Zakir Əhmədov: “Eyni zamanda, istehsalın tənzimlənməsinə müsbət təsir edəcək”
Vergilər Nazirliyində struktur islahatları davam edir. Xəbər verildiyi kimi, Prezidentin “Ölkədə idxal-ixrac əməliyyatlarına nəzarət sisteminin təkmilləşdirilməsi ilə bağlı tədbirlər haqqında” 20 aprel 2018-ci il tarixli Sərəncamından irəli gələn vəzifələrin həyata keçirilməsi məqsədilə Vergilər Nazirliyində yeni struktur - Vergilər Nazirliyi yanında İdxal-ixrac əməliyyatları üzrə nəzarət Departamenti yaradılıb.
Departamentin yaradılmasında məqsəd maliyyə nəzarəti sahəsində uçotun şəffaflaşdırılması, büdcə yığımlarının artırılması, qeyri-neft məhsullarının ixracı üzrə prosedurların sadələşdirilməsi, ixracın həcminin artırılması və bu istiqamətdə dövlətin fiskal siyasətini həyata keçirən orqanlarının fəaliyyətinə dəstəyin verilməsi və idxal-ixrac əməliyyatlarına nəzarət sisteminin təkmilləşdirilməsidir.
Bu arada Vergilər Nazirliyi yanında yeni yaradılan İdxal-ixrac əməliyyatları üzrə nəzarət Departamentinə rəhbər təyin edilib. Azər Oqtay oğlu Məmmədov Vergilər Nazirliyi yanında yeni yaradılan İdxal-ixrac əməliyyatları üzrə nəzarət Departamentinə baş direktor təyin edilib.
O da məlumdur ki, ölkə iqtisadiyyatının inkişafında vacib faktorlardan biri də vergi sisteminin günün tələbləri səviyyəsinə qaldırılmasıdır. Son illər ölkə Prezidentinin səyi nəticəsində bu sahədə bir sıra işlər görülüb. Bu baxımdan yeni departamentin yaradılmasına ekspertlər necə baxırlar?
Məsələyə münasibət bildirən ekspert Zakir Əhmədovun sözlərinə görə, yeni departamentin yaradılması ölkə iqtisadiyyatının inkişafı baxımından çox mühüm qərardır: “Əvvəla neçə vaxtdır Azərbaycan iqtisadiyyatında çox ciddi islahatlar aparılır. Ölkə iqtisadiyyatının qeyri-neft sektoru inkişaf edir. Azərbaycan iqtisadiyyatı son 5 ildə inkişafını davam etdirib. Ümumiyyətlə, 2003-cü ildən Azərbaycan iqtisadiyyatında makro və mikroartım müşahidə olunur. Azərbaycan iqtisadiyyatının 2003-cü ildən sonra artım tempini xarakterizə edən əsas göstərici ÜDM-dir. 2003-cü ildə ÜDM 7,1 milyard manat idisə, 2017-ci ildə 70 milyard manata qədər yüksəlib. Əhalinin gəlir və xərclərinə baxsaq görərik ki, əhalinin gəlirləri 8 milyard manatdan 49 milyard manata qədər yüksəlib. Bu da əhalinin gəlirlərinin artmasından, o cümlədən adambaşına düşən gəlirlərin artmasından xəbər verir. Azərbaycanın sosial-iqtisadi sahədə əldə etdiyi nailiyyətlər həyata keçirilən uğurlu siyasətin nəticəsidir. Ötən dövrdə qeyri-neft sektoru və sahibkarlığın inkişafı ilə bağlı islahatlar həyata keçirildi. 2017-ci ilin sonunda ilk dəfə ondan əvvəlki illə, yəni 2016-cı illə müqayisədə qeyri-neft sektorunda artım 1,5 milyard dollardan çox oldu. Bu da 2016-cı illə müqayisədə 24 faiz artım deməkdir. Postneft dövründə məqsəd iqtisadiyyatın şaxələnməsi, qeyri-neft sektorunun inkişafıdır. Postneft dövrünün islahatları daha inklüziv və balanslı iqtisadiyyatın qurulmasına xidmət edir. Bu baxımdan yeni departament qeyri-neft sektorunda ixracın stimullaşmasına müsbət təsir göstərəcək. Eyni zamanda, istehsalın tənzimlənməsinə müsbət təsir edəcək”.
Vidadi ORDAHALLI
