Aydın Hüseynov: “Ölkə iqtisadiyyatında, Beynəlxalq Valyuta Fondunun proqnozlaşdırdığı kimi, 2019-cu ildə ən azı 3,9 faiz artım əldə olunacaq”
Beynəlxalq Valyuta Fondu bu il Azərbaycan üçün yeni iqtisadi artım proqnozunu açıqlayıb. Bu barədə qurumun “World Economic Outlook 2018” hesabatında deyilir. Hesabatda qeyd olunur ki, 2019-cu ildə Azərbaycanda ümumdaxili məhsul (ÜDM) 3,9 faiz artacaq.
BVF-nin 2019-cu ildə Azərbaycan iqtisadiyyatında artımın qeydə alınması proqnozuna fikir bildirən millət vəkili Aydın Hüseynov “Bakı-Xəbər”ə açıqlamasında bunları qeyd etdi: “Artıq ölkə iqtisadiyyatında qeyri-neft sektorunun şaxələndirilmiş formada inkişaf etdirilməsi strategiyası özünü doğruldur. Qeyri-neft sektoru ölkənin iqtisadiyyatında önəmli rol oynayır və ümumdaxili məhsulda onun çəkisi artır.
Həmçinin, turizm və kənd təsərrüfatı sahəsində də böyük nailiyyətlər əldə olunub. Eləcə də yüngül sənaye sahəsində də inkişaf qeydə alınır. Xüsusi olaraq qeyd etmək lazımdır ki, ölkə iqtisadiyyatında önəmli yeri neft sektoru tutur. Neft sektorundan əldə olunan gəlirin həcmi mütamadi olaraq artır”.
Millət vəkilinin sözlərinə görə, son illər qeyri-neft sektorunun inkişafı istiqamətində böyük layihələr həyata keçirilir. Beləliklə, ölkənin valyuta ehtiyatları getdikcə zənginləşir: “Məlumat üçün bildirim ki, bu ilin birinci rübü ərzində 2,2 milyard dollar investisiya qoyulub. İlin sonuna kimi isə ölkə iqtisadiyyatına 16 milyard dollar investisiyanın yatırılması gözlənir. Büdcənin gəlir mənbəyini formalaşdıran sahələr artıq öz nailiyyətlərini göstərməkdədir. Eyni zamanda, Azərbaycanın nəqliyyat logistikasına çevrilməsi iqtisadiyyatımıza müsbət təsir göstərəcək. Azərbaycan nəqliyyat logistikası Avropa və Asiyanın birləşməsində önəmli rol oynayacaq. Burdan da Azərbaycanın dövlət büdcəsinə xeyli gəlir gələcək. Bütün bunları bir yerə cəmləyəndə aydın olur ki, ölkə iqtisadiyyatında, Beynəlxalq Valyuta Fondunun proqnozlaşdırdığı kimi, 2019-cu ildə ən azı 3,9 faiz artım əldə olunacaq”.
Günel CƏLİLOVA
