qəpik səviyyəsində idi. Uzun illər bu dəyişməz olaraq qaldı. Neftin qiyməti düşəndən sonra Mərkəzi Bank valyuta bazarına müdaxilə etməyə başladı. Bu tendensiya 2015-ci il ərzində də davam etdi. Həmin il 2 dəfə manatın məzənnəsi xarici valyutaya nisbətən dəyişdi. Bununla yanaşı, Mərkəzi Bank tərəfindən valyuta bazarına müdaxilə prosesi davam etdi. Nəticədə bir ilin ərzində Mərkəzi Bankın valyuta ehtiyatlarının həcmi 15 milyarddan 5 milyarda endi. 2016-cı ildə isə heç bir devalvasiya baş verməsə belə, manat 15 faiz civarında dollara nisbətdə ucuzlaşdı. Həmin ildə də Mərkəzi Bankın valyuta bazarına müdaxilələri olurdu. Nəticədə 2016-cı ildə Mərkəzi Bankın 1 milyarddan çox valyuta ehtiyatı itirildi. Ötən ilin əvvəlində isə Mərkəzi Bankın valyuta ehtiyatı kritik hədd sayılan 4 milyardı da keçmişdi. Bu çox ciddi siqnal idi. Sevindirici haldır ki, dünyada neftin qiyməti sabitləşdi və ölkə iqtisadiyyatına xarici təsirlərin səviyyəsi endi. Eyni zamanda, yaranmış vəziyyətlə bağlı hökumətin həm daxili valyuta bazarı, həm də digər sahələrlə bağlı gördüyü tədbirlər nəticəsində tənəzzülün qarşısı alındı. Beləliklə, Mərkəzi Bankın valyuta bazarına müdaxilələri səngidi. Bu sabitliyin yaranması manat-dollar məzənnəsindəki stabilliklə bağlıdır”.
Həmsöhbətimizin sözlərinə görə, bir il ərzində Mərkəzi Bankın valyuta ehtiyatının 20 faiz artması gözlənilən idi.
Günel CƏLİLOVA
