Nüsrət İbrahimli: “Bu sahədə inkişaf qeydə alınacaq”
Bundan sonra Bakıda tikinti işi aparmaq istəyən sahibkarlar Bakı Şəhər İcra Hakimiyyətindən (BŞİH) icazəni "bir pəncərə" sistemi vasitəsilə alacaqlar. Bunu qurumun nümayəndəsi Akif Abdullayev media nümayəndələrinə açıqlamasında deyib. O qeyd edib ki, bundan sonra sahibkarların sənədləri müxtəlif əllərdə gəzməyəcək.
Ekspertlərin fikrincə, tikintiyə icazənin “pir pəncərə” sistemi vasitəsilə verilməsi paytaxt ərazisində tikintinin sürətlənməsinə və bu işin sadələşdirilməsinə səbəb olacaq.
Daşınmaz əmlak məsələləri üzrə ekspert Nüsrət İbrahimli qəzetimizə açıqlamasında qeyd etdi ki, tikintiyə icazənin “bir pəncərə” sistemi vasitəsilə verilməsi maya dəyərinin aşağı düşməsinə səbəb ola bilər. Həmçinin, bu proses paytaxt ərazisində tikintinin artmasına da təkan verəcək: “Bəzi tikinti işləri ilkin mərhələdə xərc baxımından oyundan çıxırlar. Ancaq “bir pəncərə” sisteminin tətbiqi iş adamlarının işini asanlaşdıracaq. Beləliklə, həm onların xərcləri azalacaq və bu sahədə inkişaf qeydə alınacaq”.
Həmsöhbətimizin sözlərinə görə, ölkədə tikinti obyektinin inşasına və istismarına icazələrin verilməsi üçün ümumilikdə, üç mərhələ üzrə cəmi 10 prosedur mövcuddur: “Belə ki, sahibkar birinci mərhələdə tikinti obyektinin layihələndirilməsini həyata keçirməlidir. İlkin olaraq “bir pəncərə” vasitəsilə müraciət edildikdən sonra 10 gün ərzində tikinti obyektinin icazə verilən parametrləri barəsində məlumatlar əldə olunur. Daha sonra isə sifarişçinin tapşırığı əsasında müvafiq lisenziyası olan hüquqi və ya fiziki şəxs tərəfindən mühəndis-axtarış işləri aparıldıqdan sonra Fövqəladə Hallar Nazirliyi (FHN) tərəfindən 10 gün ərzində rəy verilir və eyni zamanda, müvafiq lisenziyalı şirkət tərəfindən topoqrafik tədqiqatlar da həyata keçirilir.
İkinci mərhələdə sifarişçi tələb olunan sənədlər və ərizə ilə müraciət etdikdən sonra Bakı Şəhər İcra Hakimiyyəti “bir pəncərə”yə sənədlərin təqdim olunması və yoxlanılmasını təmin edərək icazənin verilməsini həyata keçirir. Ekspertizası tələb olunmayan tikinti obyektləri üçün 15 gün ərzində tikintiyə icazə verilməsinə dair qərar qəbul olunur. Qeyd olunan müddət ərzində icra hakimiyyəti orqanı tərəfindən ekspertizası tələb olunmayan tikinti obyektləri üçün aidiyyəti qurumlardan 5 gün ərzində rəy, eyni zamanda, 10 gün ərzində “ASAN xidmət” mərkəzlərindən bir sorğu vasitəsilə texniki şərtlər əldə olunur. Tikintiyə icazə əldə olunduqda isə Bakı Şəhər İcra Hakimiyyəti tərəfindən qərarın surəti və xüsusi nişan sahibkara təqdim olunur.
Sonuncu mərhələdə isə istismara hazırlıq aktı, sınaq aktları və tikinti layihəsi icra hakimiyyəti orqanına təqdim olunur və 20 gün ərzində istismara icazənin verilməsi haqqında qərar qəbul edilir. İstismara icazə alındıqdan sonra isə tikili “Tikintilərin Dövlət Reyestri”nə daxil olunur, müvafiq olaraq istifadə kodu verilir və daha sonra isə tikinti obyekti “Daşınmaz Əmlakın Dövlət Reyestri”nə daxil olunur və çıxarış əldə edilir”.
Günel CƏLİLOVA
