Qeyri-neft sektorunun mühüm istiqamətlərindən biri kimi ölkədə turizmin inkişaf etdirilməsi bu gün əsas prioritetlər sırasında qalmaqda davam edir. Son illər ərzində qeyd olunan istiqamətdə atılan addımlar isə öz müsbət nəticələrini verməkdədir. Real vəziyyətin təhlili göstərir ki, artıq turizm Azərbaycana valyuta gətirən əsas sahələrdən birinə çevrilib.
Turistlərin rahatlığı üçün müasir infrastrukturun yaradılması, xidmət keyfiyyətinin yüksəldilməsi, sadələşdirilmiş viza sisteminin tətbiqi də ölkəmizə gələn xarici turistlərin sayının artması ilə nəticələnib. Ölkəmizə gələn turistlərin sərhəd-buraxılış məntəqələrini rahat şəkildə keçmələrinin təmin edilməsi, bu kontekstdə müvafiq addımlar atılması da məsələyə müsbət istiqamətdə təsir edir.
Yuxarıda qeyd olunduğu kimi, Azərbaycana turist axınının artması ölkəyə daxil olan vəsaitin də yüksəlməsinə təsirsiz ötüşmür. Mərkəzi Bankın məlumatları göstərir ki, ölkəyə gələn xarici vətəndaşların bank kartları üzrə əməliyyatları 2017-ci ildə 1 milyard manatdan çox olub. Bu da 2016-cı illə müqayisədə 70 faiz artım deməkdir. Cari il ərzində isə qeyd olunan rəqəmin daha yüksək hədlə ifadə olunması gözlənir. Yaranmış vəziyyətdə diqqət cəlb edən daha bir məqam odur ki, Azərbaycanda fəaliyyət göstərən turizm şirkətlərinin sayı da son illər ərzində xeyli artıb. Turizm sahəsinin inkişafı və turizm xidmətlərinə artan tələbatla əlaqədar ötən ildə bu cür müəssisələrin sayı 100 faizdən çox artaraq 633-ə çatıb.
Mədəniyyət və Turizm Nazirliyi bildirir ki, ölkəmizdə fəaliyyət göstərən mehmanxana və mehmanxana tipli yerləşdirmə vasitələrinin sayı isə 2017-ci ildə 686 olub. Ümmuiyyətlə, bu istiqamətdə son illərdə həm mövcud imkanlardan geniş istifadə olunub, eyni zamanda dövlət dəstəyi ilə turizmin inkişafı istiqamətində böyük layihələr həyata keçirilib, müasir infrastruktur yaradılıb. O da məlum həqiqətdir ki, dünyanın müxtəlif ölkələrində turizmin inkişaf tempi, ölkəyə gələn turist axını 5-7 faiz arasında dəyişir. Ötən il Azərbaycana gələn xarici turistlərin sayı isə 20 faiz artaraq indiyədək qeydə alınan ən yüksək göstəriciyə, yəni 2,7 milyon nəfərə çatıb. Belə ki, Dövlət Miqrasiya Xidmətinin təqdim etdiyi hesabata əsasən, 2017-ci ildə ölkəmizə gələn xarici vətəndaşların sayı 2016-cı illə müqayisədə 449 min 215 nəfər, yəni 20 faiz artaraq 2 milyon 691min 998 nəfər olub. Cari ilin yanvar ayında Azərbaycana 185 min 913, fevral ayında isə 166 min 161 nəfər xarici vətəndaş gəlib. Ümumilikdə, iki ay ərzində ölkəmizə gələn xarici vətəndaşların sayı 352 min 74 nəfər olub. Keçən ilin müvafiq dövrü ilə müqayisədə bu il Azərbaycana 12,3 faiz çox xarici vətəndaş gəlib.
Bütün bu mühüm göstəricilərin, yüksək artımın əldə olunmasında isə turizm sahəsində həyata keçirilən tədbirlərin mühüm rolu olub. Eyni zamanda turizm sənayesinin inkişafına yönəlmiş dövlət qayğısı və bu fonda Azərbaycanı xaricdə uğurlu təbliğ edən Turizm Şurasının yaradılması da prosesə öz töhfəsini verir. Turizm Şurasının yaradılmasında əsas məqsəd ölkəmizdə turizm sahəsində mövcud vəziyyətin təhlil edilməsi, bu sahədə olan problemlərin aradan qaldırılması üçün müvafiq tədbirlərin görülməsi, turizm sahəsində dövlət orqanlarına həvalə edilmiş vəzifələrin icrasının əlaqələndirilməsindən ibarətdir. Məhz bu səpkidə atılan addımlar Azərbaycana gələn turistlərin sayını sürətlə artırır.
Digər tərəfdən araşdırmalar göstərir ki, Azərbaycana gələn turistlərin say artımına təsir göstərən daha bir önəmli amil təhlükəsizlik faktorudur. Ümumiyyətlə, dünyada münaqişələrin, terror aktlarının sayının artdığı bir vaxtda xarici turistləri ilk növbədə maraqlandıran məqamlardan biri də səfər etdikləri yerlərdə onların təhlükəsizliyinin nə dərəcədə təmin olunmasıdır. Bu mənada indi turizmin inkişafı üçün başlıca amillərdən biri ölkədə təhlükəsizliyin və sabitliyin təmin edilməsidir. Dünya miqyasında da etiraf olunur ki, Azərbaycan turistlər üçün ən təhlükəsiz ölkələr arasında yer alır. Yaranmış durumda istirahətini Azərbaycanda keçirən xarici turistlərin sayının daha da artması gözlənir. Belə vəziyyətdə ölkənin turizmdən əldə etdiyi valyuta gəlirlərinin həcmində də əhəmiyyətli artım olması proqnozlaşdırılır. Burada onu da qeyd edək ki, yerli turistlərin də ölkə daxilində istirahətə getdikcə daha çox üstünlük verməsi turizm xətti ilə Azərbaycandan valyuta çıxışının azalmasına əhəmiyyətli dərəcədə təsir göstərib. Bunun əvəzində isə yenə turizm xətti ilə Azərbaycana daxil olan valyutanın miqdarı durmadan artır.
NAHİD
