Rəşad Həsənov: “Strateji yol xəritələri çərçivəsində müxtəlif öhdəliklərin yerinə yetirilməsi bu il ərzində qarşıya hədəf kimi qoyulub və bu hədəflər üzrə qiymətləndirmələr aparılıb”
Dünya Bankı (DB) və Asiya İnkişaf Bankının (AİB) rəsmiləri Azərbaycan iqtisadiyyatı ilə bağlı proqnozunu açıqlayıb. Açıqlanan proqnozda qeyd olunur ki, Azərbaycan iqtisadiyyatı qazla birgə dövlət gəlirlərinin 75, ÜDM-in isə 45 faizini təşkil edən neftin qiymətinin düşməsi ilə əlaqədar ciddi şəkildə zərər çəkib. Lakin o, ötən il sabitləşərək neftin qiymətinin bərpası və xidmət, kənd təsərrüfatı sektorunun genişləndirilməsi sayəsində 0,1 faiz artım nümayiş etdirdi.
DB-nin Azərbaycandakı nümayəndəliyinin rəhbəri Navid Həsən Naqvi "Reuters" agentliyinə müsahibəsində deyib: "Hələ çox işlər görülməlidir. Hökumət iqtisadiyyatın neft sektoru ilə əlaqəli olmayan sahələrin artımını stimullaşdırmaq üçün tədbirlər görür.
Azərbaycanda siyasətçilər çeşidlənmədən danışarkən, kənd təsərrüfatı sektorunun inkişafı, xidmət sektorunun inkişafını nəzərdə tuturlar".
O bildirib ki, Dünya Bankı 2018-ci ildə Azərbaycan iqtisadiyyatının 1-1,5 faiz artacağını gözləyir.
Cari il ərzində ölkə iqtisadiyyatında 1-1,5 faiz artımın olacağını ekspertlər də təsdiqləyirlər.
İqtisadçı-ekspert Rəşad Həsənov “Bakı-Xəbər”ə açıqlamasında qeyd etdi ki, Azərbaycan hökuməti tərəfindən də ölkə iqtisadiyyatında artımın olacağı proqnozlaşdırılır: “Dövlət büdcəsi xərcləri 2017-ci illə müqayisədə 2018-ci ildə 3 milyard manat olacaq. Bu xərclərin əhəmiyyətli hissəsi tikinti sektoruna yönəlmiş vəsaitlər olacaq. Bu isə son iki ildə iqtisadiyyatın ən zəif sahələrindən biri olan tikinti sektorunun canlanmasına səbəb olacaq. Həmçinin, onu da deyim ki, strateji yol xəritələri çərçivəsində müxtəlif öhdəliklərin yerinə yetirilməsi bu il ərzində qarşıya hədəf kimi qoyulub. Bəllidir ki, strateji yol xəritələrinin hədəfləri üzrə qiymətləndirmələr aparılıb. İrəli sürülən proqnozlar müəyyən edilib. Hədəflər üzrə yaradılan əlavə dəyər iqtisadiyyatda müəyyən inkişafı şərtləndirəcək. Əlavə faktor kimi onu da qeyd etmək lazımdır ki, Azərbaycan iqtisadiyyatı 2016-cı ildə təxminən 2,6 faiz kiçilib. İqtisadiyyatın bazasının kiçilməsi 2018-ci ildə artım imkanlarını müəyyən qədər genişləndirir. Sadəcə, 2018-ci ildə korelyasiya prosesini müşahidə edəcəyik. Bu, iqtisadiyyata öz təsirini göstərəcək. Bundan başqa, irihəcmli layihələrin il ərzində təhvil verilməsi də nəzərdə tutulur. Bəllidir ki, 2017-ci ilin sonunda Bakı-Tiflis-Qars dəmir yolu istifadəyə verildi. Bu isə 2018-ci ildə ölkənin nəqliyyat sektorunda tranzit gəlirlərinə müsbət təsir göstərəcək. Turizm strategiyası çərçivəsində həyata keçirilən tədbirlər nəticəsində ölkənin turizm sektorunda böyük inkişaf gözlənir. Kənd təsərrüfatı ilə bağlı bir sıra dövlət proqramları qəbul olunub”.
Həmsöhbətimizin fikrincə, ilin ikinci yarısında TANAP layihəsi təhvil veriləcək. Bu layihənin ilk qaz ötürməsi ilin ikinci yarısında baş tutacaq ki, bu da ilin sonuna qədər ölkəyə əlavə enerji mənşəli gəlirlər gətirəcək. Bu faktorlar nəticəsində ölkə iqtisadiyyatında, xüsusilə də qeyri-neft sektorunda inkişaf baş verəcək.
Günel CƏLİLOVA
