Zakir Əhmədov: “Prezident İlham Əliyevin həyata keçirdiyi siyasət nəticəsində aqrar sahədə istehsal imkanlarının daha da artırılması üçün önəmli addımlar atılır”
Azərbaycanın kənd təsərrüfatı ölkə iqtisadiyyatının mühüm tərkib hissəsi kimi böyük inkişaf yolu keçib. Aqrar sahədə aparılan hüquqi və iqtisadi islahatlar ölkənin ərzaq təhlükəsizliyinin təmin olunmasında əhəmiyyətli rol oynayıb. Azərbaycan dövləti əhalinin ərzaqla etibarlı təminatına dair çoxşaxəli tədbirlər həyata keçirib və ərzaq təhlükəsizliyinin birbaşa asılı olduğu aqrar sahənin inkişafına yönələn irimiqyaslı dövlət proqramları qəbul edib.
Kənd təsərrüfatı ölkənin sosial-iqtisadi problemlərinin həllində, xüsusən də regionlarda yaşayan insanların məşğulluğunda müstəsna rol oynayır. Müqayisə üçün qeyd edək ki, 2014-cü ildə Azərbaycanda ümumdaxili məhsulda kənd təsərrüfatının payı 5.3 faiz idisə, indi bunun payı daha böyükdür. Son illər ölkədə kənd təsərrüfatının modernləşdirilməsi, aqrar sektorda mövcud problemlərin həllinə sistemli və kompleks yanaşılması, dövlətin inzibati və maliyyə resurslarından səmərəli istifadə olunması öz bəhrəsini verir.
2014-cü ildən etibarən aqrar islahatların müasir mərhələsi ilə bağlı Prezident İlham Əliyev tərəfindən qəbul olunan qərarlar cidi nəticələr əldə etməyə imkan yaradıb. Ölkədə aqrar sahənin institusional, iqtisadi və texnoloji tərəqqi mexanizmlərinin təkmilləşdirilməsi istiqamətində kompleks tədbirlərin həyata keçirilməsi bu sahənin inkişafına gətirib çıxarıb. Reallıq ondan ibarətdir ki, Azərbaycanda aqrar sektorun dinamik inkişafı üçün münbit zəmin var. Bu sahədə köklü dəyişikliklər baş verib, yeni iqtisadi və mülkiyyət münasibətləri formalaşıb. Ötən beş ildə görülən sistemli işlər sayəsində Azərbaycanda kənd təsərrüfatı məhsullarının istehsalı artıb. Bir sıra məhsullarla ölkə özünü təmin edir. Bu gün Azərbaycan özünü toyuq əti və yumurta, tərəvəz, meyvə kimi kənd təsərrüfatı məhsulları ilə 90-100 faiz təmin edir. Bununla yanaşı, 2016-cı ilin göstəricisi ilə müqayisədə Azərbaycan 2017-ci ildə kənd təsərrüfatı məhsullarının ixracını 40,3 faiz artırıb. Belə ki, 2017-ci ildə 570,5 milyon dollar məbləğində kənd təsərrüfatı məhsulları ixrac edilib ki, bu da 2016-cı ilin göstəricisindən 40,3 faiz çoxdur. Rəsmi məlumata görə, 2017-ci ildə pambıq ixracı 5,5 dəfə, tütün ixracı 1,8 dəfə, heyvandarlıq məhsullarının ixracı isə 2,5 dəfə artıb.
Bütün bunların fonunda, Azərbaycan ötən 5 ildə kənd təsərrüfatı sahəsində sadalanan bu uğurlara necə nail olub?
Məsələyə münasibət bildirən ekspert Zakir Əhmədov bunu bir sıra amillərlə əlaqələndirdi: “Məsələ ondadır ki, son illər kənd təsərrüfatının inkişafına diqqət əhəmiyyətli şəkildə artıb. 2014-cü ilə qədər dünya bazarında neftin qiymətinin yüksək olması Azərbaycanda ərzaq təhlükəsizliyinin idxal hesabına təmin olunmasında hansısa problem yaratmırdı. Ancaq dünya bazarında neftin qiymətinin kəskin ucuzlaşması bunun daxili istehsal hesabına təmin olunması zərurətini yaratdı. Düzdür, o vaxta qədər də Azərbaycanda kənd təsərrüfatının inkişafına dair bir sıra proqramlar qəbul olunurdu. Həmçinin, müəyyən işlər görülürdü. Gözləntilər ona hesablanmışdı ki, mərhələ-mərhələ və bir neçə ildən sonra kənd təsərrüfatı məhsullarına olan tələbat daxili istehsal hesabına təmin edilsin. Ancaq 2014-cü ildə dünya iqtisadiyyatında baş verənlər göstərdi ki, bununla bağlı işləri daha da sürətləndirmək lazımdır. O üzdən, Azərbaycanın kənd təsərrüfatında sağlam mühitin formalaşdırılması, ərzaq təhlükəsizliyinin təmin olunması iqtisadi strategiyanın əsas hədəflərindən biri hesab olunur. Prezident İlham Əliyevin həyata keçirdiyi siyasət nəticəsində aqrar sahədə istehsal imkanlarının daha da artırılması üçün önəmli addımlar atılır. Bunun nəticəsidir ki, Azərbaycan kənd təsərrüfatı sahəsində böyük uğurlar qazanıb. Artıq kənd təsərrüfatı məhsullarımızın xarici ölkələrə ixrac edilməsi də bu uğurların əyani göstəricisidir. Nəzərə almaq lazımdır ki, ötən müddət ərzində kənd təsərrüfatının inkişafına dair bir sıra proqramlar qəbul olunub. Eyni zamanda, fermerlərə subsidiyaların, güzəştli şərtlərlə kreditlərin verilməsi, kənd təsərrüfatı texnikasının yenilənməsi öz nəticəsini verir. Ölkədə yaradılan aqroparkların sayı 43-ə çatdırılıb. Bütün bunların və digər işlərin sayəsində ölkədə kənd təsərrüfatı məhsullarının istehsalı artıb. Ərzaq təhlükəsizliyi əsasən daxili imkanlar hesabına təmin edilir”.
Vidadi ORDAHALLI
