Fikrət Yusifov: “Belə bir agentliyin fəaliyyəti ölkə daxilində bankların və başqa kredit təşkilatlarının...”
Məlumdur ki, hökumətin qeyri-neft sektorunun inkişafını təmin etmək məqsədilə hazırda ən çox nail olmaq istədiyi vasitələrdən biri istər daxili, istərsə də xarici mənbələr hesabına investisiyalar cəlb etməkdir. Bundan ötrü bir sıra zəruri addımlar atılır.
Məsələn, xarici investisiya axını üçün yeni mexanizm hazırlamaq məqsədilə investisiya fəaliyyətinin təşviq edilməsi, xarici investorların hüquqlarının qorunması ilə bağlı bir sıra tədbirlər haqda sərəncamları və digər addımları qeyd etmək olar. Həmin sənədlərdə qeyd olunur ki, iqtisadiyyata qoyulan investisiyanın həcminin artırılması üçün bu sahədə islahatların genişləndirilməsi, xüsusilə də özəl təşəbbüskarlığın dəstəklənməsi istiqamətində biznes-investisiya mühiti, həmçinin, investisiyaların qorunması sahəsində qanunvericilik daha da təkmilləşdiriləcək. Bu zaman xarici investorların tərəfdaşlıq zəminində ölkədə əlverişli investisiya mühitinin qorunması sisteminin mövcudluğuna xüsusi diqqət yetirməsi amili ən ali şəkildə nəzərə alınacaq. O da məlumdur ki, bütün bu addımlarla yanaşı, reytinq agentliklərinin göstəriciləri iqtisadiyyata sərmayə qoyuluşunda mühüm rol oynayır. Yəni həmin qurumların dəyərləndirmələri xarici investorlara yön verir.
Bu arada məlum olub ki, Azərbaycanda iqtisadiyyatın inkişaf etdirilməsi ilə bağlı görülən tədbirlərə biri də əlavə olunub. Belə ki, ölkədə Milli Reytinq Agentliyi yaradılacaq. Bunu “Kapital bazarları vasitəsilə maliyyələşmə, listinq və investisiyalar” adlı konfransda Maliyyə Bazarlarına Nəzarət Palatasının Nəzarət Departamentinin direktoru Cavid Nəzərov deyib. Onun sözlərinə görə, “Strateji yol” xəritəsində yerli reytinq agentliyinin yaradılması nəzərdə tutulur: “Biznes olaraq uğurlu alınsa, Milli Reytinq Agentliyinin yaradılması çox vacibdir”.
Maraqlıdır, belə bir agentliyin yaradılmasına ekspertlər necə yanaşırlar?
Məsələyə münasibət bildirən “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov buna bir neçə rakursdan yanaşdı: “Reytinq agentlikləri, bir qayda olaraq, dövlətin, müəssisə və təşkilatların kredit qabiliyyətini və onların fəaliyyətinin başqa cəhətlərini xarakterizə edib qiymət verməklə məşğul olurlar. Dünyada tanınmış reytinq agentliklərinin sayı 100-dən çoxdur. Burada əsas məsələ reytinq agentliyinin qiymət müəyyənləşdirərkən obyektiv mövqedə dayanması və onun kənar təsirlərdən qorunmasının təmin edilməsidir. Biz artıq dünyada qeyri-obyektiv qiymətləndirmələr həyata keçirən və ölkəmizə münasibətdə, bir qayda olaraq, ikili standartlar prizmasından çıxış edən bəzi reytinq agentliklərinin fəaliyyəti ilə yaxından tanışıq. Məsələlərə real qiymət vermək baxımından Milli Reytinq Agentliyinin yaradılmasını düzgün hesab edirəm. Belə bir agentliyin fəaliyyəti ölkə daxilində bankların və başqa kredit təşkilatlarının kredit reytinqlərinin müəyyənləşdirilməsi sahəsində çox mühüm işlər görə bilər. Ölkənin biznes mühiti üçün belə qiymətləndirmə zəruridir. Müəssisə və təşkilatların kreditlər almaq məqsədilə düzgün bank seçimi etməsi üçün bu çox önəmlidir. Ona görə də belə bir addımın atılmasına müsbət yanaşıram”.
Vidadi ORDAHALLI
