İlqar Hüseynli: “Bununla yanaşı, biz uzunmüddətli və təminatlı dəstəyin qurulmasına daha çox önəm verməliyik”
Müasir dövrdə bütün ölkələrdə müşahidə olunan kəskin problemlərdən biri işsizlikdir. Məşğul əhali ilə işsizlər ikisi birlikdə ölkənin iş qüvvəsini əmələ gətirir. İşsizlik özünü iş qüvvəsinə olan tələbin təklifdən geri qalmasında göstərir. İşsizlik müxtəlif səbəblərdən əmələ gəlir və başlıca vəzifə onun qarşısının alınmasıdır.
Lakin elə hallar da olur ki, işsizliyin tamamilə aradan qaldırılması mümkün olmur. Son illər Azərbaycanda həyata keçirilən sosial siyasətin əsas istiqamətlərindən biri də məşğulluğa dair tədbirlərin təşkili və işçi qüvvəsindən səmərəli istifadə edilməsidir. Bu istiqamətdə bir sıra tədbirlər görülür.
Bu arada Azərbaycanda işə düzəlməkdə çətinlik çəkən gənclər üçün əlavə iş yerləri yaradan işəgötürənlər həvəsləndiriləcək. Sözügedən məsələ Prezident İlham Əliyevin “Azərbaycan Respublikasında gənclər siyasəti sahəsində idarəetmənin təkmilləşdirilməsi ilə bağlı tədbirlər haqqında” Fərmanına əsasən yaradılmış “Azərbaycan Respublikasının Gənclər Fondu” publik hüquqi şəxsin Nizamnaməsində öz əksini tapıb.
Yeni yaradılmış “Azərbaycan Respublikasının Gənclər Fondu” publik hüquqi şəxsin Nizamnaməsində qeyd edilib ki, gənclərin məşğulluğunu təmin etmək, eləcə də işə düzəlməkdə çətinlik çəkən gənclər üçün əlavə iş yerləri yaradan işəgötürənləri həvəsləndirmək məqsədilə işəgötürənlə bağlanmış razılaşma müqaviləsinə uyğun olaraq, gənclərin işə cəlb edilməsini nəzərdə tutan layihələr çərçivəsində gənclərə ödəniləcək əməkhaqqı 1 ildən çox olmayan müddət ərzində fondun vəsaiti hesabına qismən maliyyələşdiriləcək.
Bütövlükdə, bu, gənclərin işlə təmin olunmasında nə kimi rol oynaya bilər?
Məsələyə münasibət bildirən ekspert İlqar Hüseynlinin sözlərinə görə, bu qərar gənclərin işsizlik probleminin həllində müəyyən qədər rol oynaya bilər: “Reallıq ondan ibarətdir ki, Azərbaycanda gənclərin işsizlik problemi var. İctimai sektorda, gündəlik həyatda bu məsələ özünü göstərir. Eyni zamanda, ictimai yerlərdə gənclərin bundan əziyyət çəkdiyini müşahidə edirik. Görürsən ki, ali məktəbi bitirən tələbələr öz ixtisası üzrə iş tapa bilmirlər. İşəgötürənlər daha çox çalışırlar ki, iş təcrübəsi olanları işlə təmin etsinlər. Sözsüz ki, gənclərin işsizlik probleminin həll edilməsi vacibdir. Bu məqsədlə atılan addımları dəstəkləmək və daha da mükəmməl formaya salmaq lazımdır. Bunları hərtərəfli dəyərləndirmək vacib məsələlərdən biridir. Elə etmək lazımdır ki, bu, gənclərin daimi olaraq işsizlik problemini həll edə bilsin. Yəni müvəqqəti xarakterli olmasın. Belə olsa, əlbəttə ki, daha yaxşı olar. Azərbaycanda fəaliyyət göstərən şirkətlərdə, səhmdar cəmiyyətlərində bu məsələnin həlli ilə bağlı daha geniş imkanlar açılmalıdır. Xüsusən də startapların dəstəklənməsi vacibdir. Hansı ki, son qərarda bu öz əksini tapıb. Bu kimi məqamlar gənclərin işlə təmin olunmasında mühüm rol oynaya bilər. Hər halda, bu, variantlardan biridir və gənclərin işlə təmin olunmasında müəyyən rol oynaya bilər. Bununla yanaşı, biz uzunmüddətli və təminatlı dəstəyin qurulmasına daha çox önəm verməliyik. Yalnız o zaman bu sahədə ciddi nailiyyətlər əldə etmək olar”.
Vidadi ORDAHALLI
