Samir Əliyev: “Bu işdə bankların kreditləşmədə iştirakını təmin etmək lazımdır”
Sahibkarlığın inkişafı dövlətin iqtisadi siyasətinin əsas istiqamətlərindən biridir. Bu istiqamətdə dövlət tərəfindən sahibkarlara lazımi dəstək göstərilir. Açıqlanan statistik rəqəmlərə əsasən, son bir il ərzində Azərbaycanda sahibkarlara 146 milyon manat güzəştli kredit ayrılıb.
İqtisadiyyat nazirinin müavini Sahib Məmmədov jurnalistlərə açıqlamasında qeyd edib ki, Azərbaycanda kiçik və orta sahibkarlığın inkişafı prioritet sahədir: “Hazırda bu sahənin inkişafı üçün müxtəlif güzəştli biznes kreditləri təklif edilir. 2017-ci il ərzində 1953 sahibkara 146 milyon manat güzəştli kredit ayrılıb. İndiyədək Azərbaycanda 4 mindən artıq qadın sahibkara 93,5 milyon manat güzəştli kredit ayrılıb. Bu isə Azərbaycanda artıq geniş sahibkar ordusunun formalaşmasından xəbər verir”.
Son bir il ərzində sahibkarlara 146 milyon manat güzəştli kreditin verilməsi barədə ekspertin fikrini öyrəndik. İqtisadçı-ekspert Samir Əliyev “Bakı-Xəbər”ə açıqlamasında qeyd etdi ki, Sahibkarlığa Yardım Fondu tərəfindən sahibkarlığın inkişafı istiqamətində güzəştli kreditlər verilir: “Sahibkarlığın inkişafı istiqamətində onlara mütəmadi olaraq güzəştli kreditin verilməsi təqdirəlayiqdir. Son bir il ərzində Azərbaycanda sahibkarlara 146 milyon manat güzəştli kreditin verilməsi lazımlı olsa da, azdır. Etiraf edək ki, bu gün sahibkarların pula ehtiyacı daha çoxdur. Xüsusilə də devalvasiyadan sonra bankların kreditləşməni məhdudlaşdırması və ya kredit şərtlərini sərtləşdirməsi sahibkarların vəziyyətinə təsir göstərir. İstənilən biznes üçün pul qıtlığının olması sahibkarlığın inkişafına mənfi təsir göstərir. Bu sahənin inkişafı üçün kreditləşmənin bərpa olunması olduqca vacibdir”.
Həmsöhbətimizin sözlərinə görə, 146 milyon manat güzəştli kreditin verilməsi kiçik və orta sahibkarlığın inkişafına müsbət təsir göstərir: “Sahibkarlığın inkişafı üçün qarşıdakı illərdə onlara daha artıq məbləğdə güzəştli kreditin verilməsinə ehtiyac var. Burda təkcə dövlətin güzəştli kredit siyasətinin inkişaf etdirilməsi yetərli deyil, eyni zamanda, real sektorda mövcud olan risqləri aradan qaldırmaq lazımdır. Real sektorda mövcud olan risqlər aradan qaldırılarsa, banklar da verdiklərin kreditin faizini aşağı salarlar. Nəzərə almaq lazımdır ki, tək dövlətin sahibkarları maliyyə ilə təmin etməyə gücü çatmaz, bu işdə bankların kreditləşmədə iştirakını təmin etmək lazımdır”.
Günel CƏLİLOVA
