Martın 12-də Ümumdünya Gömrük Təşkilatının Bakı şəhərindəki Potensialın Gücləndirilməsi üzrə Avropa Regional Ofisində “Dövlət Gömrük Komitəsinə ümumi tranzit proseduru və mallarla ticarətdə sənədləşmənin sadələşdirilməsi konvensiyalarına üzvolma, eləcə də Avropa Yeni Kompüterləşdirilmiş Tranzit Sisteminə (NCTS) qoşulmaya hazirlıq prosesində dəstək” mövzusunda milli seminar başlayıb.
DGK Mətbuat Xidmətindən “Bakı-Xəbər”ə verilən məlumata görə, iki gün davam edəcək seminarda məqsəd Ümumi Tranzit Proseduru haqqında Konvensiyanın üzv dövlət tərəfindən tətbiqi üçün əsas qaydalar barədə iştirakçıları məlumatlandırmaqdan ibarətdir.
Tədbirin açılışında çıxış edən Dövlət Gömrük Komitəsinin sədri, gömrük xidməti general-polkovniki Aydın Əliyev yerləşdiyi coğrafi məkan baxımından qədim İpək Yolunun fəaliyyətində ölkəmizin mühüm rolu barədə məlumat verib. Ümummili lider Heydər Əliyevin Azərbaycanın beynəlxalq ticarətdəki tarixi missiyasını özünə qaytarmaq məsdədilə gördüyü mühüm işlərdən bəhs edən Komitə sədri 1998-ci ildə qədim İpək Yolunun bərpası ilə bağlı Bakıda beynəlxalq konfransın keçirildiyini və mühüm sazişin imzalandığını diqqətə çatdırıb.
Prezident İlham Əliyevin fərmanına əsasən 2009-cu il yanvar ayının 1-dən sərhəd-keçid məntəqələrində “bir pəncərə” sisteminin tətbiqini Komitə sədri bu sahədə atılan mühüm addımlardan biri kimi qiymətləndirib. 2015-ci ilin iyul ayında Nazirlər Kabinetinin iclasında çıxışı zamanı qeyri-neft sektorunun inkişafı, sahibkarlığa dəstək və nəqliyyat sektorunun inkişaf etdirilməsi istiqamətində ölkə başçısının tapşırıqlarını xatırladan Aydın Əliyev bildirib ki, bundan sonra ölkəmizin nəqliyyat sektorunun inkişafı, tranzit imkanlarının gücləndirilməsi istiqamətində mühüm addımlar atılıb. Komitə sədri sonrakı illərdə bir sıra ölkələr üçün nümuəvi qanunvericilik aktları qəbul edildiyini vurğulayaraq nəticədə sərhəd keçid məntəqələrində fəaliyyətin sadələşdirilmiş qaydada həyata keçirilməsi, gömrük rəsmiləşdirilməsi üçün tələb olunan sənədlərin minimuma endirilməsi, elektron bəyannamənin tətbiqi və tranzitin inkişafı ilə bağlı gömrük orqanlarının qarşısında konkret məsələlər qoyulduğunu diqqətə çatdırıb.
Aydın Əliyev bildirib ki, ölkəmizin tranzit imkanlarının artırılması məqsədilə görülən işlər çərçivəsində 2016-cı ilin dekabr ayında təsdiq edilən “Azərbaycan Respublikasında logistika və ticarətin inkişafına dair Strateji Yol Xəritəsi”ndə bu sahədə həyata keçiriləcək konkret tədbirlər müəyyənləşdirilib və həmin tədbirlərin biri kimi Yeni Kompüterləşdirilmiş Tranzit Sisteminə qoşulmaq barədə Azərbaycan gömrük orqanları və əlaqədar qurumlar qarşısında məsələ qoyulub. Ötən ilin dekabr ayında Azərbaycanın xüsusi müşahidəçi statusunu alaraq ilk mərhələni uğurla keçdiyini diqqətə çatdıran Komitə sədri, əlaqədar qurumlarla birlikdə görülən işlərin tezliklə müsbət nəticə verəcəyinə inamını ifadə edib.
Bakı Beynəlxalq Dəniz Ticarəti Limanı, Bakı-Tbilisi-Qars dəmir yolu layihələri, Şimal-Cənub nəqliyyat dəhlizinin inşasından da bəhs edən Aydın Əliyev Səlahiyyətli İqtisadi Operatorlar Beynəlxalq Assosiasiyasının ikinci iclasının bu qurum tərəfindən cari ilin may ayında Bakıda keçirilməsinə qərar verilməsinin də ölkəmizin tranzit imkanlarının genişlənməsində mühüm rol oynayacağını bildirib.
Tədbirdə çıxış edən iqtisadiyyat nazirinin müavini Niyazi Səfərov Prezident İlham Əliyevin həyata keçirdiyi uğulu iqtisadi siyasət nəticəsində nəqliyyat infrastrukturunun yenidən qurulması və ölkəmizin tranzit potensialının gücləndirilməsi istiqamətində görülən işlərdən bəhs edib. Nazir müavini Bakı Beynəlxalq Dəniz Ticarəti Limanı, Gəmiqayırma zavodunun inşası, Bakı-Böyük Kəsik dəmiryolunun yenidən qurulması, bir neçə beynəlxalq hava limanının tikilərək istifadəyə verilməsi, yeni nəqliyyat vasitələrinin alınmasını bu sahədə atılan uğurlu addımlar kimi qiymətləndirib. Niyazi Səfərov Prezident İlham Əliyevin fərmanı ilə 2015-ci ildə “Tranzit Yükdaşımaları üzrə Koordinasiya Şurası”nın yaradıldığını və bu qərarın ölkənin tranzit potensialının gücləndirilməsi sahəsində mühüm işlərin görülməsinə və müsbət nəticələrin əldə olunmasına şərait yaratdığını diqqətə çatdırıb. Belə ki, 2017-ci ildə ölkə ərazisindən 10,4 milyon ton yük daşınıb ki, bu da 2016-cı illə müqayisədə 16 faiz çoxdur.
Tədbirdə ekspert qismində iştirak edən Slovakiya Respublikasının Maliyyə Direktorluğunun Gömrük Bölməsinin direktor müavini Marian Çodak bildirib ki, seminar çərçivəsində iştirakçılara Ümumi Tranzit Konvensiyasına qoşulmağın faydaları, bu konvensiyaya qoşulma qaydaları barədə məlumat veriləcək, layihənin Azərbaycana faydalarından bəhs olunacaq.
Qeyd edək ki, seminarda Slovakiya Respublikasının Maliyyə Direktorluğunun Gömrük Bölməsinin direktor müavini Marian Çodak və Slovakiya Respublikasının Maliyyə Direktorluğunun Gömrük Bölməsinin NCTS üzrə mütəxəssisi Miroslav Bujna tərəfindən iştirakçılara əsas tranzit prosedurları - coğrafi əhatə dairəsi, tranzit gömrük prosedurunun məqsədləri, Ümumi Tranzit Prosedurunun coğrafi tətbiqi, konvensiyaya qoşulmaq üçün şərtlər, tranzit prosedurunun həyata keçirilməsi və digər mövzularda məlumat veriləcək.
Seminarda, Dövlət Gömrük Komitəsi ilə yanaşı, Nəqliyyat, Rabitə və Yüksək Texnologiyalar, Xarici İşlər, Ədliyyə, Maliyyə və İqtisadiyyat nazirliklərinin, Dövlət Sərhəd Xidmətinin, Bakı Beynəlxalq Dəniz Ticarəti Limanının, Azərbaycan Dəmir Yolları, Azərbaycan Xəzər Dəniz Gəmiçiliyi qapalı səhmdar cəmiyyətlərinin, Tranzit Daşımalar üzrə Koordinasiya Şurasının nümayəndələri iştirak edir.
