Könül Nuriyeva: “İnsan kapitalı inkişaf edərsə, iqtisadiyyatımız da bir o qədər inkişaf edər, belə olarsa, bank sahəsində yaşanan problemlər minimuma enər”
Azərbaycanda problemli kreditlər üzrə mütəxəssisin olmadığı iddia olunur. Belə bir fikri Sahibkarlar Konfederasiyasının prezidenti Məmməd Musayev Bakıda "Novruz mühazirələri çərçivəsində iqtisadiyyat, biznes və universitet arasında qarşılıqlı vəhdət: Qlobal çağırışlar və yeni imkanlar" mövzusunda elmi-praktik konfransda çıxışı zamanı deyib.
O qeyd edib ki, tələbələr biznes mühitində formalaşmalarına diqqət etməlidirlər: “Azərbaycanda problemli kreditlər üzrə mütəxəssis yoxdir”.
Azərbaycanda problemli kreditlər üzrə mütəxəssislər nə səbəbdən yoxdur? Belə mütəxəssislər olarsa, onlar bu sahədə yaşanan problemləri necə həll edəcəklər?
İqtisadçı-ekspert Könül Nuriyeva “Bakı-Xəbər”ə açıqlamasında qeyd etdi ki, ilk növbədə problemli kreditlərin qarşısını almaq lazımdır: “Bəllidir ki, bu gün müxtəlif formada istehlak kreditinin verilişi ilə bağlı cəlbedici reklamlar yayılır. Həmin reklamlarda kredit şərtlərinin çox asan olduğu qeyd edilir. Problemli kreditlərin artması səbəblərindən biri də krediti verən şəxslərin peşəkarlıq səviyyəsinin aşağı olmasıdır. Əsas məsələ isə istehlakçıların gəlirinin düzgün göstərilməməsidir. Bu kimi hallar nəticəsində ayın sonunda kredit ödənişində problem yaşanır”.
Həmsöhbətimiz hesab edir ki, yaranmış vəziyyətin həll olunması üçün Avropa ölkələri təcrübəsinə müraciət etmək lazımdır: “Avropa ölkələrində kreditin ödənişində problem yaranırsa, o zaman vətəndaşın banka olan borcu onun kommunal ödənişindən çıxılır. Bu qayda bizdə də tətbiq olunarsa, əhali həm mütəmadi kredit götürməkdən çəkinər, həm də kreditin qaytarılmasına daha məsuliyyətli yanaşar”.
K.Nuriyeva onu da əlavə etdi ki, istehlak kreditinin həcmi az olduğu üçün, qanunvericilikdə ölkədən çıxışla bağlı məhdudiyyət yoxdur: “Hesab edirəm ki, problemli kreditin həcmindən asılı olmayaraq, ölkədən çıxışa qadağa tətbiq olunarsa, bu, problemli kreditlərin həcminin azalmasına səbəb olar”.
İqtisadçının sözlərinə görə, Azərbaycanda qeyri-ixtisas sahiblərinin bank sahəsində çalışması problemli kreditlərin artmasına şərait yaradır. İstənilən şəxs 3-4 ay bankda kredit sahəsi üzrə staj keçərək bank işçisi olur: “Bu sahədə baza təhsili almadan, qeyri-ixtisas sahiblərinin işləməsi düzgün deyil. Banklarda problemli kredit şöbəsində çalışan işçilər xarici ölkələrdə keçirilən təlimlərə göndərilsə, daha yaxşı nəticə əldə olunar. İnsan kapitalı inkişaf edərsə, iqtisadiyyatımız da bir o qədər inkişaf edər. Belə olarsa, bank sahəsində yaşanan problemlər minimuma enər”.
Günel CƏLİLOVA
