Əli Əlirzayev: “Bütün hallarda, 160 milyon manat vəsaitin ayrılması mütərəqqi haldır”
Ölkənin sosial-iqtisadi həyatında xüsusi əhəmiyyət kəsb etdiyi üçün, qeyri-neft sektorunun prioritet sahələrindən biri də kənd təsərrüfatıdır. Təsadüfi deyil ki, kənd təsərrüfatı məhsullarının istehsalı və emalı sektoru ötən dövr ərzində iqtisadiyyatın əsas sektorlarından biri kimi müəyyənləşdirilib.
Bu sahədə görülən məqsədyönlü tədbirlər nəticəsində Azərbaycanda aqrar sektorun inkişafı üçün əlverişli şərait yaradılıb. Reallıq ondan ibarətdir ki, bu gün Azərbaycanın sosial-iqtisadi inkişafı dayanıqlı və rəqabətədavamlı şəkildə inkişaf edir. Bu uğurların əsasında düşünülmüş, uzaqgörən siyasət dayanır.
Aqrar sektorda uğur əldə etməyi şərtləndirən faktorlardan biri də onun texniki təminat səviyyəsinin yaxşılaşdırılmasıdır. Kənd təsərrüfatında müasir texniki vasitələrdən istifadə olunması məhsuldarlığı artırmaqla yanaşı, məhsulun itkisiz yığılmasını da təmin edir. Bu baxımdan kənd təsərrüfatı texnikasının tələblərə cavab verəcək səviyyədə olması vacib amildir. Son dövrlərdə ölkə iqtisadiyyatının əsas prioritet sahələrindən olan aqrar sektorda dövlət dəstəyinin gücləndirilməsi istiqamətində bir sıra mühüm işlər görülüb. Həyata keçirilən tədbirlər çərçivəsində “Aqrolizinq” Açıq Səhmdar Cəmiyyəti on mindən çox müxtəlif təyinatlı kənd təsərrüfatı texnikası, o cümlədən müasir tipli pambıqyığan və taxılbiçən kombaynlar, traktorlar, yedəklər və digər kənd təsərrüfatı texnikası alaraq ölkəyə gətirib.
Bu arada ölkə başçısı aqrar sahənin texniki təminatının gücləndirilməsi ilə bağlı tədbirlər haqqında sərəncam imzalayıb. Sərəncama əsasən, uzun müddət istismarda olmuş kənd təsərrüfatı texnikasının bir hissəsinin texniki parametrlərinin və keyfiyyət göstəricilərinin müasir standartlara uyğun gəlməməsi və dıgər səbəblərlə əlaqədar bu sahəyə 160 milyon manat vəsait ayrılıb.
Ümumilikdə, sözügedən vəsait kənd təsərrüfatının texniki təminatının yaxşılaşmasında nə kimi rol oynayacaq?
Məsələyə münasibət bildirən iqtisadçı-alim Əli Əlirzayevin sözlərinə görə, bununla bağlı dövlət büdcəsindən ayrılan vəsait kənd təsərrüfatının inkişafına müsbət təsir göstərəcək: “Hesab edirəm ki, bu məqsədlə ayrılan vəsaitin hansı sahələr üçün daha vacib olması araşdırılıb təhlil olunmalıdır. Aydınlaşdırmaq lazımdır ki, aqrar sahənin hansı sektoru daha vacib əhəmiyyət kəsb edir və texniki təminatın yaxşılaşdırılmasına ehtiyac var. Fikrimcə, texniki təminatla bağlı bir sıra sahələrə diqqət etmək lazımdır. Çalışmaq lazımdır ki, sözügedən vəsait hesabına ölkəyə müasir kənd təsərrüfatı texnikasının gətirilməsi genişləndirilsin. Digər tərəfdən, bu sahədə gübrə istehsalına xüsusi önəm verilməlidir. Çünki kənd təsərrüfatında keyfiyyətli gübrəyə böyük ehtiyac var. Bu, məhsuldarlığın artmasında ciddi rol oynayır. Azərbaycan bu məhsulları əsasən idxal edir ki, bu da məhsulun maya dəyərinin artmasına öz təsirini göstərir. Ona görə də biz bunların istehsalını ölkə daxilində genişləndirməliyik. Bütün hallarda, bu məqsədlə 160 milyon manat vəsaitin ayrılması mütərəqqi haldır. Çünki kənd təsərrüfatı ölkə iqtisadiyyatında prioritet sahə seçilib. Bu sahənin kapital ehtiyatlarına ehtiyacı çoxdur. Nəzərə almaq lazımdır ki, kənd təsərrüfatı kapital, əməktutumlu sahədir. Bu sahəyə yeni texnologiyaların cəlb olunmasına və tətbiq edilməsinə ehtiyac var. Həmçinin, kənd təsərrüfatı bazarının genişləndirilməsinə ehtiyac var. Keyfiyyətli məhsul istehsal etmək üçün onun yaxşı qablaşdırılması da vacib şərtlərdən biridir. Bu baxımdan kənd təsərrüfatı infrastrukturunun yaxşılaşdırılması və bununla paralel texniki təchizatın qurulması yaxşı perspektiv vəd edir. Güman edirəm ki, bu istiqamətdə görülən işlər, atılan addımlar öz bəhrəsini verəcək”.
Vidadi ORDAHALLI
