Zakir Əhmədov: “Bu, nəticə etibarilə, Azərbaycanda istehsal olunan sənaye məhsullarına dünya bazarında tələbatın artmasına gətirib çıxaracaq”
Azərbaycanda sahibkarlığın inkişafı üçün hər cür şərait yaradılıb. Zaman-zaman bu sahədə islahatlar aparılaraq, biznesin çiçəklənməsinə yeni-yeni imkanlar yaradılır. Məqsəd bu sahəni daha da inkişaf etdirməkdir. Nəzərə almaq lazımdır ki, iqtisadiyyatın çiçəklənməsində azad sahibkarlığın rolu böyükdür. Müşahidələr göstərir ki, bu sahəyə diqqət get-gedə daha da artır. Dövlət üzərinə düşən bütün işləri görür.
Bu arada məlum olub ki, Azərbaycan hökuməti sahibkarlara qlobal sənaye zəncirinə qoşulmaq üçün kömək etmək niyyətindədir. Bununla bağlı mətbuata hökumətdəki mənbələrdən məlumat daxil olub. Bu məqsədlə üç əsas sahələri əhatə edəcək proqram hazırlanacaq. Birincisi, qlobal istehsalçılar tərəfindən Azərbaycana aralıq məhsulların çatdırılması nəzərdə tutulub. Bununla bağlı böyük xarici şirkətlərlə danışıqların aparılmasına kömək göstəriləcək. İkincisi, Azərbaycanda aralıq məhsullarının istehsalı üzrə investisiyaların cəlb edilməsi planlaşdırılır. Məsələn, yerli şirkət mebel istehsal edir. Söhbət ondan gedir ki, bunun üçün lazım olan komponentlərin ölkə daxilində istehsal olunması təşkil olunsun. Yəni bu komponentlərin Azərbaycanda istehsal olunması daha məqsədəuyğun hesab olunur. Üçüncü istiqamət isə, yerli bazarda çalışan xarici investorlarla birgə işləməyi nəzərdə tutur. Bunda məqsəd həm də ondan ibarətdir ki, Azərbaycan məhsullarının yerli şirkətlər tərəfindən istifadəsi genişləndirilsin. Yəni ölkədə fəaliyyət göstərən xarici şirkətlərin ehtiyaclarını müəyyənləşdirmək və onların tələbatını daxili istehsal hesabına ödəmək. Bu istehsalı ölkə daxilində təşkil etməkdən söhbət gedir.
O da aydın olub ki, xarici şirkətlərlə əməkdaşlıq Azərbaycan biznesinə öz iş səviyyəsini beynəlxalq standartlara yüksəltməyə imkan verir. Bu istiqamətdə ən vacib məsələ xarici şirkətlərlə əməkdaşlıq qurmaqdır.
Ümumilikdə, Azərbaycandan olan sahibkarların qlobal sənaye zəncirinə qoşulması perspektivlərini ekspertlər necə dəyərləndirirlər?
Məsələyə münasibət bildirən ekspert Zakir Əhmədovun sözlərinə görə, bu, Azərbaycan üçün ciddi dividendlər vəd edir: “Əvvəla Azərbaycanın ümumi iqtisadi vəziyyəti və potensialı buna bütün mənalarda imkan verir. Çünki ölkə iqtisadiyyatının inkişafı ilə bağlı sistemli tədbirlər görülür və bu, davamlı hal alıb. Bunlardan biri də iqtisadiyyatın beynəlxalq inteqrasiyasını genişləndirməkdir. Nəzərə alsaq ki, Azərbaycan bir sıra iqtisadi və dıgər parametrlərə görə Cənubi Qafqazda lider mövqeyinə sahibdir, o üzdən, bunun üçün hər cür şərait var. Azərbaycanın sənaye sektoru yenidən qurulur və bu zaman ən mütərəqqi texnologiyalardan istifadə olunmasına xüsusi önəm verilir. Yerli sahibkarların dünya bazarında yer tutması çox vacib məsələdir. Bu istiqamətdə hökumətin yardım göstərməsi və bununla bağlı konkret proqramın ortaya qoyulmasına böyük ehtiyac var. Bu, nəticə etibarilə, Azərbaycanda istehsal olunan sənaye məhsullarına dünya bazarında tələbatın artmasına gətirib çıxaracaq. Həmçinin, Azərbaycan dünya bazarında bir sıra məhsulların istehsalına görə ixtisaslaşa bilər. Bu da ölkə iqtisadiyyatının gələcəyi baxımından böyük perspektivlər vəd edir. O baxımdan yaxşı olardı ki, dünyadakı böyük şirkətlər Azərbaycanda istehsal filiallarını açsınlar və yerli sahibkarlarla birgə işləsinlər. Belə olduğu halda, Azərbaycan iqtisadiyyatında ciddi sıçrayış olacağı qaçılmazdır. Ona görə də bu istiqamətdə görülən işlərin perspektivli olacağı qənaətindəyəm”.
Vidadi ORDAHALLI
