Rəşad Həsənov: “Ticarət festivalının miqyasının genişlənməsinə ehtiyac var”
May 1-dən etibarən ölkəmizdə 3-cü Bakı Şopinq Festivalına start verildi. Dünəndən başlayan ticarət festivalı mayın 31-dək davam edəcək. Məlumat üçün bildirək ki, 3-cü Şopinq Festivalına Bakıda yerləşən 800-dək mağaza qatılıb.
Alıcılar bu mağazalardan yüksək keyfiyyətli geyim, elektronika, məişət texnikası, mebel, ətriyyat və kosmetika, eləcə də digər məhsulları yalnız Bakı Şopinq Festivalı günlərində mövcud olan xüsusi kampaniya və endirimlərlə əldə edə biləcəklər. Payız festivalında olduğu kimi, bu dəfə də supermarketlər festivala qoşulacaq.
Festival zamanı həm yerli, həm də xarici vətəndaşlar endirimlərdən faydalanmaqdan əlavə, “Tax-Free” nişanı olan mağazalardan etdikləri hər 100 AZN-dən çox alış-veriş zamanı əlavə dəyər vergisinin (ƏDV) müəyyən qismini geri ala biləcəklər. Həmin məbləği nağd və bank hesabına - karta köçürmə yolu ilə əldə etmək mümkündür.
Bütün bunlarla yanaşı, festival zamanı dəyərli hədiyyələrin oynanıldığı lotereya, həftəsonu əyləncəli oyunlar, moda nümayişləri və digər müxtəlif tədbirlərin təşkili də nəzərdə tutulur.
Hər zaman olduğu kimi, yerli əhali və turistlər bu festivalda iştirak etməklə rəngarəng və əlverişli fürsətlər qazanacaqlar.
Qeyd edək ki, dünəndən etibarən başlayan ticarət festivalı Azərbaycanda keçirilən 3-cü Şopinq bayramıdır.
Xatırladaq ki, Azərbaycan Prezidentinin 2016-cı il 1 sentyabr tarixli "Azərbaycan Respublikasında turizmin inkişafı ilə bağlı əlavə tədbirlər haqqında" Sərəncamına əsasən keçirilən festivalın təşkili Mədəniyyət Nazirliyinə həvalə olunub və nazirliyin nəzdində olan Azərbaycan Konqreslər Bürosu tərəfindən həyata keçirilir. Bakı Şopinq Festivalının təşkil olunması ölkə başçısının 2016-cı il 6 dekabr tarixli Fərmanı ilə təsdiq edilmiş "Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi"ndə də öz əksini tapıb.
İlk festival 2017-ci il 10 aprel-10 may tarixləri arasında keçirilib. İkinci festival isə həmin ilin 15 oktyabr – 15 noyabr tarixlərinə baş tutub.
Açıqlanan statistik rəqəmlərə əsasən, ilk Şopinq Festivalının keçirilməsinə cəmi 700 min manat xərclənib. Ümumi büdcə 1 milyon manatı keçməyib. Büdcəyə isə 5,6 milyon manat vəsait daxil olub. Ötən ilin aprel-may aylarında ticarət festivalı zamanı paytaxt Bakıya 70 mindən artıq turist gəlib.
2-ci Şopinq Festivalı zamanı isə Azərbaycana 205 minə yaxın turist gəlib. Həmçinin, Bakı Şopinq Festivalı zamanı ticarət mərkəzlərinə gələn insanların sayı keçən ilin analoji dövrünə nisbətən 12 faiz artıb.
Bakıda keçirilən Şopinq Festivalının illər üzrə gəlirini aydınlaşdırmaq məqsədilə iqtisadçı-ekspert Rəşad Həsənova müraciət etdik. O, “Bakı-Xəbər”ə açıqlamasında qeyd etdi ki, Şopinq Festivalının keçirilməsi turizmin inkişafı baxımından önəmlidir: “Ticarət festivalı həm ölkəyə əlavə turist cəlb edir, həm də ölkə büdcəsinə müsbət təsir göstərir. Turizm festivalının keçirilməsində məqsəd cəlb olunan turistlərin daha çox alış-veriş etməsidir. Belə olan halda, ölkəyə daxil olan vəsaitin həcmi artır. Bu vəsaitlər ölkə iqtisadiyyatının ticarət sektorunda fəaliyyət göstərən digər subyektlərin dövriyyəsini, satışını, hesabını təşviq edir”.
Həmsöhbətimiz onu da vurğuladı ki, Şopinq Festivalı tək güzəştli ticarət məqsədilə keçirilmir, eyni zamanda, əyləncə əhval-ruhiyyəsinin imkanlarını formalaşdırır. Bu da turistin ölkə seçiminə təsir göstərir: “Bildiyimiz kimi, ölkəmizdə 2016-cı ildən başlayaraq turistlər üçün "Tax-Free” sistemi tətbiq edilməyə başlanıb. Festival çərçivəsində tətbiq edilən "Tax-Free” həm turistlər, həm də yerli vətəndaşlar üçün hədəflənib. Təbii ki, proyekt özlüyündə digər əyləncə fəaliyyətləri ilə həm bu istiqamətdə cəlbediciliyi artırır, həm də onların mənfəətini yüksəltməklə alıcılıq imkanlarını artırmaq və xərcləmələrinin həcmini genişləndirmək yolu ilə ölkəyə valyuta cəlb etmək məqsədi daşıyır”.
İqtisadçının fikrincə, turizmin inkişafında sırf aprel-may və oktyabr-noyabr aylarının seçilməsi müsbətdir.
R.Həsənov hesab edir ki, ticarət festivalının miqyasının genişlənməsinə ehtiyac var.
Günel CƏLİLOVA
