Günel Fərhadqızı: “Bakıya bu yöndə verilən ilkin müsbət qiymət bizim şansımızı daha da artırmış olur”
Beynəlxalq Sərgilər Bürosunun qiymətləndirmə missiyasının Bakıya səfərinin yekunlarına dair mətbuat konfransı keçirilib. Tədbirdə I vitse-prezidentin köməkçisi, Beynəlxalq Sərgilər Bürosunda Azərbaycan nümayəndə heyətinin rəhbəri Elçin Əmirbəyov, maliyyə naziri Samir Şərifov, “Expo-2025 Bakı” Əməliyyat katibliyinin icraçı direktoru Pol Foster, Beynəlxalq Sərgilər Bürosu İcra Komitəsinin sədri Jai-chuil Choi, büro sədrinin müavini Dmitri Kerkentzes çıxış ediblər.
Tədbirdə Azərbaycanın “Expo-2025” Ümumdünya Sərgisinə namizədliyinin irəli sürülməsi ilə bağlı görülən işlər və atılacaq addımlar barədə məlumat verilib.
Beynəlxalq Sərgilər Bürosunun (BIE) araşdırma missiyasının Bakıya səfərinin yekunları ilə bağlı mətbuat konfransında büronun baş katibinin müavini Dmitri Kerkentzes deyib ki, Azərbaycanın “Expo-2025” sərgisini keçirmək üçün bütün imkanları var.
Azərbaycan 10 May - 10 noyabr tarixlərində “Bakı Expo-2025” sərgisini təşkil etməyi təklif edib. Sərginin təklif olunan mövzusu "İnsan kapitalının inkişafı, daha yaxşı gələcəyin qurulması"dır.
Qeyd edək ki, Yekaterinburq (Rusiya) və Osaka (Yaponiya) da “Expo-2025” üçün müraciət ediblər.
Beynəlxalq Sərgilər Bürosunun (BIE) araşdırma missiyası Yaponiyaya martın 6-8-də, Rusiyaya isə aprelin 2-4-də səfər edib.
“Expo-2025” sərgisinin keçiriləcəyi şəhər üçün səsvermə bu il noyabrda keçiriləcək.
Göründüyü kimi, Beynəlxalq Sərgilər Bürosu Azərbaycanın “Expo 2025”ə namizədliyi ilə bağlı ilk rəyində müsbət cavab verib. Bu amil Bakının namizədliyi məsələsində necə rol oynayacaq?
İqtisadçı Günel Fərhadqızı qəzetimizə açıqlamasında bildirdi ki, Azərbaycanın bu sərgiyə evsahibliyi etmək şansı əvvəlcədən yüksək dəyərləndirilirdi: “Çox böyük şəhərlərlə rəqabətə girməyimiz özümüzə, ölkəmizin inkişafına olan inamdan irəli gəlir. Bunun üçün böyük işlər həyata keçirilir. Bu sahəyə təhkim olunan kadrların mütəmadi olaraq prosesə hazırlıq işlərinə nəzarət etdiyini müşahidə edirik. Səfirliklərimiz üzərlərinə düşəni etməkdədirlər.
Hesab edirəm ki, Azərbaycanın şansı böyükdür. Çünki son illər Azərbaycanda ciddi tədbirlər həyata keçirilir. Təkcə 2017-ci ildə ölkəmizdə baş tutan tədbirlərə nəzər salmaq kifayətdir. Azərbaycan, faktiki olaraq, regionda ən diqqətçəkən dövlətlərdən biridir. Ölkəmiz sabitlik, təhlükəsizlik baxımından da digər dövlətləri üstələyir. Tədbirin ölkəmizdə keçirilməsi həm də Azərbaycan həqiqətlərinin dünyaya çatdırılması üçün böyük arena ola bilər. Xüsusilə Dağlıq Qarabağ probleminin gələn qonaqlar arasında təbliğinin aparılması, bu barədə onların məlumatlandırılması olduqca əhəmiyyətli olacaq. Əksər dünya ölkələri “Expo-2025” sərgisinə evsahibliyi etmək üçün çalışır. Amma mən deyərdim ki, bizim ölkəmizin şansları daha çox və genişdir. Əgər təbliğat və təşkilatçılıq bu səviyyədə davam edəcəksə, Azərbaycan mərkəz ola biləcək. Beynəlxalq Sərgilər Bürosunun Azərbaycanın “Expo-2025”ə namizədliyi ilə bağlı ilkin rəyində müsbət məqamın olması bir daha sübut edir ki, biz istənilən işin öhdəsindən gəlməyə qadirik. Biz ilk imtahandan müsbət qiymət aldıqsa, demək, prosesə daha inamla davam edə bilərik. Bakıya bu yöndə verilən ilkin müsbət qiymət bizim şansımızı daha da artırmış olur. Əvvəl bəziləri Bakının belə bir uğura imza ata biləcəyinə inanmırdı. Çünki biz çox böyük ölkələrlə rəqabətə girmişik. Buyurun, nəticə göz qabağındadır”.
Məhəmmədəli QƏRİBLİ
