Bakının hər bir rayonu özünəməxsus cəhətlərinə, göstəricilərinə görə seçilir. Qaradağ rayonu paytaxtın iri və zəngin rayonlarından biridir. Bu rayon son illər sosial-iqtisadi cəhətdən daha çox inkişaf edən inzibati ərazi vahidlərindən biridir. Zaman-zaman adı dəyişdirilən və tarixi ədalətin bərpa edilməsi nəticəsində öz halal adına qovuşan Qaradağ rayonunun ərazi vahidi kimi Puta-Şubanı mədəninin kəşfi ilə əlaqədar yaradıldığı məlumdur. 1923-cü il mayın 7-də Puta qəsəbəsindəki klubda ilk partiya konfransı keçirilib və rayonun əsasının qoyulduğu elan edilib.
Onu da vurğulayaq ki, rayon 1937-ci ilədək Mikoyan rayonu, 1956-cı ilədək Molotov rayonu, 1956-63-cü illərdə Qaradağ rayonu, 1963-66-cı illərdə Əzizbəyov rayonu, 1966-cı ildən isə yenidən Qaradağ rayonu adlandırılıb. Məlumatlara görə, rayonun adı Zaqafqaziyada ilk dəmir yolu stansiyalarından olan Qaradağ stansiyasının adı ilə bağlıdır.
Qeyd edək ki, abadlığı ilə seçilən və daim inkişafda olan Qaradağ rayonunun inzibati ərazi vahidliyinə 11 qəsəbə daxildir. Qaradağ rayonunun mərkəzi şəhər tipli Lökbatan qəsəbəsidir. Lökbatan adının tarixi hazırki Xocəsən və Sənqəçal qəsəbələri arasında olan karvan yolu ilə bağlıdır. Vaxtilə qəsəbənin ərazisində dəvə karvanlarının dayanacaqları olmuş və dəvələr bataqlıqlara batdıqlarından ərazi Lökbatan (dəvə batan) adlandırılıb.
Qaradağ rayonunda son illər davamlı olaraq həyata keçirilən tikinti-quruculuq işləri nəticəsində rayon mərkəzi və qəsəbələr abadlaşıb. Qəsəbələrdə fəaliyyət göstərən sənaye obyektləri, poliklinikalar, uşaq bağçaları, məktəblər, xidmət müəssisələri əhalinin sosial həyatında müsbət rol oynayır. Qaradağ sakinlərinin bildirdiyinə görə, qəsəbələrdə sakinlər üçün yaradılan şərait onların ürəyincədir.
Lökbatan qəsəbəsi sakinləri ilə söhbətimiz zamanı onlar bildirdilər ki, qəsəbədə hər şey öz qaydasındadır, onları narahat edən yalnız qəsəbədaxili yolların bərbad vəziyyətdə olmasıdır. Sakinlər qeyd edirlər ki, qəsəbədaxili yollar əhaliyə hər cür çətinlik yaradır. Onların sözlərinə görə, yol problemi həll edilərsə, bundan razı qalarlar.
Sakinlərin bildirdiyinə görə, bir müddət əvvələ qədər nəqliyyat problemi ilə üzləşiblər, lakin rayon rəhbərliyinin səyləri nəticəsində problem birdəfəlik aradan qaldırılıb. Sakinlərin verdiyi məlumata görə, qəsəbədə işıq, qaz və su ilə bağlı hər hansı bir çətinlikləri yoxdur, qəsəbənin daimi su, işıq və qaz təchizatı var. Qəsəbədə yaşayan şəhid ailələrinə xüsusi qayğı və diqqətin olduğunu deyən sakinlər bildirdilər ki, rayon rəhbərliyi şəhid ailələrini daim diqqət mərkəzində saxlayır, onların qayğı və problemləri ilə maraqlanır, çətinlikləri aradan qaldırır.
Qaradağ rayonunun sosial-iqtisadi cəhətdən inkişaf etməsi bir reallıqdır və rayon ildən-ilə yox, aydan-aya simasını dəyişir. Bir vaxtlar ucuz işçi qüvvələri üçün inşa edilən köhnə tipli baraklar və evlərin yerində böyük, işıqlı binalar ucaldılıb, sakinlər burada xoşbəxt yaşayırlar. Bu gün dinamik inkişafda olan Qaradağ rayonunda həm sosial, həm iqtisadi, həm mədəni sahədə böyük işlər görülür. Görülən işlərin sırasına innovasiyaların sürətlə tətbiqi, biznesin inkişafı üçün perspektivlərin yaradılması, böyük layihələrin reallaşdırılması və daşınmaz əmlaka xarici investisiyaların cəlb olunması daxildir. Ancaq buna qədər rayonun uzunmüddətli sosial-iqtisadi inkişafı üçün möhkəm iqtisadi təməl yaratmaq və onu gündən-günə möhkəmləndirmək zərurəti yaranıb.
Məlum olduğu kimi, 2007-ci ildə Bakı şəhərinin və Abşeron yarımadasının enerji təhlükəsizliyinin möhkəmləndirilməsi üçün nəzərdə tutulan 300 meqavat gücündə modul tipli Səngəçal elektrik stansiyasının tikintisinə başlanması yaddaqalan hadisələrdən biridir. Qeyd edək ki, Səngəçal elektrik stansiyasının tikintisindən sonra Qaradağda müasir Gəmiqayırma zavodunun, Beynəlxalq Dəniz Ticarəti Limanının, Cənubi Qafqazda ən nəhəng özəl müəssisələrdən olan Metanol zavodunun, “Holcim-Azərbaycan”, “Norm” yeni sement zavodlarının və bir sıra digər sənaye obyektlərinin tikintisi reallaşdırılıb və bununla da dövlət başçısının qayğısı sayəsində tam yeni və müasir infrastruktura malik bir sənaye mərkəzinin gerçək yaradılmasının əsası qoyulub.
11 qəsəbənin daxil olduğu Qaradağın sürətli inkişafına geniş imkanlar açan amillərdən biri də bu rayonun respublikanın əsas nəqliyyat arteriyası üzərində bərqərar olmasıdır. Məlum olduğu kimi, Xəzər hövzəsində ən böyük ticarət limanı olan Ələt Beynəlxalq Dəniz Ticarəti Limanının bu rayonda inşası isə rayonu, sözün həqiqi mənasında, nəqliyyat-logistika mərkəzinə çevirib.
Qaradağ rayonu daha çox sənaye rayonu olduğundan, bu sahə daha çox diqqəti çəkir.
Qaradağ ərazisində yeni tikilən və istehsal gücü ilə rayonun iqtisadi potensialını artıran sənaye müəssisələri ilə paralel olaraq Qaradağın sosial-məişət infrastrukturu da yenidən qurulub.
Məlumdur ki, Azərbaycan Prezidentinin təşəbbüsü və iştirakı ilə işlənib hazırlanan və uğurla həyata keçirilən 2006-2007-ci və 2011-2013-cü illəri əhatə edən Bakı şəhərinin və onun qəsəbələrinin sosial-iqtisadi inkişafına dair dövlət proqramları sayəsində çox işlər görülüb.
Qaradağ rayonunda köhnə binaların yerində yeni binaların tikintisi ilə bağlı pilot layihələr həyata keçirilib. Qeyd edək ki, son illər rayonda xüsusi layihə əsasında planlı şəkildə quruculuq-abadlıq və əsaslı yenidənqurma işlərinin aparılması, sosial infrastruktur layihələrinin icrası Qaradağ rayonunun simasını müasirləşdirib, rayonun küçə və parklarında, yaşayış binalarının həyətlərində, yol kənarlarında on minlərlə ağac və bəzək kolları əkilib.
Qaradağ rayonunun Ələt qəsəbəsində əsaslı yenidənqurma tədbirləri həyata keçirilib. Məlumata görə, qəsəbədə yeni sosial obyektlər tikilib, köhnə binalar əsaslı şəkildə təmir olunub. Yenidənqurma işləri zamanı ümumi görünüşə xələl gətirən tikililər və ya qəzalı vəziyyətdə olan binalar sökülərək müasir tələblər səviyyəsində yeni binalar inşa edilib. Qəsəbədə çoxmərtəbəli yaşayış evlərinin dam örtüyü və fasad hissəsində yenidənqurma və əsaslı təmir işləri aparılıb, yeni abad məhəllələr salınıb.
Rayonda aparılan abadlıq-quruculuq, tikinti-bərpa işlərinin bütün qəsəbələri əhatə etməsi Qaradağda görülən işlərin geniş miqyasından xəbər verir. Abadlıq və quruculuq işləri Qobustan qəsəbəsini də əhatə edir. Qəsəbədə bir çox küçələr boyunca yerləşən binaların və parkların müasir və zövq oxşayan forma və üslubda yenidən qurulması işləri davam etdirilir. Vurğulayaq ki, eyni işlər digər qəsəbələrdə də həyata keçirilir. Məlumatlara görə, son 7-8 ildə Qaradağ rayonunda bir çox layihələr həyata keçirilib, minlərlə iş yerləri açılıb.
“Ölkəmizi tanıyaq” devizi altında Qaradağ rayonunun da yuxarı sinif şagirdlərinin daxil olduğu Bakı məktəblilərinin Naxçıvan Muxtar Respublikasına səfəri təşkil edilib. Məktəblilərin vətənpərvərlik hissinin formalaşmasında bu kimi məsələlərin böyük rol oynadığı məlumdur. Azərbaycanın hər bir yerini gəzib görmək, bölgələrlə tanışlıq gənc nəslin həyatında mühüm rol oynayır.
Qeyd edək ki, Qaradağ rayonunda əhaliyə göstərilən səhiyyə xidmətinin də səviyyəsi sakinləri qane edir. Məlumatlara görə, bu ilin fevral ayında respublikamızın bütün bölgələrində olduğu kimi, Qaradağ rayonunda da əhalinin tibbi müayinədən keçirilməsi tədbirlərinə başlanıb. Humanitar aksiyanın mütəşəkkilliyini təmin etmək üçün Qaradağ Rayon İcra Hakimiyyətində müvafiq komissiya yaradılıb. Həmçinin, xüsusi tədbirlər planı hazırlanıb, qrafik tərtib edilib. Bu günədək rayondakı tibb müəssisələrində 6 mindən artıq rayon sakini ixtisaslı həkimlər tərəfindən hərtərəfli müayinə olunaraq sağlamlıqları haqqında məlumat əldə edib. Müayinə olunan sakinlərdən 901-i ambulator, 72-si stasionar müalicəyə cəlb edilib, 82 nəfər respublikanın ixtisaslaşmış xəstəxanalarına göndərilib. Eyni zamanda, səhiyyə müəssisələrinin həkimləri rayon sakinləri ilə yanaşı, ərazidə məskunlaşmış məcburi köçkünlərin də tibbi müayinələrdən keçməsini həyata keçirirlər. Rayon İcra Hakimiyyətində əhalinin tibbi müayinədən keçirilməsi zamanı yarana biləcək neqativ halların aradan qaldırılması üçün “Qaynar xətt” telefon əlaqə nömrəsi yaradılıb.
Qaradağ rayonunun sosial-iqtisadi inkişafını, burada görülən işləri görmək üçün rayonun qəsəbələrinə baş çəkmək, sakinlərlə söhbətləşmək kifayətdir.
Rayonda bu sahədə görülən işlər mədəniyyət sferasını da əhatə edir. Belə ki, rayon ərazisində yerləşən kitabxanalar, mədəniyyət ocaqları daim diqqət mərkəzində saxlanır. Rayon ərazisində 5 mədəniyyət evi, 10 kitabxana, 1 klub və 1 qoruq fəaliyyət göstərir. Qobustan Dövlət Tarixi-Bədii Qoruğu bu gün paytaxtımıza axın edən turistlərin ən çox ziyarət etdiyi məkanlardandır. Dünya şöhrətli Qobustan qoruğunun Qaradağda yerləşməsi bu rayonun beynəlxalq miqyasda tanınmasına xidmət edib.
Qaradağ rayonu uğurlu sosial-iqtisadi inkişaf yolu seçərək sabaha doğru daha da inamla addımlayır. Uğurlu olsun!
İradə SARIYEVA
Yazı Qaradağ Rayon İcra Hakimiyyəti və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim edilir.
