Rəşad Həsənov: “Əhalinin müəyyən qrupuna sosial dəstək olmaq böyük köməklikdir”
Milli Məclisin plenar iclasında “Müflisləşmə və iflas haqqında” Qanuna dəyişikliklərin müzakirəsi zamanı bir sıra məsələlərə toxunulub. O cümlədən, təqaüdçülərin və şəhid ailələrinin kredit borcunun bağlanması təklif olunub. Belə bir təklifi millət vəkili Əli Məsimli səsləndirib.
O qeyd edib ki, milyonlarla insan 2015-ci ilin fevralında və dekabrında baş vermiş iki devalvasiya nəticəsində heç bir günahı olmadan çox ağır zərbə alıb: “Bu günlərdə Azərbaycan Prezidenti gözəl bir fərman imzaladı. Vətən uğrunda şəhid olanların ailələrinə 11 min manat vəsait ayrılması barədə qərar verdi. Elə olmasın ki, Vətən uğrunda şəhid olanlara ayrılan vəsait bank kreditlərinə ödənilsin. Təklif edirəm ki, 3 min dollara qədər borcu olan şəhid ailələrinin, 150 manat təqaüd alan pensiyaçıların banklara olan borcları bağlansın”.
Məsələ ilə bağlı fikir bildirən iqtisadçı-ekspert Rəşad Həsənov “Bakı-Xəbər”ə açıqlamsında qeyd etdi ki, şəhid ailələrinin və təqaüdçülərin kredit borcunun bağışlanması müsbət təklifdir: “Əhalinin müəyyən qrupuna sosial dəstək olmaq böyük köməklikdir. Bu hal, az da olsa, bankların problemli kredit məsələsinin həllinə və əhalinin borc yükünə təsir göstərə bilər. Ancaq bu sahədə qiymətləndirmənin aparılmasına ehtiyac var. Qeyd olunan sosial qrupa aid olan təqaüdçülərin və şəhid ailələrinin kreditlərinin nə qədər hissəsinin problemli olması araşdırılmalıdır. Problemli kreditlərin həcmində bu qrupa aid olanların payının çəkisi nə qədərdir, bu da müəyyən olunmalıdır. Hesab edirəm ki, ilk növbədə, bu indikatorun müəyyən olunmasına ehtiyac var. Daha sonra qeyd olunan istiqamət üzrə güzəştlər tətbiq edilərsə və təklif qəbul olunarsa, hansı nəticələrə gətirib çıxaracağını müəyyənləşdirmək olar. Onu da qeyd etmək lazımdır ki, problemli kreditlərin həllində o qədər də ciddi əhəmiyyət daşımayacaq. Çünki təklif real olarsa, bu hal bank sektorunun sağlamlaşdırılmasına o qədər də əhəmiyyətli təsir göstərməyəcək”.
Həmsöhbətimizin sözlərinə görə, bu gün Azərbaycanda problemli kreditlərin həcmi günü-gündən artır. Rəsmi statistikaya görə, bankların kredit portfelinin hər 100 manatından 18 manatı problemlidir: “Ancaq aparılan müşahidələr onu göstərir ki, bəzi banklarda bu göstərici 50 faizə yaxındır. Ölkə üzrə ümumi göstərici təxminən 30 faiz civarındadır”.
Müsahibimiz onu da qeyd etdi ki, bank sektorunun sağlamlaşdırılması istiqamətində hələ müsbət nəticə yoxdur: “Bank sektorunun sağlamlaşdırılması üçün güzəştli paketin hazırlanmasına ehtiyac var”.
İqtisadçının bildirdiyinə görə, təqaüdçülərin kredit borcunun bağışlanması müsbət hal olar: “Nəzərə almaq lazımdır ki, bəzi təqaüdçülər heç 150 manat pensiya almırlar. Bu insanların kredit borcu mütləq bağışlanmalıdır”.
Günel CƏLİLOVA
