Ruslan Atakişiyev: “Cənub Qaz Dəhlizi” layihəsi Azərbaycan üçün böyük əhəmiyyət kəsb edir”
Məlumdur ki, hökumətin qeyri-neft sektorunun inkişafını təmin etmək məqsədilə hazırda ən çox istifadəyə nail olmaq istədiyi vasitələrdən biri istər daxili, istərsə də xarici mənbələr hesabına investisiyalar cəlb etməkdir. Bundan ötrü bir sıra zəruri addımlar atılır.
Məsələn, xarici investisiya axını üçün yeni mexanizm hazırlamaq məqsədilə investisiya fəaliyyətinin təşviq edilməsi, xarici investorların hüquqlarının qorunması ilə bağlı bir sıra tədbirlər haqda sərəncamı qeyd etmək olar. O da məlumdur ki, Azərbaycan təbii sərvətlər sarıdan zəngin ölkədir. Ölkənin yerüstü və yeraltı sərvətləri kifayət qədər böyükdür. Lakin sərvətin olması onun həm də istifadə edildiyi demək deyil. Çünki bunun üçün müvafiq texnologiya, kadr potensialı və investisiya lazımdır. Bütün bunlardan kompleks istifadə olunması mövcud potensialın realizə olunmasına şərait yaradır.
Müşahidələr göstərir ki, Azərbaycanda həyata keçirilən böyük enerji layihələri digər sahələrin də inkişafına öz müsbət təsirini göstərir.
Asiya İnkişaf Bankının (AİB) Azərbaycandakı nümayəndəliyinin rəhbəri Nəriman Mannapbekov deyib ki, Azərbaycan qazının Avropaya çatdırılmasını nəzərdə tutan “Cənub Qaz Dəhlizi” layihəsi regionda əməkdaşlığın inkişafına və qaz mənbələrinin diversifikasiyasına xidmət edir. Onun fikrincə, layihə başa çatandan sonra Azərbaycanda 1800 iş yerinin açılması gözlənir: “AİB-in əsas vəzifələrindən biri öz üzvləri arasında, o cümlədən enerji təhlükəsizliyinin təminatına ehtiyacı olan ölkələr arasında regional əməkdaşlığın dəstəklənməsidir. “Cənub Qaz Dəhlizi” məhz bu məsələlərə cavab verir. Biz hesab edirik ki, bu layihə dövlət üçün əlavə gəlir mənbəyi ola bilər və bu gəlirlər sosial proqramların reallaşdırılması və ya iqtisadiyyatın diversifikasiyası üçün istifadə oluna bilər. Layihənin başa çatmasından sonra azı 1800 daimi iş yerinin açılması gözlənir”.
Qeyd edək ki, sözügedən layihə Avropa İttifaqı üçün prioritet layihələrdəndir və 10 milyard kubmetr Azərbaycan qazının Gürcüstan və Türkiyədən keçməklə Xəzər regionundan Avropaya çatdırılmasını nəzərdə tutur.
Bütövlükdə, layihənin həyata keçirilməsindən sonra ölkədə 1800 daimi iş yerinin açılması perspektivini ekspertlər necə dəyərləndirirlər?
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, bununla bağlı gözləntilər reallığa əsaslanır. O bunu bir sıra iqtisadi amillərlə əlaqələndirdi: “Əvvəla “Cənub Qaz Dəhlizi” layihəsi Azərbaycan üçün böyük əhəmiyyət kəsb edir. Eyni zamanda, bu, ən prioritet layihələrdən biridir. Nəzərə almaq lazımdır ki, bu layihə uzunmüddətli dövrü əhatə edəcək. Gözləntilər əsasən enerji resurslarının nəqli və bundan əldə olunacaq gəlirlərlə bağlıdır. Söhbət ondan gedir ki, bundan əldə olunacaq gəlirlərin ölkə iqtisadiyyatına sərf olunması və ən başlıcası isə bundan səmərəli istifadə olunması böyük əhəmiyyət kəsb edir. Bütün bunlarla yanaşı, özü-özlüyündə belə bir layihənin həyata keçirilməsi yeni iş yerlərinin açılması deməkdir. Eyni zamanda, bu həm də layihə çərçivəsində onun təsirinə düşən icmaların inkişafı deməkdir. Məsələ ondadır ki, bu, yerli əhalinin sosial-iqtisadi problemlərinin həllində əlavə imkanların yaranmasına kömək edə bilər. Layihə çərçivəsində kəmərin keçdiyi bir sıra ərazilərdə müəyyən iş yerlərinin açılması, orada yaşayan əhalinin məşğulluğunun təmin olunmasında mühüm rol oynayacaq. Adətən bu kimi böyük layihələrin həyata keçirilməsi yeni iş yerlərinin açılmasına öz təsirini göstərir. Bu nəinki bizdə, bir sıra digər ölkələrdə də belədir. Yəni bu tip meqalayihələrin həyata keçirilməsi həm mövsümi, həm də daimi iş yerlərinin açılmasına müsbət təsir göstərir. O baxımdan yeni iş yerlərinin açılması ilə bağlı gözləntilər reallığa söykənir”.
Vidadi ORDAHALLI
