Fikrət Yusifov: “Hazırda Azərbaycan hökuməti qeyri-neft sənayesi və aqrar sektorda istehsal edilən məhsulların “Made in Azerbaijan” brendi ilə dünya bazarlarında öz layiqli yerini tutması istiqamətində ciddi işlər görür”
Aparılan araşdırmalara görə, ötən illə müqayisədə Azərbaycanın aqrar sektoru 4,3 faiz artıb. Dövlət Statistika Komitəsinin yaydığı məlumatda qeyd olunur ki, bu ilin yanvar ayında Azərbaycanda kənd təsərrüfatında yaz-tarla işlərinə hazırlıqla yanaşı, diri çəkidə 39,4 min ton ət, 151,1 min ton süd, 168,6 milyon ədəd yumurta, 9,5 min ton tərəvəz istehsal olunub.
Ötən ilin yanvar ayı ilə müqayisədə ət istehsalı 3,4 faiz, süd istehsalı 0,6 faiz, yumurta istehsalı 16,0 faiz, tərəvəz istehsalı 1,6 dəfə artıb.
Ümumilikdə isə son 1 ildə kənd təsərrüfatının ümumi məhsulunda 4,3 faiz, o cümlədən heyvandarlıq məhsullarının istehsalında 3,6 faiz, bitkiçilik məhsullarının istehsalında isə 33,5 faiz artım olub.
Ekspertlər son bir il ərzində ölkənin aqrar sektorunda inkişafın qeydə alınmasının gözlənilən olduğunu düşünürlər.
"Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov “Bakı-Xəbər”ə açıqlamasında qeyd etdi ki, Azərbaycanda ənənəvi sahə olan aqrar sektor öz inkişafının yeni mərhələsinə qədəm qoyub: “Son bir neçə il ərzində Azərbaycana möhkəm valyuta gətirə biləcək pambığın, baramanın, tütünün və başqa məhsulların istehsalında yüksək nəticələr əldə edilib. Yola saldığımız 2017-ci ildə aqrar sektorda ümumi məhsul istehsalı 4,3 faiz artsa da, ayrı-ayrı məhsul növləri üzrə bu artım daha çox olub. Məsələn, ötən il tək bitkiçilik məhsullarının istehsalı 2016-cı illə müqayisədə 33,5 faiz artıb”.
F.Yusifovun sözlərinə görə, hazırda Azərbaycan hökuməti qeyri-neft sənayesi və aqrar sektorda istehsal edilən məhsulların “Made in Azerbaijan” brendi ilə dünya bazarlarında öz layiqli yerini tutması istiqamətində ciddi işlər görür. Dünyanın aparıcı ölkələrində Azərbaycanın ticarət evləri yaradılır və Azərbaycan brendi olan məhsulların yeni bazarları müəyyənləşdirilir: “Bir sözlə, hökumətin ölkədə qeyri-neft sektorunu əsaslı şəkildə inkişaf etdirmək yolunda atdığı mühüm addımlardan biri də aqrar sektorun sürətli inkişafının təmin edilməsindən ibarətdir. Ölkədə yeni su anbarlarının tikilməsi, torpaqların şorandan təmizlənməsi işlərinə böyük həcmdə vəsaitlərin ayrılması və digər tədbirlər aqrar sektorun tez bir zamanda dirçəlişinə hesablanıb”.
Günel CƏLİLOVA
