Fikrət Yusifov: “Azərbaycanın real sektorunda istehsal olunan məhsulların ixrac coğrafiyası genişlənir və həcmi də artır” Könül Nuriyeva: “Gürcüstan bazarında tək çaya deyil, bir sıra məhsullara böyük tələbat var”
"Azərbaycan məhsullarına Gürcüstanda böyük maraq və tələbat var. Bu məhsulların sırasında Azərbaycan çayının xüsusi yeri var”. Bu fikirləri jurnalistlərə Qafqaz Xalqları Konfederasiyasının sədri Zaal Kasrelişvili deyib.
Onun sözlərinə görə, Tiflisdə keçirilən çay və bal festivalında bir çox ölkənin, o cümlədən Azərbaycanın istehsal etdiyi məhsullar nümayiş etdirilir: "Burada sərgilənən Azərbaycan çayı iştirakçılar tərəfindən xüsusi maraqla qarşılanır. Bəzi qonaqlar ilk dəfədir ki, samovar çayı içirlər. Mən hərdən Marneuli rayonuna gedirəm və orada Azərbaycan mətbəxinin ləziz yeməyi olan yarpaq xəngəli yeyib, samovar çayı içirəm. Azərbaycanlı dostlarım da mənə tez-tez çay göndərirlər. İstərdim ki, Gürcüstanda Azərbaycan məhsullarının çeşidləri və həcmi artsın”.
Ekspertlər hesab edirlər ki, Azərbaycan məhsullarına tək Gürcüstan deyil, bir sıra ölkələrdə böyük tələbat var.
“Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov “Bakı-Xəbər”ə açıqlamasında qeyd etdi ki, aqrar sahənin inkişafı istiqamətində görülən işlər sayəsində ixrac artıb: “Xüsusilə də tərəvəz məhsulları ilə bağlı ixracatda artım qeydə alınır. Ümumiyyətlə, cari ilin birinci rübü ərzində qeyri-neft sektorundan ixracatda 37 faiz artım baş verib. Bu rəqəmin özü onu deməyə əsas verir ki, Azərbaycanın real sektorunda istehsal olunan məhsulların ixrac coğrafiyası genişlənir və həcmi də artır. Bir sıra ənənəvi bazarlarda tanınmış Azərbaycan məhsullarına hər zaman yüksək tələbat olub. Məsələn, Rusiya bazarında Azərbaycan istehsalı olan pomidorun keyfiyyəti uzun müddətdir ki, tanınır. Bu səbəbdən də rusiyalı bazarda olan zaman pomidor alarkən Azərbaycan istehsalı olan məhsulu alır. Çünki onun keyfiyyətinə və dad göstəricisinə bələddir”.
Həmsöhbətimizin sözlərinə görə, aqrar məhsulların istehsalının və bu fonda ixracın da artması prosesi baş verəcək: “Bəllidir ki, bu gün Azərbaycanda çoxlu sayda istixana qurulub. Mövsümdən asılı olmayaraq, həmin istixanalarda tərəvəz məhsulları yetişdirilir və daha çox ənənəvi bazarlara qeyd olunan məhsullar ixrac olunur. Hesab edirəm ki, ölkə başçısı İlham Əliyevin Kənd Təsərrüfatı Nazirliyinə yeni rəhbər təyin etməsi bu sahəyə yeni bir nəfəs gətirəcək. Bu hal imkan verəcək ki, ixrac potensialı aqrar sektorda daha da yüksəlsin. Belə olan halda, Azərbaycan büdcəsinə ixracdan daha çox valyuta gəlirləri daxil olacaq”.
İqtisadçı-ekspert Könül Nuriyeva qəzetimizə açıqlamasında bildirdi ki, Azərbaycanla Gürcüstan arasında əldə olunmuş razılığa əsasən, ixrac prosesləri sadələşdirilib: “Made in Azerbaijan” adı altında istehsal olunan məhsullar ixracyönümlü və rəqabətə davamlıdırlar. İstər kənd təsərrüfatı, istərsə də tikinti və ya qeyri-neft sektorunun digər sahələrinin məhsullarının keyfiyyəti yüksək və çeşidi çox olduğu üçün, xarici bazarlarda böyük tələbat yaranır. Gürcüstan bazarında tək çaya deyil, bir sıra məhsullara böyük tələbat var. Məsələn, “Synergy Group”un istehsal etdiyi “Qobustan” tikinti materiallarına tələbat yüksəkdir. Eyni zamanda, bir sıra məhsullara da yüksək tələbat yaranıb”.
Həmsöhbətimizin sözlərinə görə, rəqabətqabiliyyətli məhsullara dünya bazarında böyük maraq var.
Günel CƏLİLOVA
