Vüqar Bayramov: “İstehsal olunan quş əti daha çox idxal edilən xammal hesabına başa gəlir”
"Növbəti illərdə buğda təminatı və quş əti istehsalına daha böyük diqqət yetirilməlidir". Bu sözləri Prezident İlham Əliyev ötən həftə baş tutan Nazirlər Kabinetinin 2018-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında söyləyib.
O qeyd edib ki, ənənəvi texniki məhsulların inkişafı ilə bağlı çox ciddi addımlar atılıb: “Biz ənənəvi texniki məhsulların inkişafı ilə bağlı çox ciddi addımlar atmışıq və bir çox müşavirələr keçirilib. Taxılçılıq, heyvandarlıq ərzaq təhlükəsizliyini təmin edən əsas sahələrdir. Bilirəm ki, dövlətin dəstəyi ilə və özəl qurumların fəaliyyəti nəticəsində buğda əkini genişlənir, yeni əkin sahələri dövriyyəyə çıxarılır, suvarma işləri təmin edilir. Bu sahəyə çox ciddi diqqət göstərilməlidir ki, biz özümüzü əsas ərzaq məhsulları ilə tam təmin edə bilək. Biz indi ət, süd məhsulları ilə özümüzü təqribən 80-90 faiz səviyyəsində təmin edirik, amma buğda ilə təminat sahəsində bu rəqəm daha aşağıdır. Ona görə növbəti illərdə bu sahəyə və eyni zamanda, quş ətinin istehsalına daha böyük diqqət yetirilməli və investisiyalar qoyulmalıdır".
Mövzu ilə bağlı fikir bildirən iqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, buğda və quş əti istehsalında problemlər var: “İstehsal olunan quş əti daha çox idxal edilən xammal hesabına başa gəlir. Quş əti ölkə daxilində istehsal olunsa da, onun xammalı xaricdən idxal olunur. Beləliklə, xaricdən asılılıq yaranır. Bu səbəbdən də sözügedən sektorda xammala olan tələbin yerli mənbələr hesabına ödənilməsinə ehtiyac var. Yerli mənbələr hesabına xammala olan tələbatın ödənilməsi istehsalın genişləndirilməsinə imkan verəcək. Həmçinin, istehsal zamanı valyutaların dəyişmə risqlərini sığortalayacaq. Nəticə etibarilə bu hal istehsalın genişlənməsi üçün zəmin yaradar.
Eyni zamanda, dövlət tərəfindən təşviqedici mexanizmlərin artırılmasına ehtiyac var. Azərbaycanda aqrar sektora subsidiyalar var. Torpaq vergisi istisna olmaqla, aqrar sektor vergidən azaddır.
Onu da qeyd etmək lazımdır ki, emaledici aqrar sektor vergidən azad deyil. Məqsədəuyğun olardı ki, bu sektorda fəaliyyət göstərən şirkətlərə aşağı faizlə kreditlərin verilməsi təmin olunsun.
Günel CƏLİLOVA
