Rəsul Cahangirli: “Qarşıdakı biznes forumda xarici sahibkarlar bununla bağlı təşviq olunmalıdırlar”
İyunun 5-də Bakıda növbəti Azərbaycan-Avropa İttifaqı biznes forumu keçiriləcək. Avropa İttifaqının (Aİ) Azərbaycandakı Nümayəndəliyinin dəstəyi ilə keçiriləcək biznes forumun əsas məqsədi Aİ və Azərbaycan şirkətləri üçün işgüzar platforma yaratmaq, onların ölkədəki cari biznes mühiti haqqında müzakirələr aparmasına və işgüzar münasibətlər qurmasına yardımçı olmaqdır.
Bu arada o da məlum olub ki, Bakıda keçiriləcək Azərbaycan-Avropa İttifaqı biznes forumunda Avropanın 400-dən çox şirkəti nümayəndəsinin iştirakı planlaşdırılır. Bu barədə açıqlama verən Aİ-nin Azərbaycandakı Nümayəndəliyinin rəhbəri Kestutis Yankauskasın sözlərinə görə, Azərbaycanda ciddi islahatlar icra olunur: “Azərbaycan ciddi iqtisadi islahatların icra olunması prosesindədir. Bu, ölkəyə rəqabətqabiliyyətliliyi artırmaq və iqtisadi sabitliyi gücləndirməyə imkan verəcək. Aİ həm bunda, həm də əməkdaşlığın möhkəmlənməsində maraqlıdır. Hazırda Azərbaycan və Aİ yeni tərəfdaşlıq sazişi üzərində işləyirlər. Bundan başqa, iyunun əvvəlində Bakıda böyük biznes forumun keçirilməsi planlaşdırılır”.
Ümumilikdə, bu kimi biznes forumların keçirilməsi ölkələr arasında işgüzar əlaqələrin, investisiya mübadiləsinin və digər buna bənzər işlərin genişlənməsinə öz töhfəsini verir. Bütün bunlar da, nəticə etibarilə, ölkənin iqtisadi inkişafının daha da sürətlənməsinə öz müsbət təsirini göstərir. Nəzərə alsaq ki, Avropa ölkələri böyük inkişaf səviyyəsinə malikdirlər, o zaman sözügedən biznes forumun Azərbaycan üçün nə kimi əhəmiyyəti olacaq?
Məsələyə münasibət bildirən ekspert Rəsul Cahangirlinin sözlərinə görə, Aİ ilə keçiriləcək biznes forumun Azərbaycan iqtisadiyyatı üçün əhəmiyyəti böyükdür: “Nəzərə almaq lazımdır ki, Avropa İttifaqı dünya iqtisadiyyatında böyük çəkiyə malikdir. Dünyanın iqtisadi baxımdan bir sıra aparıcı ölkələri Aİ-də təmsil olunurlar. Təmsil olunmaqla yanaşı, həm də qurumda həlledici söz sahibidirlər. Əlbəttə, belə bir ittifaqda təmsil olunan ölkələrin iş adamlarının Azərbaycana təşrif buyurmaları, ölkə iqtisadiyyatı ilə yaxından maraqlanmaları müsbət haldır. Sözügedən biznes forum Aİ ölkələrindən olan sahibkarların Azərbaycana sərmayə qoymalarına, birgə müəssisələr qurmalarına, yerli sahibkarlarla işgüzar əlaqələrin daha da genişləndirilməsinə müsbət təsir göstərə bilər. Azərbaycanda qeyri-neft sektorunun daha da inkişaf etdirilməsi istiqamətində ciddi işlərin həyata keçirildiyini nəzərə alsaq, Aİ ölkələrindən olan iş adamlarının bu sektora sərmayə qoymalarına böyük ehtiyac var. Qarşıdakı biznes forumda xarici sahibkarların bununla bağlı təşviq olunmasına böyük ehtiyac var. Maksimum çalışmalıyıq ki, Aİ-dən olan iş adamları Azərbaycanda qeyri-neft sektorunun müxtələf sahələrinə sərmayə qoymağa həvəs göstərsinlər. Ona görə də sözügedən tədbirdə ölkənin bu sahədə mövcud olan potensialının ətraflı təqdim olunmasına ehtiyac var. Onu da qeyd edim ki, Azərbaycanda azad ticarət zonasının yaradılması ilə bağlı işlər sürətləndirilib. Fikrimcə, bununla bağlı avropalı iş adamları ətraflı məlumatlandırılmalıdır. Azərbaycanın Aİ üçün vacib enerji tərəfdaşı olduğunu nəzərə alsaq, hesab edirəm ki, xarici investorlar ölkədə həyata keçirilən bir sıra iqtisadi layihələrdə iştirak etməkdə maraqlı olacaqlar”.
Vidadi ORDAHALLI
