Əkrəm Həsənov: “Banklardankənar nağd pul kütləsinin artması gözləniləndir, çünki son zamanlar əhali banklarda əmanət saxlamağa ehtiyat edir”
Məlumatlara görə, banklardankənar nağd pul kütləsi 25 faiz artıb. Azərbaycanda banklardankənar nağd pul kütləsi (M0 aqreqatı) aylıq müqayisədə 108,8 mln. manat və yaxud 1,5% azalaraq bu il fevralın 1-nə 7 381,5 mln. manat təşkil edib. Bu barədə Azərbaycan Mərkəzi Bankının aylıq hesabatında bildirilir. Hesabata əsasən, ötən ilin eyni dövrü ilə müqayisədə isə M0 aqreqatında 1 458,6 mln. manat və yaxud 24,6 faiz artım qeydə alınıb.
Məlumat üçün qeyd edək ki, ölkədə nağd pul kütləsinin maksimal həddi 2014-cü il iyul ayında qeydə alınıb və 10 508,9 mln. manat təşkil edib.
Banklardankənar nağd pul kütləsinin artması səbəbləri barədə danışan bank sahəsi üzrə ekspert Əkrəm Həsənov “Bakı-Xəbər”ə açıqlamasında bunun gözlənilən olduğunu qeyd etdi. Onun sözlərinə görə, son zamanlar əhali banklarda əmanət saxlamağa ehtiyat edir: “Təəssüf ki, bu hal tək vətəndaşlara aid deyil, eyni zamanda, şirkətlərə də aiddir. Şirkətlər, demək olar ki, banklarda əmanət saxlamırlar. Məlumdur ki, vətəndaşlar banklarda əmanət saxlayarkən onlar Əmanətlərin Sığortalanması Fondunun olmasını nəzərə alırlar. Ancaq şirkətlərin banklarda pulu olanda hansısa bank müflis olarsa, həmin vəsait faktiki olaraq batır. Bu səbəbdən də şirkətlər banklara yatırım etmirlər. O da bəllidir ki, banklar şirkətlərə ayda 15-30 min dəyərində vəsait çıxarmağa qoymurlar. Məlumat üçün bildirim ki, bankların bu hərəkəti qanunsuzdur. Ötən ilin əvvəlində bu təcrübə başlanan zaman mən bildirirdim ki, son nəticədə hər kəs banklarda olan əmanətlərini geri götürəcək”.
Həmsöhbətimiz hesab edir ki, banklardankənar nağd pul kütləsinin artmasının səbəbi məhz bank sisteminə etimadsızlıqdır.
Günel CƏLİLOVA
