Fikrət Yusifov: “Yerli və xarici şopinqsevərlər tək alış-veriş etmirlər, eyni zamanda, həm əylənmək, həm istirahət etmək, həm də gördükləri işdən zövq almaq istəyirlər”
Əhali və turistlərin böyük rəğbətini qazanan Bakı Şopinq Festivalına maraq günü-gündən artır. Bu dəfə alıcılara 800-dən çox mağazada sərfəli alış-veriş imkanı təqdim olunur. Festivala qoşulan mağazalardan yüksək keyfiyyətli geyim, elektronika, məişət texnikası, mebel, ətriyyat və kosmetika, eləcə də digər məhsulları endirimlərlə əldə etmək olar.
Qeyd edək ki, payız festivalında olduğu kimi, bu dəfə də supermarketlər festivalda iştirak edirlər. Festival zamanı endirimlərdən faydalanmaqdan əlavə, “Tax-Free” nişanı olan mağazalardan hər 100 AZN-dən çox alış-veriş edənlər əlavə dəyər vergisinin müəyyən qismini geri ala biləcəklər.
Bəllidir ki, bu festivalda iştirak etməklə rəngarəng və əlverişli fürsətlər qazanmaq mümkündür. Festival həm yerli əhali, həm də turistlər üçün nəzərdə tutulub. İki həftədən çoxdur ki, sosial şəbəkələrdə diqqəti cəlb edən #olabilər! hashtag-i “Bunlar yalnız Bakı Şopinq Festivalında ola bilər” mesajının qısa izahı hesab edilir. Bakı Şopinq Festivalının müştərilərini bu dəfə daha çox şans, daha geniş imkanlar, yeniliklər və saysız hədiyyə gözləyir.
Onu da bildirək ki, üçüncü ticarət festivalını digərlərindən fərqli edən daha bir məqam hər il festival ərzində baş tutan “Festival sürprizləri” adlı stimullaşdırıcı lotereya proqramı bu il ilk dəfə olaraq onlayn formada keçiriləcək. Artıq alıcılar festivala üzv olan mağaza, supermarket və restoranlardan əldə etdikləri alış-veriş çekləri və vergi-hesab fakturaları ilə onlayn lotereyada iştirak edib, elə yerindəcə hədiyyə qazanmaq imkanı əldə edirlər.
Festivalın yeniliklərindən biri də odur ki, alıcılar bir alış-veriş çeki ilə iki dəfə lotereyada iştirak etmək şansı qazanırlar. Onlayn qeydiyyat zamanı dərhal və 31 mayda keçiriləcək tirajlı lotereya ilə müştərilərə iki şans təklif edilir. Tirajlı lotereyada 10000 dəyərli hədiyyə ilə yanaşı, lotereyanın baş sponsoru “Nurgun Motors”dan “Nissan Sunny” avtomobili qazanmaq şansı da sizin ola bilər.
Məlumat üçün qeyd edək ki, ölkə başçısının "Azərbaycan Respublikasında turizmin inkişafı ilə bağlı əlavə tədbirlər haqqında" Sərəncamına əsasən keçirilən Bakı Şopinq Festivalı "Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi"ndə də öz əksini tapıb.
Ticarət festivalında keçirilən lotereya oyunları barəsində fikir bildirən "Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov “Bakı-Xəbər”ə açıqlamasında qeyd etdi ki, Bakı Şopinq Festivalının ölkəmizdə keçirilməsi alış-veriş sevənlərin marağındadır: “Xüsusilə də festivalda lotereya oyunlarının keçirilməsi şopinq həvəskarlarının sevincinə səbəb olur. Alış-verişi daha maraqlı etmək üçün bu tip oyunların keçirilməsi yaxşı haldır”.
Həmsöhbətimiz hesab edir ki, Bakı Şopinq Festivalında stimullaşdırcı loteriya oyunlarının keçirilməsi təqdirəlayiqdir: “Bu tip festivallarda nə qədər çox stimullaşdırıcı lotereya oyunları və ya digər oyunlar keçirilərsə, yerli və xarici turistlər daha çox maraq göstərər. O da bəllidir ki, bir qisim insan əyləncəni sevir. Müxtəlif növ oyunların keçirilməsi insanlar üçün maraqlıdır. Nəzərə almaq lazımdır ki, yerli və xarici şopinqsevərlər tək alış-veriş etmirlər. Onlar eyni zamanda, həm əylənmək, həm istirahət etmək, həm də gördükləri işdən zövq almaq istəyirlər. Həmçinin, alıcıların alış-veriş çeki ilə iki dəfə lotereyada iştirak etmək şansı qazanması insanların şopinqə marağını daha da artırır”.
Günel CƏLİLOVA
