Vüqar Bayramov: “Azərbaycan həmin toplantı sayəsində öz potensialını və imkanlarını dünyaya təqdim etmək fürsəti qazanacaq”
Bir çox beynəlxalq tədbirlərin Azərbaycanda keçirilməsi ölkənin regionun siyasi, iqtisadi və mədəni mərkəzinə çevrildiyini göstərir. Reallıq ondan ibarətdir ki, Bakı şəhərinin mühüm beynəlxalq tədbirlərə evsahibliyi etməsi artıq bir ənənə halını alıb. Profilindən asılı olmayaraq, müxtəlif mövzularda geniş beynəlxalq tədbirlər Bakıda çox uğurla təşkil olunur.
Paytaxtda beynəlxalq tədbirlərin uğurla keçirilməsi ölkəmizin dünya miqyasında nüfuzunun yüksəldiyini bir daha sübuta yetirir. Belə olmasaydı, o zaman bir belə tədbir Azərbaycanda keçirilməzdi. Rəsmi Bakının Avropa və dünya miqyaslı siyasi, iqtisadi və humanitar tədbirlərə yüksək səviyyədə evsahibliyi etməsi Şərqlə Qərb arasında multikultural mərkəz rolunu oynaması ilə şərtlənir. Azərbaycanın yüksək təşəbbüskarlığı ilə təşkil edilən çoxsaylı mötəbər beynəlxalq tədbirlər Bakını artıq regionun “diplomatik mərkəzinə” çevirib.
Bu arada məlum olub ki, Azərbaycan növbəti beynəlxalq tədbirə evsahibliyi etməyə iddialıdır. Belə ki, Azərbaycan Dünya Bankı və Beynəlxalq Valyuta Fondu Qrupunun İdarəetmə şuralarının illik iclasının Bakıda keçirilməsi üçün müraciət edib. Söhbət 2021-ci ildə keçiriləcək iclasdan gedir. Məsələ ondadır ki, Dünya Bankı bu ilin payızında Bakı və digər şəhərlərin namizədliklərini nəzərdən keçirəcək.
Xatırladaq ki, hər il Dünya Bankı və Beynəlxalq Valyuta Fondu çoxlu sayda iqtisadi məsələlərin müzakirə olunduğu iclas keçirir. Bu iclaslarda yoxsulluğun azaldılması, beynəlxalq iqtisadi əməkdaşlıq kimi məsələlər nəzərdən keçirilir. Bu iclaslar hər il Vaşinqtonda, hər üç ildən bir isə fərqli şəhərlərdə keçirilir.
Ümumilikdə, Azərbaycanın 2021-ci ildə sözügedən tədbirə evsahibliyi şansları nə qədərdir və həmin tədbirin Bakıda keçirilməsinin nə kimi əhəmiyyəti var? Sözügedən məsələyə aydınlıq gətirən iqtisadçı-ekspert Vüqar Bayramovun sözlərinə görə, tədbir Bakıda keçirilsə, bunun bir sıra faydaları olacaq: “Əvvəla Bakının şansları böyükdür. Digər tərəfdən, məsələ ondadır ki, DB ilə BVF-nin illik toplantısı dünyanın ən böyük maliyyə toplantılarından biri kimi qiymətləndirilir. Nəzərə almaq lazımdır ki, dünyanın əksər ölkələrinin maliyyə nazirləri, bəzi hallarda hökumət başçıları, eyni zamanda iş adamları və vətəndaş cəmiyyətinin liderləri həmin toplantıya qatılırlar. Nəticə etibarilə sözügedən toplantı yalnız BVF-nin şəbəkəsini deyil, bütövlükdə, fərqli ölkələrin rəsmiləri daxil olmaqla çoxlu sayda ölkəni əhatə edir. O baxımdan, belə bir mötəbər tədbirin Bakıda keçirilməsinin əhəmiyyəti yetərincə böyükdür. Adətən BVF və DB-nin illik toplantıları Vaşinqtonda, Nyu-Yorkda keçirilir. Yəni Birləşmiş Ştatlar toplantılara daha çox evsahibliyi edir. Sözsüz ki, həmin toplantının Bakıda keçirilməsi reallaşsa, bu, Azərbaycan üçün əhəmiyyətli olacaq. O baxımdan əhəmiyyətlidir ki, Azərbaycan həmin toplantı sayəsində öz potensialını və imkanlarını dünyaya təqdim etmək fürsəti qazanacaq. Çünki belə bir toplantının Azərbaycanda keçirilməsi yüksək səviyyəli qonaqların ölkə iqtisadiyyatı ilə tanış olmaq imkanını yaradacaq. Eyni zamanda, təbii ki, bu həm də Azərbaycan potensialının təqdimatı baxımından olduqca vacibdir. Azərbaycanın regiondakı mövqeyinin daha da gücləndirilməsi baxımından toplantının Bakıda keçirilməsi çox əhəmiyyətlidir. Ona görə də sözügedən tədbir iqtisadi və strateji baxımdan Azərbaycan üçün ciddi əhəmiyyət daşıyır. O üzdən, belə bir tədbirin Azərbaycanda keçirilməsi çox yaxşı olardı”.
Cəmilə QARAYEVA
