Ruslan Atakişiyev: “Bu həm də, ümumilikdə, ölkədə könüllü vergi ödəmə mədəniyyətinin daha da genişlənməsinə səbəb olacaq”
Vergi Məcəlləsinə və bir sıra digər qanunvericilik aktlarına təkmilləşdirmənin həyata keçirilməsi istiqamətində işlər aparılıb. Azərbaycanda kiçik və orta sahibkarlığın vergi yükü azaldılacaq.
Xəbər verildiyi kimi, bu fikirləri vergilər naziri Mikayıl Cabbarov “Transfer qiymətlərinin müəyyən edilməsi və vergidən yayınma hallarına qarşı tədbirlərin işlənib hazırlanmasında Azərbaycan Respublikası Vergilər Nazirliyinə dəstək” üzrə “Tvinninq” layihəsinin açılış mərasimində bildirib. O qeyd edib ki, kiçik və orta sahibkarlığa tətbiq edilən vergi yükünün, vergi inzibatçılığının əhəmiyyətli dərəcədə yüngülləşdirilməsi və bununla da ölkədə sahibkarlıq fəaliyyətinə dəstək verilməsi əsas tapşırıqlardandır: “Orta və iri müəssisələrə gəldikdə, vergi qanunvericiliyinin əsas istiqamətləri həmin müəssisələr tərəfindən öz fəaliyyətinin, daxili hesabatlılığının və şəffaflıq səviyyəsinin artırılmasına və ölkənin vergi qanunvericiliyinin tələblərinə uyğunlaşdırılmasından ibarətdir. Bu da bir tərəfdən onların rəqabətqabiliyyətliliyinin, digər tərəfdən vergi ödənişlərinin sabitliyinin və büdcədən müəyyənləşdirə bildiyinin və nəhayət, dövlət büdcəsinin müvafiq gəlirlərinin zəmanəti olacaq. Bu da, öz növbəsində, dövlətin sosial infrastruktur cari xərclərinin vaxtlı-vaxtında yerinə yetirilməsi üçün zəmin yaradacaq. Vicdanlı vergi ödəyicisi ilə qanunu pozmağa çalışan vergi ödəyicisi arasında həm qanunvericilikdə, həm də inzibatçılıqda fərq getdikcə artacaq”.
O da məlumdur ki, ölkədə kiçik və orta sahibkarlığın inkişafı üçün vacib şərtlərdən biri vergi yükünün daha optimal səviyyədə olmasıdır. Bu sahədə vəziyyət nə qədər yaxşı olsa, bu bir o qədər sahibkarlığın inkişafına öz müsbət təsirini göstərəcək.
Maraqlıdır, bəs ekspertlər kiçik və orta sahibkarlığın vergi yükünün yüngülləşdirilməsinə necə yanaşırlar?
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, bu, sahibkarlığln inkişafına müsbət təsir göstərəcək: “Əvvəla vergi yükünün yüngülləşdirilməsinin müxtəlif növləri var. İnkişaf etmiş ölkələrin təcrübəsində yeni yaranan startaplara, kiçik şirkətlərə vergi sahəsində dövlət bu və ya digər şəkildə güzəştlər tətbiq edir. İqtisadi təcrübədə buna vergi investisiyaları kimi baxırlar. Vergi güzəştləri ilə yanaşı, yeni yaranan şirkətlərin sənəd, hesabat təqdim etməsi ilə bağlı bir sıra maarifləndirmə işləri aparılır. Hesabatlarında hansısa yanlışlıqlara yol verirlərsə, onlara güzəştlər edilir. Daha sonra həmin müəssisələr zamanla normal vergi ödəyicisinə çevrilirlər. Bütün bunların həyata keçirilməsində məqsəd ondan ibarət olur ki, vergi ödəyicilərinin sayı artsın. Yeni yaranan şirkət onun üçün məlum olmayan vergi mühitində fəaliyyətini dayandırmasın. Bir növ, yeni yaranan müəssisənin bu mühitə adaptasiya olunmasından söhbət gedir. Nəticədə həmin müəssisə normal bir vergi ödəyicisinə çevrilə bilir. Kiçik və orta sahibkarlığın vergi yükünün yüngülləşdirilməsi Azərbaycanda yeni yaranan müəssisələrin sayının artmasına təsir göstərəcək. Yeni yaranmış və fəaliyyət göstərən müəssisələrin özlərində daha çox şəffaf fəaliyyətə, hesabatlılığa meyli artırmış olar. Bunun sayəsində artıq yeni yaranan şirkətlər maraqlı olacaqlar ki, hesabatlarını düzgün şəkildə versinlər. Digər tərəfdən bu, vergidən yayınma hallarının aradan qalxmasına gətirib çıxaracaq. Eyni zamanda, bu həm də, ümumilikdə, ölkədə könüllü vergi ödəmə mədəniyyətinin daha da genişlənməsinə səbəb olacaq”.
Vidadi ORDAHALLI
