Pərviz Heydərov: “Əksər sahələrdə orta aylıq əməkhaqqı artırılıb, bu da əhalinin nominal gəlirinin artmasına gətirib çıxarır”
Açıqlanan statistik rəqəmlərə əsasən, əhalinin gəlirləri 10 faizə yaxın artıb. Dövlət Statistika Komitəsinin yaydığı məlumatda qeyd olunur ki, yanvar-mart aylarında Azərbaycan əhalisinin nominal gəlirləri illik müqayisədə 9,8 faiz artaraq 12 533,3 mln. manat təşkil edib.
Hesabat dövründə əhalinin hər nəfərinə orta hesabla 1 280,5 manat gəlir düşüb. Bütün icbari və könüllü ödənişlər edildikdən sonra əhalinin sərəncamında 11 582,2 mln. manatlıq və yaxud ötən ilin eyni dövründəkindən 10,2% çox vəsait qalıb.
Cari ilin ilk üç ayı ərzində ölkə əhalisinin nominal gəlirinin artmasına münaasibət bildirən iqtisadçı-ekspert Pərviz Heydərov bizimlə söhbətində qeyd etdi ki, bunun bir neçə səbəbi ola bilər: “Əhalinin müəyyən bir qismi gəlirini xarici valyutada əldə edir. Neft sektorunda və xarici şirkətlərdə çalışanlar məvacibini xarici valyuta ilə əldə edirlər. Manatın məzənnəsinin dəyişməsindən sonra xarici valyuta ilə gəlirin həcmi artır”.
Onun sözlərinə görə, əksər sahələrdə orta aylıq əməkhaqqı artırılıb. Bu fakt əhalinin nominal gəlirinin artmasına gətirib çıxarır: “Həmçinin, əhalinin pensiya təminatının indeksasiyası kimi hallar əhalinin gəlirinə öz təsirini göstərib. Pensiyanın artması gəlirin artmasına təsir göstərən faktorlardan biridir.
Onu da vurğulamaq lazımdır ki, istehsalın həcminin, məşğulluğun artması, yeni iş yerlərinin açılması əhalinin gəlirlərinə təsir göstərir: “Qeyri-neft sektoruna yatırılan maliyyə kapitalı kənd təsərrüfatının tam gücü ilə inkişafına səbəb olur. Aqrar sahənin inkişafı da əhalinin gəlirlərinə öz təsirini göstərir”.
Günel CƏ LİLOVA
