Ruslan Atakişiyev: “Yaxşı olardı ki, bununla bağlı məqamlar qanunda öz əksini tapsın və sərmayədarları cəlb etsin”
Azərbaycan iqtisadiyyatının dayanıqlı inkişafını təmin edən faktorlardan biri də ölkədə investisiya fəaliyyətinin daha da yaxşılaşdırılmasıdır. Çünki investisiya mühiti nə qədər yaxşı olsa, bu bir o qədər ölkə iqtisadiyyatına daha çox sərmayənin yatırılmasına gətirib çıxaracaq. Nəzərə alsaq ki, Azərbaycanda qeyri-neft sektorunun inkişaf etdirilməsi başlıca məqsəd olaraq qarşıya qoyulub, o zaman buna xüsusi diqqət göstərilməlidir.
Müşahidələr, aparılan təhlillər onu göstərir ki, xarici investorlar ölkədə əlverişli investisiya qorunma sisteminin mövcudluğuna xüsusi diqqət ayırırlar. Bu baxımdan investisiya imkanlarının genişlənməsinə imkan verən çərçivənin qurulması mühüm əhəmiyyət kəsb edir. Bu ilin əvvəlində investisiya fəaliyyətinin təşviq edilməsi və xarici investorların hüquqlarının qorunması ilə bağlı imzalanan sərəncam bir islahat tədbiridir. Məqsəd 2025-ci ilə qədər ölkəyə xarici investisiya axınını daha da artırmaqdan ibarətdir. Bu istiqamətdə kompleks işlər görülür. Yeni “İnvestisiya fəaliyyəti haqqında” qanunun hazırlanması özündə bir neçə istiqaməti birləşdirir. Bir sözlə, bu sahədə aparılacaq islahatlar iqtisadiyyatda özəl investisiyaların payının artmasına təkan verəcək.
Bu arada nəqliyyat, rabitə və yüksək texnologiyalar nazirinin müavini Elmir Vəlizadə də mətbuata açıqlamasında bildirib ki, Azərbaycanda yeni investisiya qanunu hazırlanır: “Hesab edirəm ki, bu qanun layihəsi müasir dünya çağırışlarına cavabdeh olacaq, ölkəmizə gələn investorlar üçün daha münbit şərait yaradacaq”.
Bütövlükdə, yeni qanunda nələrə xüsusi diqqət yetirilməlidir? Bununla bağlı ekspertlər nə tövsiyə edirlər?
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyev bununla bağlı bir sıra məqamlara toxundu: “İnvestisiya şəraitinin daha da yaxşılaşdırılması istiqamətində qanunvericiliyin təkmilləşdirilməsinə hər zaman ehtiyac var. Bir növ, bu, zamanın tələbidir. Zaman dəyişdikcə, yeni şəraitə uyğun qanunvericilik yenilənməlidir. Bu, bütün mütərəqqi ölkələrdə belədir. Məsələ ondadır ki, qlobal məkanda bu gün investisiya cəlbi istiqamətində ölkələr arasında bir rəqabət var. Burada söhbət təkcə ondan getmir ki, biz ancaq xarici investisiyanın cəlbi uğrunda mübarizə aparmalıyıq. Bəli, ölkə iqtisadiyyatında xarici investorlar da fəal iştirak etməlidirlər. Ancaq vacib məsələlərdən biri də məhz daxili investisiyanın ölkə iqtisadiyyatına yönəldilməsidir. Son dövrlər Azərbaycan iqtisadiyyatında formalaşmış maliyyə kütləsinin investisiya şəklində yaxın qonşu ölkələrə axını sürətlənməkdədir. Xüsusən də qonşu Gürcüstana bu investisiya daha çox gedir. Təbii ki, bu da Azərbaycanda investisiya mühitinin daha da yaxşılaşdırılması zərurətini ortaya qoyur. Yəni daxili investisiyanın ölkə iqtisadiyyatının müxtəlif sahələrinə yönəldilməsinə və bunun stimullaşdırılmasına böyük ehtiyac var. Ona görə də daxili investisiyaların iqtisadiyyata yönəldilməsi tədbirlərinin genişləndirilməsinə və bunun qanunvericilikdə öz əksini tapmasına ehtiyac var. Belə olsa, o zaman yerli sahibkarlar iqtisadiyyata daha çox sərmayə qoymaqda maraqlı olacaqlar. Yaxşı olardı ki, bununla bağlı məqamlar qanunda öz əksini tapsın və sərmayədarları cəlb etsin. Hesab edirəm ki, bu kimi məqamları nəzərə alan yeni qanunvericilik ölkə daxilində formalaşmış kapitalın iqtisadiyyata yönəldilməsində səmərəli rol oynayacaq”.
Vidadi ORDAHALLI
