Aydın Hüseynov: “İqtisadiyyatın inkişafı ilə bağlı qəbul olunan dövlət proqramlarının ölkənin potensialına söykənməsi böyük perspektivlər vəd edir”
2018-ci ildə Azərbaycanda iqtisadi artım 1,2 faiz səviyyəsində gözlənir. Bu barədə mətbuata İstanbulda yerləşən ECO Ticarət və İnkişaf Bankındakı (ETDB) mənbə məlumat verib.
Bankdaki mənbə hesab edir ki, Azərbaycanda iqtisadi artım ”Şahdəniz” qaz-kondensat yatağı layihəsinin işlənməsinin ikinci mərhələsi nəticəsində mümkün olacaq. Bununla yanaşı, məlumatda digər görülən işlərə də yer verilib: “Azərbaycan hökuməti qeyri-neft sektorunun inkişafı üçün genişmiqyaslı islahatlar aparır. Bu, xidmət sektorunda və kənd təsərrüfatında artımı stimullaşdırmaq məqsədi daşıyır.
Məlumatdan o da aydın olub ki, hökumətin kənd təsərrüfatı sektorunun gücləndirilməsi və kənd təsərrüfatı məhsullarının emalı, qeyri-neft ixracının stimullaşdırılması ilə bağlı gördüyü tədbirlər iqtisadi artımın inkişafına kömək edəcək: “Ölkədə yeridilən ağıllı iqtisadi siyasət və son illərdə həyata keçirilən iqtisadi islahatlar nəticəsində daha çox müsbət nəticənin əldə olunacağı gözlənir. Son on il ərzində Azərbaycanda iqtisadi inkişaf, rifah və beynəlxalq biznes üçün mühüm addımlar atılıb. Daha yaxşı nəticələr əldə etmək üçün və davamlı inkişafın təmin edilməsi naminə Azərbaycan qeyri-neft sektorunun inkişafı üçün genişmiqyaslı islahatlar həyata keçirir. Sənaye istehsalının və kənd təsərrüfatının inkişafına dair proqramlar bunu deməyə əsas verir”.
Dəyərləndirmədən belə aydın olur ki, dünyada tanınmış bankın Azərbaycandan gözləntiləri böyükdür. Yəni ölkədə həyata keçirilən iqtisadi siyasətin ciddi müsbət nəticələrə gətirib çıxaracağına əminlik var.
Maraqlıdır, bəs ekspertər buna necə yanaşırlar? Məsələyə münasibət bildirən millət vəkili Aydın Hüseynovun sözlərinə görə, Azərbaycan iqtisadiyyatı ilə bağlı səslənən nikbin proqnozlar reallığı əks etdirir. Onun fikrincə, deyilənlər həm də elmi əsaslara söykənir: “Hesab edirəm ki, deyilənlər həqiqəti əks etdirir və öz müsbət nəticəsini verəcək. Həyata keçirilən iqtisadi siyasət, aparılan islahatlar ciddi müsbət nəticə əldə etməyə əminlik yaradır. Ümumilikdə, bu uğurlar davam edəcək. Bunu şərtləndirən bir sıra iqtisadi faktorlar var və bunları nəzərdən qaçırmaq olmaz. Nəzərə almaq lazımdır ki, ölkənin bütün sektorlarında islahatlar aparılır və bunlar kompleks xarakterlidir. Xüsusən də maliyyə-bank sektorunda aparılan islahatlar, struktur dəyişiklikləri, iqtisadiyyatın bütün sahələrinə elmi şəkildə yanaşma, konkret dövlət proqramlarının qəbul olunması belə deməyə əsas verir. İqtisadiyyatın inkişafı ilə bağlı qəbul olunan dövlət proqramlarının ölkənin potensialına söykənməsi böyük perspektivlər vəd edir. Bu kimi atılan addımlar Azərbaycanın iqtisadi uğurlarını daha da sürətləndirəcək. Əldə olunan nəticələrin miqyasını daha da genişləndirəcək. Bunun nəticəsində milli iqtisadiyyatımız daha da inkişaf edəcək. Ona görə də gözləntilər böyükdür və hesab edirəm ki, bunun kifayət qədər əsası var”.
Vidadi ORDAHALLI
