Ruslan Atakişiyev: “Tədbirlər görülən zaman əhalinin istehlak səbəti, ehtiyac meyarlarının nəzərə alınması müsbət haldır”
Məlum olduğu kimi, Azərbaycan Prezidenti İlham Əliyev “Sosial müavinətlərin məbləğinin artırılması haqqında”, “Beşdən çox uşağı olan qadınlara verilən müavinətin məbləğinin artırılması haqqında” və “Uşağa qulluğa görə qismən ödənişli sosial məzuniyyətdə olanlara verilən müavinətin artırılması haqqında” sərəncamlar imzalayıb.
Sərəncamlar barədə Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr şöbəsi məlumat yayıb. Məlumatda bildirilir ki, “Sosial müavinətlərin məbləğinin artırılması haqqında” sərəncamla yaşa görə, ümumi xəstəlik, Azərbaycanın ərazi bütövlüyünün, müstəqilliyinin və Konstitusiya quruluşunun müdafiəsi, 1990-cı ilin 20 Yanvar hadisələri, hərbi xidmət dövründə xəstələnmə, əmək zədəsi və peşə xəstəliyi, hərbi əməliyyatlar keçirilən zonada olmaq, hərbi xidmət vəzifələrini yerinə yetirmək, Çernobıl AES-də qəzanın ləğvi, Çernobıl AES-də hərbi xidmətlə əlaqədar səbəblərdən ümumi səbəbdən əlilliyə görə, ailə başçısını itirməyə görə sosial müavinət alanlara, sağlamlıq imkanları məhdud 18 yaşınadək uşaqlara, müharibə veteranlarına, aztəminatlı (ünvanlı dövlət sosial yardımı alan) ailələrdəki 1 yaşınadək uşaqlara, müharibə əlilləri və onlara bərabər tutulanların, şəhid ailələrinin və müddətli hərbi xidmət qulluqçularının uşaqlarına və qanunvericilikdə nəzərdə tutulan digər kateqoriyalara aid şəxslərə təyin olunan aylıq sosial müavinətlərin məbləği 2018-ci il martın 1-dən orta hesabla 10 faiz artırılacaq: “Uşağın doğulmasına görə, radiasiya qəzası nəticəsində zərər çəkmiş şəxslərə hər il müalicə üçün, dəfn üçün verilən birdəfəlik müavinətlərin də növbəti ayın 1-dən orta hesabla 10 faiz artırılması təmin ediləcək. “Beşdən çox uşağı olan qadınlara verilən müavinətin məbləğinin artırılması haqqında” Sərəncam isə beşdən çox uşağı olan qadınların sosial müdafiəsini gücləndirmək və onlara dövlət qayğısını artırmaq məqsədinə xidmət edir. Sərəncama əsasən, həmin qadınlara hər bir uşağa görə təyin olunan müavinətin, "Uşağa qulluğa görə qismən ödənişli sosial məzuniyyətdə olanlara verilən müavinətin artırılması haqqında” Sərəncamla isə uşağa qulluğa görə onlara verilən müavinətin məbləği növbəti aydan 10 faiz artırılacaq. Beləliklə, hər üç sərəncam aylıq və birdəfəlik sosial müavinət alan şəxslərdən ibarət olmaqla, ümumilikdə 560 minə yaxın insana şamil olunacaq. "Sosial sığorta haqqında” Azərbaycan Respublikasının Qanununa uyğun olaraq, sığortaolunanlara üç yaşınadək uşağa qulluğa, uşağın anadan olmasına görə və dəfn üçün müavinətlər məcburi dövlət sosial sığorta vəsaitləri hesabına, digər sosial müavinətlər isə dövlət büdcəsinin vəsaiti hesabına ödənilir”.
Ümumilikdə, 560 minə yaxın şəxsin sosial müavinətinin artırılması onların sosial həyatına necə təsir edəcək?
İqtisadçı-ekspert Ruslan Atakişiyev “Bakı-Xəbər”ə açıqlamasında qeyd etdi ki, 2017-ci ilin sonunda 2018-ci ilin dövlət büdcəsi qəbul olunan zaman dövlət tərəfindən qarşıdakı il üçün sosial həssas qrupların rifahının yaxşılaşdırılması qarşıya məqsəd kimi qoyulmuşdu: “İl başlayandan bəri bunun təzahürü görünməkdədir. Bu tip sərəncamların imzalanması məqsədəuyğundur. Dəyişən bazar iqtisadiyyatı şəraitində mütəmadi olaraq iqtisadi inkişafın tempində, müvafiq şəkildə həm də qiymətlərdə dəyişiklik baş verir. Tədbirlər görülən zaman əhalinin istehlak səbəti, ehtiyac meyarlarının nəzərə alınması müsbət haldır. Bu baxımdan nəzər yetirsək, sosial qayğıya ehtiyacı olan şəxslərin müavinətinin artırılması məqsədəuyğundur və zəruridir”.
Həmsöhbətimizin sözlərinə görə, sosial təbəqənin hər zaman qayğıya ehtiyacı var. Sosial təbəqəyə aid olan şəxslərin bir qismi bəzi hallarda işləmək gücündə deyil. Müharibə zamanı əlil olan şəxsin və ya ailə başçısını itirən şəhid ailəsinin geniş əmək qabiliyyəti olmur. Bu səbəbdən də əhalinin həssas təbəqəsi sayılan insanların sosial dolanışığının təmin olunması, onlara dövlət tərəfindən qayğı göstərilməsi vacibdir. Sosial müavinətin artırılması sosial qayğıya ehtiyacı olan şəxslərin sosial-iqtisadi həyatına müsbət təsir edəcək.
Günel CƏLİLOVA
