Əkrəm Həsənov: “Yeni yaradılan assosiasiyaya daxil olan ölkələrin vətəndaşlarının kredit tarixçələri haqqında məlumat əldə etmək çətin olmayacaq”
Xəbər verildiyi kimi, Azərbaycanda Kredit Məlumatları Təchizatçılarının Regional Assosiasiyası yaradılıb. Assosiasiyanın yaradılması haqqında sənəd Bakıda 6 ölkənin - Azərbaycan, Gürcüstan, Ukrayna, Qazaxıstan, Qırğızıstan və Tacikistanın kredit büroları və təşkilatları tərəfindən imzalanıb. Gələcəkdə assosiasiyaya Belarus və Moldova kredit bürolarının da qoşulacağı gözlənir.
Maliyyə Bazarlarına Nəzarət Palatasının icraçı direktoru İbrahim Alışov media nümayəndələrinə açıqlamasında qeyd edib ki, regional assosiasiyanın yaradılması Azərbaycanın regionun maliyyə mərkəzinə çevrilməsi istiqamətində növbəti addımdır. İ.Alışovun sözlərinə görə, Azərbaycan hər zaman neft sektoru ilə tanınıb, lakin dövlət başçısı İlham Əliyevin rəhbərliyi ilə ölkədə qeyri-neft sektoru da fəal şəkildə inkişaf etməyə başlayıb.
Yeni yaradılan Kredit Məlumatları Təchizatçılarının Regional Assosiasiyasının fəaliyyəti hansı istiqamətdə olacaq və təşkilat nə kimi işlər görəcək? Məsələ ilə bağlı bank sahəsi üzrə mütəxəssis Əkrəm Həsənova müraciət etdik. O, “Bakı-Xəbər”ə açıqlamasında qeyd etdi ki, Kredit Məlumatları Təchizatçılarının Regional Assosiasiyası beynəlxalq təşkilatdır: “Kredit Təchizatçıları dedikdə kredit büroları nəzərdə tutulur. Kredit Bürosu elə bir təşkilatdır ki, şəxslərin kredit tarixçələri olur, istənilən vətəndaş günlərin birində banka gedəndə, bank Kredit Bürosundan həmin şəxsin bu günə kimi kredit borclarını necə ödəniş etdiyini öyrənir”.
Həmsöhbətimizin sözlərinə görə, Azərbaycan Kredit Bürosu Gürcüstan, Ukrayna, Qazaxıstan, Qırğızıstan və Tacikistanla birgə assosiasiya yaradıblar: “Hesab edirəm ki, yeni yaradılan assosiasiyanın məqsədi təşkilatlar arasında məlumat mübadiləsi aparmaqdır. Məsələn, Azərbaycan vətəndaşı Ukraynada olarkən oradan kredit götürmək istəyir. O ölkənin bankı kredit götürmək istəyən şəxsin əvvəlki borclarını necə ödədiyini bilmir. O şəxsin etibarlı olub-olmaması haqqında Kredit Bürosuna müraciət edəcək. Beləliklə, assosiasiyaya daxil olan ölkələrin vətəndaşlarının kredit tarixçələri haqqında məlumat əldə etmək çətin olmayacaq”.
Ə.Həsənov bildirdi ki, Kredit Məlumatları Təchizatçılarının Regional Assosiasiyası kredit büroları arasında əməkdaşlıq deməkdir.
Günel CƏLİLOVA
