Ramil Osmanlı: “2007-ci ildən etibarən ipotekada faiz dərəcələri dəyişməyib, ancaq bazarda qiymət dəyişikliyi yaşanıb, ipotekanın maksimal məbləği iki dəfədən çox artırılıb”
Xəbər verildiyi kimi, İpoteka və Kredit Zəmanət Fondu vergidən azad edilir. Azərbaycan Prezidenti İlham Əliyev İpoteka və Kredit Zəmanət Fondunun fəaliyyətinin təkmilləşdirilməsi məqsədilə əlavə tədbirlər haqqında Fərman imzalayıb.
Fərmana əsasən, əhalinin mənzil təminatının daha da yaxşılaşdırılması və ipoteka kreditlərinə çıxış imkanlarının artırılması, ipoteka və kredit zəmanət mexanizminin risqlərinin minimallaşdırılması məqsədilə Azərbaycan Respublikasının İpoteka və Kredit Zəmanət Fondu tərəfindən ipoteka kreditləri üzrə təminat verilməsi Qaydası təsdiq edilib.
Nazirlər Kabinetinə Azərbaycan Respublikası İpoteka və Kredit Zəmanət Fondunun vergi öhdəliklərindən azad edilməsi, habelə bu Fərmanın 1-ci hissəsi ilə təsdiq edilmiş Qaydaya uyğun olaraq, Fond tərəfindən təminat üzrə ödəniş edilməsi hallarında borcalanların və müvəkkil bankların vergi öhdəliklərindən azad edilməsi ilə bağlı qanun layihəsini bir ay müddətində hazırlayıb Azərbaycan Prezidentinə təqdim etmək, 2018-ci il yanvarın 1-dən dekabrın 31-dək sahibkarlar tərəfindən banklardan manatla alınan kreditlər üzrə hesablanmış faizlərə görə 2019-2021-ci illərdə subsidiyaların verilməsi üçün tələb olunacaq vəsaitin həcmini Fond ilə birlikdə müəyyənləşdirib, müvafiq illərin dövlət büdcəsi layihələrində nəzərə alınmasını təmin etmək tapşırılıb.
Maliyyə Bazarlarına Nəzarət Palatası isə üç ay müddətində Fondun vəzifələrinin icrası ilə bağlı müvəkkil bankların ipoteka kreditləşməsində, eləcə də kredit zəmanət sisteminin fəaliyyətində aktiv iştirakını təmin etmək üçün banklar üzrə xüsusi iqtisadi tənzimləmə (prudensial) normativlərini və tələblərini müəyyən edib Azərbaycan Prezidentinə məlumat verməlidir.
Maraqlıdır, İpoteka və Kredit Zəmanət Fondunun vergidən azad olunması ipoteka faizlərinə təsir edəcəkmi?
Daşınmaz əmlak məsələləri üzrə ekspert Ramil Osmanlı “Bakı-Xəbər”ə açıqlamasında qeyd etdi ki, vergi öhdəliklərindən azad olunma tam olaraq bəlli deyil. Həmsöhbətimizin sözlərinə görə, ipotekanın faiz dərəcəsi İpoteka və Kredit Zəmanət Fondunun Müşahidə Şurası tərəfindən tənzimlənir: “Hesab etmirəm ki, İpoteka və Kredit Zəmanət Fondunun vergidən azad olunması ipotekanın faiz dərəcəsinə təsir edəcək. Xatırladım ki, 2007-ci ildən etibarən ipotekada faiz dərəcələri dəyişməyib. Ancaq bazarda qiymət dəyişikliyi yaşanıb, ipotekanın maksimal məbləği iki dəfədən çox artırılıb. Bu baxımdan hesab edirəm ki, faiz dərəcələrinin dəyişilməsinə ehtiyac var”.
Ekspertin sözlərinə görə, İpoteka və Kredit Zəmanət Fondunun fəaliyyətinin təkmilləşdirilməsi istiqamətində atılan addımlar, imzalanan sərəncamlar, verilən qərarlar bu məsələnin zəruriliyini ortaya çıxaracaq. Yaxın gələcəkdə Müşahidə Şurası faiz dərəcəsi məsələsinə yenidən baxacaq.
Günel CƏLİLOVA
