Bakı müasirliyi ilə yanaşı, gözəlliyi, tarixi siması ilə fərqlənən, dünyanın ən inkişaf etmiş şəhərləri sırasındadır. Bakının qədim tarixi abidələri, yeni qeyri-adi tikililəri və ən əsası, xalqımızın qonaqpərvərliyi ölkəmizə gələn turistləri valeh edir. Təsadüfi deyil ki, bu yaxınlarda “New York Times” qəzetində dünyanın gəzməli olan 52 şəhəri sırasında Bakının da adı qeyd olunur. Küləklər şəhərinin sosial-iqtisadi inkişafının sorağı artıq dünya mediasına da bəllidir.
Elə məhz bu səbəbdən də istər turizm, istərsə də iqtisadi baxımdan paytaxtımız bir çox dünya ölkələrinin diqqət mərkəzindədir.
Vurğulamaq yerinə düşərdi ki, Bakı şəhərinin sosial-iqtisadi inkişafında 12 rayonun hər birinin öz payı və yeri var. Suraxanı rayonu da bu baxımdan çox böyük perspektivləri və üstünlükləri ilə seçilməkdədir. Belə ki, rayonda həyata keçirilən bir çox abadlıq-quruculuq işlərini, müxtəlif təyinatlı obyektlərin tikintisini, sosial-iqtisadi sahədə mövcud olan problemlərin aradan qaldırılmasını yüksək inkişafın göstəricisi kimi qeyd etmək olar. Bu müsbət tendensiyanı yalnız real statistik rəqəmlərlə deyil, həm də şəxsi araşdırma və müşahidələrimə söykənərək əminliklə qeyd edə bilərəm.
Dünyanın müasir şəhərlərindən sayılan Bakının yaraşıqlı guşələrindən birinə çevrilən Suraxanı rayonu ölkəmizin sosial-iqtisadi inkişafına öz töhfəsini verir. Məlumat üçün qeyd edək ki, Suraxanı rayonu paytaxtın cənub-şərqində yerləşir. Rayon ərazisinin 13 km-i Xəzər dənizi ilə əhatə olunub. Rayonun inzibati ərazi vahidliyinə 6 qəsəbə daxildir: Əmircan, Bülbülə, Qaraçuxur, Hövsan, Yeni Suraxanı və Zığ.
Onu da qeyd edək ki, Suraxanı rayonunun hər bir qəsəbəsi öz sosial-iqtisad inkişaf göstəricisinə görə seçilir. Rayon rəhbərliyi dövlət əhəmiyyətli tədbirlərdə müntəzəm iştirak edir. Mütəmadi olaraq məktəblilər arasında keçirilən layihələrlə maraqlanır.
“Ölkəmizi tanıyaq” adlı tur-aksiyasında Suraxanı məktəbliləri də fəal iştirak ediblər. Həmçinin, onu da bildirək ki, rayon rəhbərliyi tərəfindən əlilliyi olan insanlarla bağlı keçirilən tədbirlərlə yanaşı, onlara və veteranlara göstərilən diqqət və qayğı yüksək səviyyədədir. İcra Hakimiyyəti Qarabağ əlillərinə maddi və mənəvi dəstək olur. Bütün bunlar ölkəmizin uğurlu inkişafının təzahürüdür.
Suraxanı rayonunda işsizlik problemi necə həll olunur?
Məhz bu uğurlu strategiya sayəsində Suraxanı rayonunda daim işsizliyin azaldılması yönündə tədbirlər görülür. Suraxanı Rayonu İcra Hakimiyyətinin başçısı İlqar Abbasovun xüsusi diqqəti sayəsində insanlar işlə təmin olunaraq öz ailələri üçün xoş güzəran qurublar. Rayon ərazisində yaradılan istehsal və xidmət sahələri həm də çoxsaylı iş yeri deməkdir. Məhz bunun nəticəsidir ki, son illər Suraxanı rayonunda uğurlu məşğulluq strategiyası həyata keçirilir.
Son illər ölkə başçısı tərəfindən ardıcıl və sistemli şəkildə aparılan məqsədyönlü islahatlar Azərbaycanın bütün regionlarında, o cümlədən Suraxanı rayonunda da iqtisadiyyatın dinamik surətdə inkişafı, insanların rifahının yaxşılaşması, sabitliyin möhkəmlənməsi, yoxsulluğun azaldılması, işsizliyin aradan qaldırılması ilə müşayiət olunub. Suraxanı rayonunda da yeni daimi iş yerlərinin açılması istiqamətində işlər uğurla davam etdirilir. Son 14 il ərzində rayonda 28500-ə yaxın yeni daimi iş yeri açılıb və açılmaqda davam edir.
İcra başçısı çıxışı zamanı qeyd edib ki, Suraxanı rayonunda vətəndaşların yaşayış sahələrinə olan ehtiyacını ödəmək, onların mənzil-məişət şəraitini yaxşılaşdırmaq, müasir tələblərə cavab verən çoxmənzilli binaların tikintisini reallaşdırmaq məqsədilə Nazirlər Kabinetinin müvafiq sərəncamı ilə Hövsan qəsəbəsinin qərb hissəsində Dövlət Neft Şirkətinin daimi istifadəsində olan 20 hektar sənaye təyinatlı torpaq sahəsinin kateqoriyası dəyişdirilərək yaşayış məntəqələrinin torpaqları kateqoriyasına keçirilməklə Azərbaycan Respublikasının Prezidenti yanında Mənzil İnşaatı Dövlət Agentliyinin tabeliyində olan “MİDA” MMC-nin sərəncamına verilib: “Həmin ərazidə 3200 mənzilli, 12 min nəfərin yaşaya biləcəyi 7-10 mərtəbəli binalardan ibarət yaşayış kompleksinin, məktəbin və iki uşaq bağçasının tikintisi nəzərdə tutulub”.
Sakinlərin rahatlığı təmin olunur
Suraxanı rayonunun daha bir üstünlüyü ondan ibarətdir ki, qeyd olunan ərazidə salınan park və digər istirahət mərkəzləri rayonun ümumi mənzərəsini xeyli yaxşılaşdırmaqla yanaşı, sakinlərin rahatlığının təminatıçısıdır.
Suraxanı rayon sakinləri bizimlə söhbətlərində qeyd etdilər ki, İ.Abbasov abadlıq-quruculuq işlərinin, yaşıllaşdırma tədbirlərinin yüksək səviyyədə həyata keçirilməsinə xüsusi diqqət yetirir. Biz yazı hazırlayan zaman Suraxanı rayonu ərazisində yerləşən parkda olduq. Sakinlərlə söhbət edən zaman müəyyən etdik ki, onların hər birinin üzündə rahatlıq hiss olunurdu. Parkda istirahət edənlər arasında Hövsan qəsəbə sakini Yunis Ələkbərov bizimlə söhbətində qeyd etdi ki, rayon rəhbərliyi mütəmadi olaraq rayon sakinləri ilə səyyar görüşlər keçirir: “Görüşlər zamanı sakinlərin problemlərini dinləyir. Sakinlərin problemlərinin həllində köməyini əsirgəmir. Danılmaz faktdır ki, İ.Abbasov aztəminatlı, qayğıya ehtiyacı olan ailələrin problemlərinin həllində onlara köməklik göstərir. Belə ailələr vaxtaşırı ərzaq yardımları, bayram sovqatı ilə təmin edilir. Bayramlar ərəfəsində rayonda mədəni-kütləvi tədbirlər keçirilir".
Y.Ələkbərov onu da bildirdi ki, sakinlərin rahatlığının təmin olunması üçün rayon ərazisində yeni parklar salınıb, şəhid xatirə kompleksləri əsaslı təmir olunub, “Veteranlar guşəsi” tikilib istifadəyə verilib, həmçinin, ahılların istirahətinin təşkili üçün lazımi şərait yaradılıb.
Həmsöhbətimiz onu da vurğuladı ki, rayonda ekoloji problemlərin həllinə xüsusi önəm verilir: “Rayon İcra Hakimiyyətinin təşkilatçılığı və rayon ərazisində yerləşən idarə və müəssisələrin iştirakı ilə hər həftənin şənbə günləri iməciliklər keçirilir, rayonda aparılan ağacəkmə kampaniyalarında 3 saylı doğum evinin ərazisində 700 tut ağacının tingi olmaqla, ümumilikdə 5 min ədəd ağac əkilib. Ümumiyyətlə, rayon sakinləri ağacəkmə kampaniyasında böyük həvəslə iştirak edirlər”.
Məlumat üçün bildirək ki, rayon tikinti-quruculuq işlərinin intensiv getdiyi, iri sənaye potensialının mərkəzləşdiyi məkandır. Sürətlə abadlaşan Suraxanı bu gün sanki yenidən qurulur. Burada təkcə ötən il ərzində öz əhəmiyyətinə görə respublika səviyyəli mühüm layihələr həyata keçirilib və ölkəmizdə gedən artım tempinə uyğun şəkildə bir sıra nailiyyətlər əldə edilib.
Suraxanı rayonunun yolları yenidən təmir olunur
Azərbaycan Respublikasının Dövlət İnvestisiya Proqramına əsasən, “Azəravtoyol” ASC tərəfindən 70 000 nəfərin yaşadığı, Suraxanı rayonunun Zığ, Əmircan və Yeni Suraxanı qəsəbələrini birləşdirən, uzunluğu 12,0 km olan Zığ-Əmircan-Yeni Suraxanı avtomobil yolunun 5,0 kilometrlik hissəsi əsaslı yenidən qurulub, yolboyu zəruri olan yerlərdə hər iki istiqamət üzrə piyadalar üçün yeni səkilər tikilib, avtobus dayanacaqları quraşdırılıb, səth və qrunt sularının ötürülməsi üçün drenaj boruları qoyulub. Küçələrə və məhəllədaxili ərazilərə 16,3 min kvadratmetr asfalt örtüyü çəkilib, Zığ-Hövsan avtomobil yolunun yenidən qurulması işləri davam etdirilib.
İllər öncə Suraxanı rayon sakinləri yolların keyfiyyətindən giley edirdilər. Ancaq son zamanlar bu sahədə aparılan işlər sakinlərin rahatlığına səbəb olur. Artıq sakinlər könül rahatlığı ilə istədikləri məkana gedə bilirlər.
Onu da qeyd edək ki, rayonda məcburi köçkün ailələrinin problemlərinin həlli diqqət mərkəzində saxlanır. Azərbaycan Respublikasının Birinci vitse-prezidenti Mehriban Əliyevanın qaçqın və məcburi köçkün ailələrinin problemlərinin həlli ilə bağlı verdiyi tapşırıqlara əməl olunur. Məcburi köçkünlərin məskunlaşdığı Hövsan qəsəbəsindəki “Gilavar” uşaq bağçasının və H.Quliyev küçəsi 22 ünvanındakı yataqxananın, Bülbülə qəsəbəsindəki “Azərtuneltikinti” şirkətinə məxsus yataqxananın dam örtükləri təmir edilib, rayon ərazisində məcburi köçkünlərin sıx məskunlaşdığı binalarda 426 ailə fərdi sayğacla təmin olunub, yurd-yuvalarından didərgin düşən insanların bir çox məişət problemləri həll edilib.
Əcnəbi turistlərin sevdiyi məkan
Rayonda turizmin inkişafı üçün də imkanlar mövcuddur. Mütəmadi olaraq Mədəniyyət və Turizm Nazirliyi tərəfindən geniş abadlıq, bərpa işlər görülmüş “Atəşgah məbədi” Dövlət Tarix-Memarlıq Qoruğunun sahəsi üç dəfə genişləndirilərək 15 min kvadratmetrə çatdırılıb, burada mədəni turizm baxımından ən müasir standartlar yaradılıb. Xatırladaq ki, rayonda müalicə turizmi üçün potensial var. Yeni Suraxanıdakı 2 saylı bərpa xəstəxanasında kükürdlü su ilə oynaqların, fəqərələrin iltihabı və digər xəstəliklər müalicə olunur. Zığ qəsəbəsindəki “Duzlu göl” dəri və oynaq xəstəliklərinin müalicəsinə kömək edir. Müvafiq investisiya layihələri və infrastruktur işləri həyata keçirilərsə, bu təbii imkanları müalicə turizmi sahəsində əcnəbilər üçün də cəlbedici olan bir məkana çevirmək olar.
Xatırladaq ki, Suraxanı bir çox tarixi şəxsiyyətlər yetirib. Məlumat üçün bildirək ki, Azərbaycan ədəbiyyatı və incəsənətinin bir çox görkəmli simaları məhz bu torpağın yetirməsidir. Böyük tarixçi, ədib Abbasqulu ağa Bakıxanov Əmircanda doğulub. Dünya şöhrətli rəssam Səttar Bəhlulzadə, məşhur satirik Səməd Mənsur, şair Tofiq Bayram, tarixçi, akademik Əlisöhbət Sumbatzadə, SSRİ Xalq artisti Mirzağa Əliyev və s. görkəmli şəxsiyyətlər mədəniyyət tariximizin dəyərli simalarıdır.
Sonda onu da əlavə edək ki, Dövlət Proqramında nəzərdə tutulan tədbirlər Suraxanı rayonunda ardıcıl şəkildə həyata keçirilir və keçiriləcək.
Günel CƏLİLOVA
Yazı Suraxanı Rayon İcra Hakimiyyəti və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim edilir.
