Bahadur Bilalov: “Nəticədə Azərbaycan turizminin inkişaf sürəti daha da artacaq”
Müasir turizm mürəkkəb sahədaxili və sahələrarası inteqrasiya əlaqələrinin mövcud olduğu, kəskin rəqabətin hökm sürdüyü sosial-iqtisadi hadisə, eyni zamanda bir biznes növüdür. Turizmin inkişafı zamanı yaranan çoxsaylı təsərrüfat əlaqələri buradakı idarəetmə prosesləri, marketinq araşdırmaları və turizm-rekreasiya fəaliyyəti üzrə yeni layihələrin həyata keçirilməsi zərurətini yaradır.
Başlıca məqamlardan biri də bu sahədə çevik tənzımləyici orqanın olmasıdır.
Xəbər verildiyi kimi, Prezident İlham Əliyev mədəniyyət və turizm sahəsində dövlət idarəçiliyinin təkmilləşdirilməsi ilə bağlı bəzi tədbirlər haqqında sərəncam imzalayıb. Sərəncamda qeyd edilir ki, Azərbaycan Respublikası Mədəniyyət və Turizm Nazirliyinin əsasında Azərbaycan Respublikasının Mədəniyyət Nazirliyi və Azərbaycan Respublikasının Dövlət Turizm Agentliyi yaradılsın. Bu baxımdan mədəniyyət və turizm sahələrinin bir-birindən ayrılması bu istiqamətdə sürətli inkişafa səbəb olacaq. Xüsusilə turizm sahəsində ayrıca agentliyin yaradılması bu sahənin problemlərini daha çevik həll etməyə imkan verəcək. Ayrıca bir Turizm Agentliyinin yaranması Azərbaycanda turizmin prioritet bir sahə elan olunması ilə əlaqədardır. Bir müddət öncə Prezident çıxışlarının birində ölkəyə gələn xarici turistlərin qarşılaşdığı müxtəlif əngəllərlə bağlı tənqidi fikirlər səsləndirib. Ondan sonra müəyyən dəyişikliyin olacağı ehtimalı yüksəldi. O üzdən, belə bir agentliyin yaradılması prioritet sahə elan olunan turizmdə olan maneələrin aradan qaldırılmasını, bir mərkəzdən idarə olunmanı və agentlik formasında fəaliyyət göstərərək daha çevik idarəçiliyi özündə ehtiva etməlidir.
Maraqlıdır, bəs ekspertlərin sözügedən məsələ ilə bağlı gözləntiləri nədən ibarətdir?
Məsələyə münasibət bildirən turizm sahəsi üzrə ekspert Bahadur Bilalovun sözlərinə görə, Dövlət Turizm Agentliyinin yaradılması bu sahənin inkişafına ümumən müsbət təsir göstərəcək: “Məsələ ondadır ki, bir sira dünya dövlətlərində, o cümlədən Avropa ölkələrində belə qurumlar var. Azərbaycanda da belə bir qurumun yaradılması, təbii ki, ölkə Prezidentinin turizmə verdiyi önəmdən irəli gəlir. O baxımdan ki, bu sahədə daha çevik idarəetmə sistemi qurulsun. Ona görə də belə bir agentliyin yaradılmasına qərar verildi. Məsələn, qonşu Gürcüstanda da belə bir agentlik fəaliyyət göstərir. Hesab edirəm ki, Azərbaycanda belə bir qurumun yaradılması, təyin olunacaq rəhbərlik dövlət başçısının ölkə turizmi qarşısında qoyduğu tələblərə əməl edəcək. Nəticədə Azərbaycan turizminin inkişaf sürəti daha da artacaq. Faktiki olaraq son zamanlar ölkə Prezidenti o toplantı olmur ki, orada turizmdən, turizmin problemlərindən danışmasın. Ümumilikdə, Azərbaycanda ölkə Prezidenti tərəfindən turizmin inkişafına xüsusi diqqət yetirilir. Xüsusi diqqət yetirilən bir sahənin də operativ idarə edilməsinə ehtiyac duyulur. Bu baxımdan da turizmlə bağlı ayrıca bir qurumun yaradılması sözügedən sahənin inkişafı üçün əhəmiyyətlidir. Bu imkan verəcək ki, turizmlə bağlı yaranan hansısa problemlər, çətinliklər daha çevik şəkildə həll olunsun. Nəzərə almaq lazımdır ki, Azərbaycanda turizm sektorunun inkişaf etdirilməsi baxımından bütün bunlar çox böyük əhəmiyyət kəsb edir”.
Vidadi ORDAHALLI
