Fikrət Yusifov: “Bu sahənin inkişafı məqsədilə qəbul olunan proqramlarda nəzərdə tutulan tədbirlərin maliyyələşdirilməsi...”
Ölkənin sosial-iqtisadi həyatında xüsusi əhəmiyyət kəsb edən sahələrdən biri də kənd təsərrüfatıdır. Qeyri-neft sektorunun prioritet sahələrindən olan kənd təsərrüfatı məhsullarının istehsalı və emalı getdikcə genişlənir. Görülən məqsədyönlü tədbirlər nəticəsində Azərbaycanda bu sektorun inkişafı üçün əlverişli şərait yaradılıb.
Kənd təsərrüfatının ənənəvi sahələrindən olan pambıqçılığın, tütünçülüyün, baramaçılığın sürətli inkişafı, kənd təsərrüfatı məhsullarına tələbatın ödənilməsi, emal müəssisələrinin xammal təminatının yaxşılaşdırılması və emal sənayesinin genişlənməsi istiqamətində dövlət dəstəyinin gücləndirilməsi ilə əlaqədar bir sıra işlər görülüb. Eləcə də ölkənin ixrac potensialının yüksəldilməsi, kənd təsərrüfatı məhsullarının istehsalı və emalı sahəsində fəaliyyət göstərən kiçik və orta sahibkarların innovativ qabiliyyətlərinin artırılması, yüksək məhsuldarlığın əldə olunması və digər məsələlərlə bağlı mühüm addımlar atılıb. Məqsəd ölkənin aqrar məhsullara olan tələbatını daxili istehsal hesabına təmin etməkdir. Görülən işlər öz səmərəsini verir. Məsələn, ötən il Azərbaycan 1,2 milyon ton taxıl idxal edib. Müqayisə üçün qeyd edək ki, 2016-cı ildə idxalın həcmi 1,6 milyon ton olub.
Kənd təsərrüfatı naziri Heydər Əsədov mətbuata açıqlamasında bildirib ki, Azərbaycanda müxtəlif kənd təsərrüfatı sahələrinin inkişafı üzrə proqramların qəbul olunması bu sahələrdə idxaldan asılılığı əhəmiyyətli dərəcədə azaltmağa imkan verəcək. Nazir qeyd edib ki, ötən ilin iyulundan Azərbaycanda bununla bağlı 3 proqram, 2018-ci ilin əvvəlindən isə daha 3 proqram qəbul olunub.
Bütövlükdə, sözügedən proqramlar idxaldan asılılığın minimuma endirilməsində nə kimi rol oynayacaq?
Məsələyə münasibət bildirən “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifovun sözlərinə görə, son illər aqrar sektorun inkişafına dövlət qayğısı kifayət qədər artıb: “Bu sahənin inkişafı məqsədilə qəbul olunan proqramlarda nəzərdə tutulan tədbirlərin maliyyələşdirilməsi üçün dövlət büdcəsindən hər il böyük həcmdə maliyyə vəsaitləri ayrılıb. Məqsəd daxili bazarın aqrar sektorda istehsal olunan məhsullara olan tələbatını tam ödəməkdən və ixrac potensialını genişləndirmək hesabına ölkəyə daha çox valyuta axınını təmin etməkdən ibarətdir. Bu sahədə son bir neçə ildə pozitiv nəticələr əldə olunsa da, gözləntilər daha böyükdür. Biz hər il özümüzdə istehsalı mümkün ola bilən kənd təsərrüfatı məhsullarının idxalına yüz milyonlarla dollar vəsait xərcləyirik. Bu sahəyə aid çox az məhsullar var ki, onların idxalı daha sərfəlidir, qalan əksər məhsulları isə burada istehsal edib özümüzü təmin etmək iqtidarındayıq. Bu gün dövlət real sektorda, xüsusilə də onun aparıcı sahəsi olan aqrar sahədə inqilabi dəyişikliklər həyata keçirir. Bunun belə olduğunu bir çox kənd təsərrüfatı məhsullarının istehsalı sahəsində son üç ildə əldə olunan uğurlar da sübut edir. Görünən budur ki, müasir dövrdə aqrar sektorda məhsulların istehsalını artırmaq sahəsində beynəlxalq aləmdə mövcud olan təcrübənin istifadə edilməsi və yeni texniki imkanların tətbiqi məhsuldarlığın bir neçə dəfə artırılmasına imkan verir. Deməli, indi keçmişdəki zirvə göstəricilərini də geridə qoymaq şansları mövcuddur və bu imkanlar gerçək bir şəkildə reallaşmaqda davam edir. Azərbaycanda ənənəvi sahə olan aqrar sektor öz inkişafının yeni mərhələsinə qədəm qoyub. Son bir neçə il ərzində Azərbaycana möhkəm valyuta gətirə biləcək pambığın, baramanın, tütünün və başqa məhsulların istehsalında yüksək nəticələr əldə edilib”.
Cəmilə QARAYEVA
